JOB 32 - Dios Rimashcata Quillcashcami

Eliuca Job imata rimashcata cutichishcamanta

¹ Job cashcata ruhuac cashcamantami chai quimsa runacunaca Job rimashcataca mana cutichi pudircacuna.

² Chaimantami Buz llactamanta Rampac familiapura Beraquielpac churi Eliuca Jobhuan sinchita piñarirca. Diosmi cashcata ruhuac ninapac randica pai cashcata ruhuacmi cani nishcamantami chashnaca piñarirca.

³ Jobta juchanchishpapish pai ima nishcata mana cutichi pudic paihuan apanacuc quimsa runacunahuanpish yallitami piñarirca.

⁴ Eliuca quipa huiñai cashcamantami caishuc yuyac runacuna Jobhuan parlangacaman upalla shuyacurca.

⁵ Shina cashpapish chai quimsa runacuna Job ima nishcata mana cutichi pudicta ricushpami paicunahuanca yallita piñarirca.

⁶ Chaimantami Buz llactamanta Beraquielpac churi Eliuca: «Ñucaca quipa huiñaimi cani. Cancunaca yuyaccunami canguichic. Chaimantami cancunata manchashpa ñuca ima yuyacushcatapish manarac nircani.

⁷ Ñucaca: “Tauca punzhacunata chariccunami yallita rimanga, unai huatata chariccunami yachaccuna canga” yuyarcanimi.

⁸ Runataca paipi tiyac espiritumi yachachin. Tucuita ruhuac Diospac samaimi alli yuyaita cun.

⁹ Mana unai huatacunata chariccunallachu alli yachaccuna can. Mana yuyaccunallachu cashcata ruhuactaca allita entendincuna.

¹⁰ Chaimantami cancunataca: “Ñucatapish uyaichic. Ñucapish ñuca imalla yachashcatami nigrini” nirca.

¹¹ Riquichic, ñucaca cancunarac rimachunmi shuyarcani. Cancuna rimashcataca allitami uyarcani. Cancuna rimangapac rimaicunata mashcacuctapish ricurcanimi.

¹² Cancuna rimashcataca tucuitami allita uyarcani. Shina cacpipish cancunamanta maijanpish Job pandaricushcata mana ricuchi pudircanguichicchu. Pai imata nicpipish, imata mana cutichi pudircanguichicchu.

¹³ Ama cancunallatac: “Alli yachacmi canchic” nirichicchu. Diosllami mishanga. Runaca mana mishai pudinchu.

¹⁴ Jobca ñucataca imata mana rimarcachu. Ñucapish paitaca cancuna yuyarishca shina mana rimashachu.

¹⁵ Job, cai runacunaca mancharishpami imata mana cutichi pudirca. Paicunamantaca yuyaicuna chingarircami.

¹⁶ ¿Ñucaca paicuna imata mana rimashpa upalla saquiricpica shuyacushallachu?

¹⁷ Ñucapish imalla yachashcata, imata yuyarishcata huillasha ninimi.

¹⁸ Ñuca shungupi tauca yuyaicunata charishpami, yallita rimana munaihuan cani.

¹⁹ Ñuca yuyaicunaca, cunanlla ruhuashca vinota mushuc capachupi churacpi, yallita timbushpa, tucyacuc shinami.

²⁰ Imallatapish rimashpami cushilla casha. Can ima nishcacunata cutichingapacmi ñuca shimihuan rimasha.

²¹ Ñucaca pitapish mana ñahuita ricushpalla rimashachu. Shinallatac pitapish mana allimi cangui nishachu.

²² Ñucaca pitapish allimi cangui mana ninillachu. Shina ruhuacpica, ñucata ruhuac Diosca utcami llaquichinman.