JOB 35 - Dios Rimashcata Quillcashcami

Eliú Jobta rimashpa catishcamanta

¹ Eliú ashtahuan rimashpaca:

² «Can: “ñucaca Diostapish yalli cashcata ruhuacmi cani” nishpaca, ¿allitami nicuni yuyanguichu?

³ Ashtahuanpish canca: “¿Ñuca mana juchallishpaca imatatac japishayari?” nircanguimi.

⁴ Chaimantami cantapish, cambac ricsishcacunatapish ñucaca caita nisha nini:

⁵ Jahua pachata huichailla ricushpa, chaipi tiyac puyuta allita ricuiyari. Chaicunaca cantapish yalli jahuamanmi tiyacun.

⁶ Can juchallishpaca, ¿imatatac Diostaca ruhuanguiyari? Can yallita mana cazushpaca, ¿paitaca imatatac ruhuai pudingui?

⁷ Cashcata ruhuac cashpapish, ¿imatatac paimanca cunguiyari? ¿Paica imatatac cambac maquimantaca japingayari?

⁸ Cambac juchacunaca can shina runatami llaquichinga. Cashcata can ruhuashcaca can shina runapacmi alli canga.

⁹ Runacunallatac huatashca shina charicucpimi caparincuna. Sinchi runacuna llaquichicpimi, caparishpa huacancuna.

¹⁰ Ashtahuanpish paicunaca: “¿Ñucata ruhuac Diosca maipitacyari? Paica tutapish cantachunmi cushichirca.

¹¹ Ñucanchictaca cai pachapi tiyac animalcunata ricuchishpa ashtahuan alli yachacta, jahuata volac animalcunatapish ricuchishpa yalli yuyaita charictami ruhuarca” nicca, shucllapish mana tiyanchu.

¹² Paicuna jatun tucushpa millaita ruhuashcamantami paicuna caparishpa mañacpipish Diosca mana uyan.

¹³ Yanga rimashcacunataca Diosca mana uyanchu. Tucui poderta charic Diosca ricunallatapish mana ricunchu.

¹⁴ Can Paita mana cazunichu nicucpipish, ¡can imata ruhuashcacunaca paipac ñaupapimi! ¡Paitaca shuyailla!

¹⁵ Ashtahuanpish canca Diosca manarac piñarinchu, manarac llaquichinchu. Paita mana cazushcataca manarac ricuchinchu ninguimi.

¹⁶ Chaimantami canca yangamanta imatapish rimaricungui. Ima nicushcatapish mana entendishpami yallita rimaricunguilla» nirca.