JOB 40 - Dios Rimashcata Quillcashcami

¹ Mandac Dios Jobta rimashpaca:

² «¿Canca tucuita ruhuac Dios-huanchu cariyashpa chimbapurasha ningui? Maijanpish Dios-huan chimbapurasha nishpaca caicunatami cutichina can» nirca.

³ Chaimantami Jobca Mandac Diostaca:

⁴ «Mandac Dioslla, ñucaca imapish mana canichu. ¿Imatatac cantaca nishayari? Chaipac randica ñuca maquihuanmi shimita jarcarini.

⁵ Ñucaca ñami cutin cutin rimashcani. Ña mana ashtahuan rimasha ninichu» nirca.

Mandac Dios Jobta cutin rimashcamanta

⁶ Mandac Diosca jatun acapana chaupimantami Jobta rimashpaca:

⁷ «Cunanca alli chumbillirishca shina ñuca tapushcata cutichingapac allichiri.

⁸ ¿Ñuca nishcataca yangatachu ruhuasha ningui? ¿Canca jucha illacmi cani nishpachu, ñucatarac juchanchisha ningui?

⁹ ¿Canca, ñuca shinachu sinchi rigrayuc cangui? ¿Can rimashcaca ñuca rimashca shinachu culun nishpa uyarin?

¹⁰ Shina cashpaca jatun cashcahuan sumacta allichiriyari. Sumaimana cashcahuan, alli nishca cashcahuan churariyari.

¹¹ Yallita piñarishpa rimariyari, jatun tucushcacunatapish tucuita chingachiyari.

¹² Cambac ricuillahuan jatun tucushcacunata cumurichiyari. Diosta mana manchaccunataca, paicuna tiyacuc pushtullapitac saruiyari.

¹³ Tucui mashnata allpahuan enterraiyari. Ñahuicuna ama ricuchunpish amsapi huichcaiyari.

¹⁴ Shina ruhuacpica, ñucallatacmi cambac alli maquica imatapish ruhuacmi can nisha.

¹⁵ Huagra shina quihuata micuc Behemot animaltaca canta shinallatacmi ruhuarcani.

¹⁶ Paica lomopipish, huicsa carapipish achca fuerzatami charin.

¹⁷ Paipac chupaca cedro caspi shinami sinchi. Changa angucunapish ahuashca shinami.

¹⁸ Tullucunaca bronce shina sinchimi. Changacunaca fierro barreta shinami.

¹⁹ Ñucami paitaca tucui animalcunamanta yalli cachun ruhuarcani. Paitaca ñucallami espadahuan huañuchi pudini.

²⁰ Urcucunapi tiyac quihuacunaca paipacllami. Chaipimi tucui sacha animalcunapish purincuna.

²¹ Paica jatun sacha ucupimi samaringapac siririn. Guzu allpapi huiñashca totora ucupimi miticun.

²² Jatun yuracunami paitaca llandun. Yacu uraipi tiyac sauce yuracunapimi pillurin.

²³ Jatun yacu yallita mirarishpa talliricpipish mana mancharishpa callpanchu. Jordán yacu paipac shimiman shamucpipish mana manchanchu.

²⁴ ¿Pitac pai ricucucpica, japi pudinga? ¿Pitac paitaca singata jutcui pudinga?