JOB 4 - Dios Rimashcata Quillcashcami

Jobta Elifaz rimashcamanta

¹ Chashna nicucpimi, temanitapuramanta Elifazca:

² «Maijan imata rimaricpica, mana upalla saquiringuimanchu. Ashtahuanpish ¿pitac upalla saquiringayari?

³ Canca achcacunatami yachachic carcangui. Ima ruhuanata mana pudictaca sinchiyachicmi carcangui.

⁴ Pandaric runatapish sumacta rimashpami allichic carcangui. Changa mucucuna quihuiricucpipish, sinchiyachicmi carcangui.

⁵ Cunan canta llaqui japicpica, yallitami llaquiringui, yallitami nanaringui.

⁶ ¿Manachu canca Diosta manchashpa, causac carcangui? ¿Manachu canca imatapish cashcata ruhuashpa, causac carcangui?

⁷ Cunanca alli yuyariyari. ¿Mana faltayuc runa huañushcachu? Cashcata ruhuac runacunataca, ¿maipitac tucuchishca?

⁸ Mana allita tarpuccunaca mana allillatatac cosechactami ricushcani.

⁹ Diospac samaillahuanmi huañuncuna. Pai yallita piñarishpa, pucucllapimi tucurincuna.

¹⁰ Piñarishpa huacac leonpac, huahua leonpac quirucunapish paquirishcami.

¹¹ Leonca micuna aicha illacpica huañunmi. Micuna illacpica, mama leonpac huahuacunapish, caita chaitami rincuna.

¹² Pacallami ñucamanca huillarca. Ñucaca paicuna rimanacushcallatami uyarcani.

¹³ Tuta ima yuyaicunapish yallita shamucpi, tuta runacuna yallita sueñunayachishpa sueñucucpi, shinami uyarcani.

¹⁴ Ñucataca manchai, chucchuimi japirca, tucui ñuca tullucunacamanmi cuyurirca.

¹⁵ Ñuca ñaupata huaira shina alma pasacpimi, ñuca cuerpo millmacunapish shayarirca.

¹⁶ Ñuca ñaupapimi almaca shayarirca. Paipac ñahuitaca mana ricurcanichu. Ñuca ñaupapi upalla shayarishpaca:

¹⁷ “¿Runaca Diosta atishpa cashcata ruhuacchu canga? ¿Runaca paita ruhuac Diostapish yalli ima mapa illacchu canga?

¹⁸ Diosca paita serviccunapipish, mana shunguta churanchu. Paipac angelcunapipish, mana alli tiyashcatami ricun.

¹⁹ Ñuto allpa jahuapi allpamanta huasichishca shina, runacunatacarin, ¡maitatac alli ningayari! ¡Paicunaca polilla micucpi tucurinallami cancuna!

²⁰ Paicunaca tutamanta alli cashpapish, chishipacca tucurincunallami. Chashna cashcamantami pipish mana yuyarishca huiñaita tucuringalla.

²¹ Paicuna sumac cashcapish, paicunallahuantacmi chingarin. Yachaitapish mana yachashpami huañun” nictami uyarcani» nirca.