JOB 37 - Dios Rimashcata Quillcashcami

¹ Chaimantami ñuca shunguca chucchushpa, llucshinalaya tucushpa saltacun.

² Pai tulun nic shina rimashcata, paipac shimimanta llucshishca sinchi rimaicunata uyaichicyari.

³ Jahua pacha ucutami relampata cacharin. Chai achic nishcaca tucui cai pachatami achicyachin.

⁴ Chai relampa tulun nishca quipaca paipac rimashcami uyarin. Pai rimashca uyaricpica relampa achic nicucpish mana jarcarinchu.

⁵ Diosca sumaimanatami tulun nic shina riman. Paica ñucanchic mana entendipac sumaimanacunatami ruhuan.

⁶ Paica puyutaca: “¡Allpaman uricui!” ninmi. Cutin paramota, tamyataca: “¡Sinchita allpaman urmai!” ninmi.

⁷ Chaipimi gentecunaca huasipi saquirin. Pai imata ruhuacushcata tucui mashna yachachunmi chashnaca ruhuan.

⁸ Manchana animalcunaca miticuna jutcuman yaicushpami, chaillapitac saquirin.

⁹ Ura ladomantaca tamya huaira, jahua ladomantaca chiri huairami shamun.

¹⁰ Dios pucucpimi rasupish tucun. Mama cuchacunapish rumi shina sinchiyan.

¹¹ Puyupi yacuta tandachicpimi, puyuca relampata caita chaita cachan.

¹² Chashna pai mandacpimi puyuca tucui cai pachata rishpa pai mandashcata pactachin.

¹³ Chashnami Diosca maijan cutinca llaquichingapac, maijan cutinca allpamanta, maijan cutinca llaquishcamanta ricuchin

¹⁴ Job, caita alli uyai. Dios cai sumaimanacunata ruhuashcataca allita yuyariyari.

¹⁵ ¿Diosca puyupi churashpa relampata ima shina tulun nichictaca yachanguichu?

¹⁶ ¿Canca shuctac shuctac puyucuna tiyashcataca yachanguichu? ¿Tucuita yachac Dios cai sumaimanacunata ima shina ruhuashcatapish yachanguichu?

¹⁷ Ura ladomanta huaira shamushpa, allpata chiriyachicucpica, cambac churanacunahuanmi ruparicungui.

¹⁸ Dios jahua pachata mana paquiric espejota shina ruhuacucpica, ¿canchu ayudarcangui?

¹⁹ Paita imata ninataca ñucanchicta yachachiyari. Ñucanchicca amsapi shina causacushpami ima alli yuyaitapish mana charinchic.

²⁰ ¿Ñucaca paihuan rimangapac mañanachu cani? Chashna nishpaca ñucata tucuchichun nishpami mañacuiman.

²¹ Jahua pachapi tiyac achictaca puyu tapashca cacpica, pi mana ricui pudinchu. Huaira shamushpa puyuta anchuchishpa achicyachicpimi ricunalla can.

²² Jahua ladomantaca curi shina quillunlla achicmi shamun. Diosca sumaimana achic-huanmi paipac muyunditaca shamun.

²³ Tucuita ruhuac Diosmantaca mana yachai pudinchicchu. Paica imatapish cashcata ruhuac, pitapish mana llaquichic Diosmi can.

²⁴ Chaimantami runacunaca paita manchancuna. Paimanca shungupi jatun tucushcacunaca yangallami» nirca.