JOB 39 - Dios Rimashcata Quillcashcami

¹ ¿Canca sacha chivocuna mashna quillapi huachacta yachanguichu? ¿Canca taruga huachacucta ricushcanguichu?

² ¿Canca taruga mashna quillata chichu puricta yupashcanguichu? ¿Ima quillapi huachanatapish yachanguichu?

³ Huachana nanai japicpica siririnmi. Chashna siririshpa, huachashpami nanaitaca pasachin.

⁴ Chai animalpac huahuacunaca sinchiyashpa catishpami quihuata micushpa causancuna. Chai quipaca mamamanta caruyashpami mana cutincuna.

⁵ ¿Pitac sacha burrotaca cacharishca purichun churashca canga? ¿Pitac chai animaltaca mana huatana animalta ruhuashca canga?

⁶ Ñucami chai animaltaca pi mana causanapi causachun churarcani. Chaimantami shitashca pambacunapi causan.

⁷ Chai animalca pueblopi causac gentecunatapish burlanmi. Shuc runa huashamanta caparishpa caticpipish mana cazunchu.

⁸ Chai animalca tucui urcucunatami verdinlla quihuacunata mashcashpa purin.

⁹ ¿Sacha huagraca trabajashpa canta servingachu? ¿Cambac huasipi pacaringachu?

¹⁰ ¿Chai huagrataca yugoshpa yapui pudinguichu? ¿Chai huagrahuan pugru pambacunata yapui pudinguichu?

¹¹ ¿Chai huagra fuerzasapa cashcamantaca yapungallami yuyanguichu? ¿Tucui trabajota chai huagrahuan tucuchi pudinguichu?

¹² ¿Canca, chai huagra cambac gavillata tandachishpa, trillana erapi parbangami yuyanguichu?

¹³ Pavo realmanca, ¿canchu sumac color alascunata curcangui? Avestruzmanpish, ¿Canchu sumac alascunata, plumacunata curcangui?

¹⁴ Avestruzca tiyu allpapimi rurucunata huachashpa saquin. Inti cunuchishpami, mama ucllashca shinata ruhuan.

¹⁵ Chaquihuan sarushpa paquinatapish, sacha animalcuna sarushpa ñutuchinatapish mana manchanchu.

¹⁶ Pai mana huachashca shinami, paipac huahuacunataca shitanlla. Pai huachashcataca yangalla cashcata yuyashpami shitashpa saquinlla.

¹⁷ Chaicunamanca ñucallatacmi yuyaitapish, ima shina entendinatapish mana curcani.

¹⁸ Shina cashpapish, jahuata volashpaca, caballotapish, caballopi ric soldadocunatapish mishashpami callpan.

¹⁹ ¿Canchu caballocumanca fuerzata curcangui? ¿Canchu paipac cungapi tiyac millmataca churarcangui?

²⁰ ¿Shuc langostata shinachu manchachinguiman? Singahuan pucushpapish sinchitami pucun.

²¹ Caballoca yallita fuerzata charishcamantami allpata aspishpa cushicun. Ima huañuchinahuan chapacucpipish mana manchashpami tupagrin.

²² Manchachisha nicucpipish, mana manchashpami asin. Espadata ricuchicpipish, mana huashaman cutirinchu.

²³ Flechacunahuan shitacucpipish, lanzacunahuan, jabalinacunahuan chilin nichicucpipish, mana manchanchu.

²⁴ Yallita piñarishpami utcashpa cuchuyan. Trompetapi tocacpipish mana jarcarinchu.

²⁵ Ashtahuanpish cornetacunapi tocacpica, mana cazushpa asishpami shayacun. Macanacuitaca carumantami mutquin. Soldadocunata pushaccuna caparishcatapish, macanacuipi caparishcatapish uyanmi.

²⁶ ¿Can yuyaita cucpichu condorca jahuata volashpa, alascunata chutashpa ura ladoman callpan?

²⁷ ¿Can mandacpichu angaca urcu jahuaman rishpa cuzhata ruhuan?

²⁸ Chai animalca rumi quingraicunapi, maita mana chayaipac rumi urcu puntapimi causan.

²⁹ Chai jahuamantami aicha maipi tiyactapish chapan. Paipac ñahuica carupimi ricun.

³⁰ Huahua angacunaca yahuartami sungan. Mama angaca maipimi ima huañushca tiyan, chaipimi can» nirca.