JOB 33 - Dios Rimashcata Quillcashcami

Eliú Jobta juchanchishcamanta

¹ Job, ñuca imata yuyarishcata uyai. Ñuca tucui imata rimashcata allita uyai.

² Ñuca shimihuanmi cantaca rimagrini. Ñuca cungapi cac callumi cantaca rimanga.

³ Ñuca shungupi alli cashcatami ñuca rimashpaca ricuchisha. Ñuca shimica imatapish cashcatatacmi rimanga.

⁴ Ñucataca Diospac Espiritumi ruhuarca. Tucuita ruhuac Diospac samaimi causaita cun.

⁵ Can cutichinata pudishpaca cutichingui. Ñuca ima nishcata cutichingapac ñuca ñaupaman shamui.

⁶ Canpish, ñucapish Diospac ñaupapica chashnallatacmi canchic. Ñucapish allpamanta ruhuashcallatacmi cani.

⁷ Ñuca rimashcacunaca mana manchachingachu. Ñuca maquipish cantaca mana llaquichingachu.

⁸ Canca ñucamantami rimarcangui. Ñuca ringrihuantac uyashca shimicunaca:

⁹ “Ñucaca ima mapa illac chuyami cani. Ñucaca ima mana faltayucchu cani. Ima millaita ruhuanatapish mana yachanichu.

¹⁰ Shina cacpipish Diosca juchatami ñucapica tarishca. Shina tarishpami ñucataca paita piñacta shina ricucun.

¹¹ Ñuca chaquicunatapish jutcushca caspipimi canichirca. Ñuca maita ricpipish chaparacunmi” nircangui.

¹² Uyai, can chashna nishpaca pandaricunguimi. Diosca runata yallimi. Chaitami canmanca ricuchigrini.

¹³ ¿Ima nishpatac runa mañashcataca mana uyanchu nishpa, paitaca piñarishpa rimanguiyari?

¹⁴ Ashtahuanpish Diosca runahuanca shuctac shuctaclayami parlan. Shina cacpipish, runamari mana entendin.

¹⁵ Runacunamanca muscuipipish, muscuipi shina tuta ricurishpami riman. Runataca huañui sueñuhuan camapi sueñucucpimi riman.

¹⁶ Chashnami runapac ringrillapi rimashpa, pai imata nigricushcataca huillan.

¹⁷ Runacunataca, mana allita ruhuanamanta, jatun tucushpa causanamanta anchuchingapacmi chashnaca huillan.

¹⁸ Chashnami enterrana jutcumanta, espadapi huañunamanta quishpichin.

¹⁹ Maijantaca sinchi ungüihuan, maijantaca tullucunapi mana anchuric nanaihuanmi llaquichin.

²⁰ Chai nanaihuan cashpami, tandatapish sumaimana micunatapish millanayachishpa mana micun.

²¹ Paipac aicha tucurishpa caticpimi, jaicapi mana ricurishca tullucunapish ricuricun.

²² Chashnami paipac causaica enterrana jutcuman chayacun. Paica ñami huañuiman chayacun.

²³ Diospac huaranga angelcunamanta shuc ángel, runa allita ruhuana cashcata Diosman tapuc tiyashpachari alli canman.

²⁴ Pai tapushpa allita tarishca cashpaca: “Enterrana jutcumanta quishpichircami. Canca quishpirinata tarircanguimi” ninmanmi.

²⁵ Shina mañacpica, paipac cuerpoca huahuacunapac cuerpota yalli huambra tucushpami mosorac cashca punzhacunaman cutinman.

²⁶ Diosta mañacpica, paica cuyanmanmi. Paipac ñahuita ricushpami cushicushpa caparinman. Runataca cashcata ruhuactami ruhuanman.

²⁷ Runaca tucuipac ñaupapi cantashpaca: “Ñucaca juchatami ruhuashcani, allita ruhuanapac randica mana allitami ruhuashcani. Shina cacpipish, ñuca japina cashcataca mana japishcanichu” ninmanmi.

²⁸ Diosmi paitaca enterrana jutcumanta quishpichinga. Shina cacpica, achicta ricushpami paica causanga.

²⁹ Diosca chashnami tucuita ruhuan. Runataca ishcai cutin, quimsa cutinmi chashna ruhuan.

³⁰ Paitaca enterrana jutcuman rinamanta quishpichingapac causaita cuc luz-huan achicyachingapacmi chashnaca ruhuan.

³¹ Joblla, ñuca rimashcata upalla uyai.

³² Ima yuyaicunata charishpaca cutichi. Ñucaca cantaca mana juchanchina cashcatami huillasha ninimi. Chaimanta imata nisha nishpaca nilla.

³³ Mana cashpaca upalla uyai. Ñucami allita yachachisha nini» nirca.