JOB 36 - Dios Rimashcata Quillcashcami

Eliú Dios jatun cashcata huillashcamanta

¹ Eliú rimashpa catishpaca:

² «Ñucaca Dios ima shina cashcata canman yachachingapacca ashtahuan charinimi. Chaimanta ashata shuyai.

³ Ñucapi tiyac yachaicunaca carumanta shamuc shinami can. Ñucata ruhuac ima shina cashcatami canmanca huillasha nini.

⁴ Ñuca rimashcacunaca mana llullachu. Yuyaisapa runami canhuanca parlacun.

⁵ Diosca imatapish ruhuacmi tucui imatapish yachacmi. Shina cashpapish pita mana chicanyachinchu.

⁶ Paita mana manchacmanca mana causaita cunchu. Ashtahuanpish llaquihuan caccunamanca paicuna japina cashcatami cun.

⁷ Cashcata ruhuaccunataca cuidanmi. Jatun mandaccunahuan tiyarinapi tiyachishpami, huiñaipac jatunyachin.

⁸ Cadenacunahuan huatashca cacpipish, llaquichic huascacunahuan huatashca cacpipish,

⁹ Diosmi paicuna imata ruhuashcatapish, paicuna mana cazushpa jatun tucushcatapish huillanga.

¹⁰ Paimi ama pandarishpa purichun, ringripi rimashpa, millaita ruhuanata saquichun mandan.

¹¹ Chaita uyashpa paita servishpaca sumac punzhacunata, huatacunata causashpami huañuicaman cushicuihuan causanga.

¹² Ashtahuanpish mana uyashpaca espadahuan huañuchicpimi ima allitapish mana yachashpa chingaringacuna.

¹³ Shungupi millai yuyaita chariccunaca paicunapac shungu ucullapimi piñarishpa mucuricuncuna. Dios paicunata llaquichicpipish, mana caparishpa mañancunachu.

¹⁴ Paicunaca huambraracmi huañungacuna. Paicunapac causaica pinganayaipac tucushpami tucuringa.

¹⁵ Llaquihuan caccunataca Diosmi chai llaquillahuantac quishpichin. Llaquihuan capariccunamanca Diosmi entendina yuyaita cun.

¹⁶ Chashnallatacmi cantapish llaqui causaimanta llucchishpa, ima llaqui mana tiyac pushtuman apashpa, miza junda micunatapish cunga.

¹⁷ Shina cacpipish, canca Diosta mana manchaccuna shinallatacmi llaquichishca cangui. Taripashpa llaquichishcami cangui. Chaimantaca mana quishpiringuichu.

¹⁸ Chaimanta cambac charishcacunapi shunguta churanamantaca cuidaringui. Chai llaquimantaca imata cushpapish mana quishpiri pudinguichu.

¹⁹ Can yallita llaquihuan cacpica, can caparishpa mañashcaca imata mana ruhuangachu. Cambac tucui charishcahuanpish imata mana ruhuai pudinguichu.

²⁰ Ama tutayachun shuyaichu. Tutapica gentecunaca maipi tiyacushcamanta chingarinmi.

²¹ Cutinllatac millaita ruhuanamantaca cuidaringui. Chai mana allita ruhuashcamantami llaquita apacungui.

²² Diosca tucuita ruhuac jatunmi can. Pai shina yachachicca, ¿pitac tiyangayari?

²³ ¿Pitac pai imata ruhuashcataca tapungayari? ¿Pitac paitaca: “Canca mana allitami ruhuashcangui” ningayari?

²⁴ Pai imata ruhuashcamanta paita jatunyachinataca ama cungaringuichu. Chai ruhuashcataca tucui gentecunami alli nincuna.

²⁵ Chaicunataca tucui gentecunami carullamanta cashpapish ricuncuna.

²⁶ Riqui, Diosca mai jatunmi. Ñucanchicca mana ricsi pudinchicchu. Paipac huatacunatapish mana yupai pudinchicchu.

²⁷ Paimi yacumanta bauta huichaiman apashpa tamyata ruhuangapac yacuta tandachin.

²⁸ Chashnami puyupi tandarishpa gentecunapac jahuapi tamyan.

²⁹ ¿Pitac puyu maipi callarictapish, maipi tucurictapish yachai pudingayari? Maimanta tulun nishpa uyarimushcatapish, ¿pitac yachangayari?

³⁰ Riquichic, paimi paipac jahuapi achicyachicta churarca. Chai achicyachicmi mama cuchatapish catac shina achicyachicun.

³¹ Chaicunallahuantacmi gentecunatapish mandan. Shinallatac gentecunamanpish micunata yallita caran.

³² Paimi achic rayotaca paipac maquihuan japishpa pai munashcapi urmachin.

³³ Pai piñarishcataca tulun nishcami huillan. Millaita ruhuaccunata piñarishpa, llaquichigricushcataca manchaipac tamya huaira shamushpami huillan.