JOB 34 - Dios Rimashcata Quillcashcami

Dios ima shina cashcata Eliú huillashcamanta

¹ Eliú rimashpa catishpaca:

² «Alli yachaccunapish, alli yuyaita chariccunapish ñuca rimashcata alli uyaichic.

³ Ringrica imata nicushcatami uyan. Calluca micuna imalaya cashcatami yachan.

⁴ Cashcata ruhuanata acllashunchic. Ñucanchicpurapi ima alli cashcata ricsishunchic.

⁵ Chaica Jobca: “Ñuca cashcata ruhuac cacpipish, Diosca ñuca japina cashcataca quichurcami.

⁶ ¿Ñuca alli yuyaricushcataca pacashpachu llullasha? Manapish ima juchata ruhuashca cashpapish maita mana jambiripac ungüihuanmi cani” nirca.

⁷ ¿Pitac Job shinaca tiyangayari? Paica yacuta ubiac shinami burlashpa asin.

⁸ Millaita ruhuaccunahuanmi yallita apanacurca. Diosta mana cazuccunahuanmi purirca.

⁹ Chashna cashpami paica: “Runaca Diospac munaita ruhuashpaca, ima allita mana japinchu” nirca.

¹⁰ Chaimanta alli yuyaita chariccuna caita alli uyaichic. ¡Mana allita ruhuana munaica Diosmanta carupi cachun! ¡Millaita ruhuanapish tucuita ruhuac Diosmanta carupi cachun!

¹¹ Paimi runamanca pai imata ruhuashca shina cuna cashcata cunga. Runa ima shina causashca shinami cunga.

¹² Diosca pitapish mana yanga juchanchishpami cashcata ruhuanga. Tucuita ruhuac Diosca ima japina cashcatapish mana quichungachu.

¹³ ¿Pitac cai pachataca paipac randi mandachun churarcayari? ¿Pitac cai pachapi tucui tiyashcacunataca paiman mingarcayari?

¹⁴ Runapi causaita cuc samaita churashpapish paillatac chai samaita quichucpica,

¹⁵ tucui gentecunami chingarishpa allpallamantac tigranman.

¹⁶ Can allita entendishpaca caita uyashpa ñuca rimashcata allita yuyari.

¹⁷ ¿Cashcata ruhuanata Dios piñashpaca mana mandai pudinmanchu? ¿Tucuita ruhuac, cashcata ruhuac Diostaca llaquipi churanguimanchu?

¹⁸ Jatun mandactaca: “¿Millaita ruhuacmi” ninallachu canga? Pai churashca mandaccunataca, “¿Diosta mana manchaccuna” ninallachu canga?

¹⁹ Paica jatun mandaccunatapish mana ñahuita ricushpalla allita ruhuan. Paica paipac maquihuan ruhuashca cacpimi, huacchacunamanpish, chariccunamanpish chashnallatac ruhuan.

²⁰ Chaupi tutami runacunaca cungailla huañuncuna. Yallita alli nishca runacunapish, tucuita ruhuac Dios maquihuan manapish huactacpimi chingaringacuna.

²¹ Runa maita puricpipish Diosca chapacunmi. Chaqui sarushcatapish tucuitami ricucun.

²² Mana allita ruhuaccuna miticuchunca amsa puyupish, amsa tutapish mana tiyanchu.

²³ Diosca paipac ñaupapi runa imamanta juchanchishca cachunca mana punzhata churanchu.

²⁴ Sinchi tucushcacunatapish mana llaquishpami llaquichinga. Paicunapac randica shuccunatami churanga.

²⁵ Diosca tucui millaita ruhuashcata ricushpaca shuc tutallami tucuita llaquichinga.

²⁶ Tucuipac ñaupapimi mana allita ruhuaccunataca chugrichinga.

²⁷ Paicuna Diosmanta caruyashpa, pai imata ruhuachun nishpa mandashcacunata shucllapish mana yuyarishcamantami chashnaca ruhuanga.

²⁸ Chashna ruhuacpimi huacchacunapish, llaquihuan caccunapish llaquirishpa Diospac ñaupaman uyaricta caparirca.

²⁹ Dios upalla saquicpica, ¿pitac llaquichi pudingayari? Pai ñahuita pacacpica, ¿pitac catishpa ricui pudingayari? Paica jatun llactatapish, shuc runatapish chai shinallatacmi ricucun.

³⁰ Millaita ruhuac runa chai llactapi causaccunata ama pandachishpa mandachunmi, chashnaca ricucun.

³¹ Chaica, Diostaca: “Ñucaca ñami yallita llaquita apashcani, cantaca ña mana ashtahuan piñachishachu.

³² Ñuca mana ricushcacunata yachachi, ñaupaman mana alli ruhuashcacunata, ña mana ashtahuan ruhuashachu” ninami cangui.

³³ Diostaca can imata ruhuashcamanta, ¿can munashcata ruhuachunchu munangui? Paimi can japina cashcataca cunga. Chaita chasquina cashpapish, mana chasquina cashpapish canmi ningui. Shinashpaca can imata yuyarishcata ñucaman huillai.

³⁴ Alli yuyaiyuc gentecunapish, ñucata uyacuc yachaisapa runapish, ñucataca:

³⁵ “Jobca mana alli yachashpami rimacun. Pai rimashca shimicunaca jaicapi mana yuyaita cunchu” ningacunami.

³⁶ Jobca mana allita ruhuac runacuna shinami rimashpa cutichin. Chaimanta pai imata yuyarishcataca allimi ricuna can.

³⁷ Paica juchata ruhuashca jahuami mana cazurca. Ñucanchictapish piñashpami maquicunata huactarca. Diostapish yallitami piñachishpa rimarirca» nirca.