JOB 38 - Dios Rimashcata Quillcashcami

Jobta Dios rimashcamanta

¹ Chaimantami Mandac Diosca manchana huaira chaupimanta Jobta rimashpaca:

² «¿Pitac ñuca yachachishcacunataca, yanga rimashcacunahuan pandachisha nicun?

³ Cunanca sinchita chumbillirishpa, ñuca tapushcata cutichingapac allichiri.

⁴ ¿Ñuca cai pachata ruhuacucpica, maipitac carcangui? Allita entendic cashpaca huillaiyari.

⁵ ¿Pitac cai pachataca medirca? Chaitaca yachanami cangui. ¿Pitac chai jahuata huascahuan medirca?

⁶ ¿Cai pachaca ima jahuapitac tiyacun? Cai pacha callari rumita churacpi,

⁷ pacaric lucerocuna tandanacushpa cantacucpi, Diospac churicuna cushicushpa caparicucpica, ¿maipitac carcangui?

⁸ ¿Pitac, allpa ucumanta mama cucha llucshishpa talliricpi, pungucunata churashpa huichcarca?

⁹ Yacuta puyuhuan pillushpa, manchana amsahuan ñuca chumbillichicpica ¿Maipitac carcangui?

¹⁰ Chaimanta maimanpish ama llucshichunmi pungucunata churashpa llavercani.

¹¹ Chaimantaca: “Caicamanllami chayana cangui. Caimantaca jatun huaj nicuc yacuca mana pasangachu” nircanimi.

¹² ¿Can causacushca punzhacunapica shuc cutinllapish achicyachichun mandarcanguichu? ¿Mana cashpaca, mai ladota achicyamunataca ricuchircanguichu?

¹³ ¿Canchu achicyachictaca tucui allpata achicyachishpa, Diosta mana manchaccunata maita cachachun ricuchircangui?

¹⁴ Allpaca sellota churashpa sumacta ruhuashca shinami sumac ricurin. Sumacta churarishca shinami saquirin.

¹⁵ Diosta mana cazuccunamantaca luzta anchuchinmi. Jatun tucushcacunapac rigratapish paquinmi.

¹⁶ ¿Canca mama cucha callari pushtuman yaicushcanguichu? ¿Chai amsa ucuta ricsishpa purishcanguichu?

¹⁷ ¿Huañushcacuna tiyana pungucuna maipi cashcataca ricushcanguichu? ¿Huañuna amsa ucu pungutapish ricushcanguichu?

¹⁸ ¿Cai pacha maicaman cashcatapish yachanguichu? ¡Tucui caicunata can yachashpaca ñucaman huillai!

¹⁹ ¿Sumaimana achicman maita rinataca yachanguichu? ¿Maipitac manchana amsaca tiyacun?

²⁰ ¿Paicunataca maipi cana cashca pushtuman pushanata, paicuna causana cashcaman rina ñantapish ricuchi pudinguichu?

²¹ ¡Chaitaca tucuitachari yachanguiyari! ¡Chaipacca ñachari huacharircangui! ¡Chaipacca ñachari unai huatacunata causarcangui!

²² ¿Canca maipi rasu tiyac ucumanpish, rundu tiyac ucumanpish yaicushcanguichu?

²³ Chaicunataca llaqui punzhacunapac, jatun macanacui punzhacunapac, jatun huañunacui punzhapacmi huacaichishpa charicuni.

²⁴ ¿Achic maijan ñanta chaupishpa ricushcata, pambata tapac cunuclla huaira maita shamuctapish yachanguichu?

²⁵ ¿Pitac sinchi tamyamanca ñanta curca? ¿Pitac relampacuna tulun nichishpa, purichunpish ñanta curca?

²⁶ ¿Pitac pipish mana causana shitashca allpapi tamyachishpa,

²⁷ chaquishca imatapish mana tarpuipac allpapi llullu quihuacunataca huiñachishca canga?

²⁸ ¿Tamyaca taitata charinchu? ¿Garua tamyataca pitac huachashca canga?

²⁹ ¿Rasuca pipac huicsamantatac llucshirca? ¿Pitac jahua pachamanta urmac casataca huacharca?

³⁰ Yacucunapish sinchiyashpami rumiyan. Cai pachapi jatun mama cuchapish rasumi tucunlla.

³¹ ¿Canca Pléyades lucerocunapac huascacunata huatai pudinguichu? ¿Mana cashpaca, Orión lucerocunapac huascacunatapish pascai pudinguichu?

³² ¿Canca lucerocunataca llucshina punzhapi llucchi pudinguichu? ¿Mana cashpaca Osa Mayor lucerotapish, paipac huahuacunandi pushai pudinguichu?

³³ ¿Canca jahua pacha ima shina cana cashcata mandashcata yachanguichu? ¿Canca cai pachapi pai imalla ruhuashcacunata mandai pudinguichu?

³⁴ ¿Puyucunapi yacu tandarishpa tamyachun mandai pudinguichu?

³⁵ ¿Canchu relampacunataca maimanpish richun mandangui? ¿Cantachu chai relampacunaca: “¡Caipimi canchic!” ningacuna?

³⁶ ¿Pitac shungupi yachaita churarca? ¿Pitac allita yuyaricta ruhuarca?

³⁷ ¿Pitac jahua pachapi tiyac puyucunata yupangapac yachaita charin? ¿Pitac jahua cielopi tinajata puctic shina tamyachishpa,

³⁸ rumiyashca allpacunatapish, sinchiyashca chambacunatapish ñutuyachin?

³⁹ ¿Animalta japishpaca leonmanchu apamungui? ¿Canchu huahua leoncuna yarcaihuan

⁴⁰ jutcucunapi siricucpi, mai pacallapi chapashpa cacpi, aichata apamushpa sacsacta carangui?

⁴¹ ¿Pitac cuervocuna yarcaihuan Diosta caparishpa, caita chaita micunata mashcashpa puricucpica caran?