JOB 31 - Dios Rimashcata Quillcashcami

Job imata yuyacushcata huillashcamanta

¹ Ñuca ñahuihuan ima millaita mana ricungapacmi ari nircani. Shina cashpaca, ¿ima nishpatac, carihuan manarac chayarishca solterataca chapashayari?

² Ñuca chaita ricucpica Diosca jahua pachamanta, ¿imatatac cunga? Tucui ruhuac Diosca ¿ima japinatatac jahuamanta cunga?

³ ¿Diosta mana manchaccunamanpish juchata ruhuaccunamanpish manachu llaquicunaca tiyanga?

⁴ ¿Manachu Diosca ñuca imalla ruhuashcatapish, ñuca chaqui sarushcatapish ricucun?

⁵ Mana allita ruhuashpa purishca cacpi, mana allita ruhuangapac ñuca chaqui callpashca cacpica,

⁶ Dios cashcatatac pezac balanzapi pezashpa ñuca ima pandata ruhuashcata ricuchun.

⁷ Alli ñanmanta caruyashca cacpi, ñuca ñahui ricushcata shungupi yuyarishca cacpi, ñuca maquihuan mapayashca cacpica,

⁸ ñuca tarpushcatapish shuccuna micuchunlla. Ñuca tarpushcatapish pitishpa shitachunlla.

⁹ Shuc huarmita ñuca shungupi munashca cacpi, shuc huarmita inquitangapac chapac cashca cacpica,

¹⁰ ñuca huarmipish shuc carihuan cachunlla. Shuctac caricunapish paihuan chayarichunlla.

¹¹ Chai juchacunata ruhuashca cashpaca taripashpa llaquichishcami caiman carcani.

¹² Chai juchacunaca tucuita rupachic shinami canman carca. Ñuca charishcacunatapish tucuimi rupachinman carca.

¹³ Ñucata servic carihuan, huarmihuan piñarishpa, paicuna japina cashcata mana cushca cashpaca.

¹⁴ Dios ricungapac shamucpica, ¿imatashi ruhuaiman carcani? Pai imata tapucpica, ¿imatashi cutichiman carcani?

¹⁵ ¿Manachu ñucata mamapac huicsapi callarichic Diosllatac paicunatapish ruhuarca? Diosllatacmi tucuita ruhuarca.

¹⁶ Huacchacuna mañashcata mana cushca cacpi, viuda huarmicunatapish yarcaihuan huañuchun saquishca cacpi,

¹⁷ taita mama illac huahuacunaman mana carashpa ñucalla micushca cacpica llaquichichunlla.

¹⁸ (Ñucaca huambramanta pachami shuc taita shina paicunataca huiñachircani. Ñucaca ñuca mamapac huicsapi tiyarishca pachamantami viuda huarmicunata ña pushac carcani).

¹⁹ Ñuca ricucushca jahua maijanta churana illac huañuchun saquishca cacpi, catallina illac purichun saquishca cacpica llaquichichunlla.

²⁰ Paicuna imahuan mana tapari pudicpi, ñuca ovejacunapac millmahuan catachishca jahua ñucata mana tucui shunguhuan pagui nishca cacpi,

²¹ taita mama illac huahuata pueblo pungupi ñuca maquihuan mana ayudashca cacpica,

²² ¡ñuca hombrosmanta rigrapish paquirishpa urmachunlla! Mucumantapish tullu chicanyachunlla.

²³ Ñucaca Dios llaquichinatami mancharcani. ¡Jatun Diospac ñaupapica, maitatac ricuri pudiman carcaniyari!

²⁴ Curipi ñuca shunguta churashca cashpaca, shinallatac alli curita: “Canmi ñuca shuyanaca cangui” nimanmi carcani.

²⁵ Ñuca charishcacuna achca cashcamanta, ñuca maquihuan achcata japishcamanta cushicushca cashpa,

²⁶ inti achicyachicpi, quilla achicyachicpi, chapashca cashpa,

²⁷ chaicunata ñuca shungupi adorashca cashpa, carumanta maquihuan muchashca cashpaca,

²⁸ llaquichishcami caiman carcani. Chaicunata ruhuashca cashpaca, Mandac Diostami cungariman carcani.

²⁹ Ñucata piñac llaqui tucucpi, paita llaqui japicpica mana cushicushpa asircanichu.

³⁰ (Paita llaqui japichun nishpaca, ñuca calluhuanca ima mapata mana rimarcanichu).

³¹ Ñuca serviccuna: “¿Maijantac aichataca mana nicta, manarac micunguichic?” nishpaca, mana tapurcachu.

³² (Carumanta shamuccunatapish mana canzhapi saquishpami, ucuman yaicuchi carcani).

³³ Ima millaita mana pacalla ruhuarcanichu. Mana allita ruhuashcataca ñuca shungupi mana pacarcanichu.

³⁴ Mana achca gentecunata manchashcamantachu, mana ñuca familiacuna piñanata manchashcamantachu, ñuca huasi ucupi upalla saquirishcani.

³⁵ ¡Ñuca mañashcata maijan uyashpachari alli canman! ¡Tucuita ruhuac Dios ñuca mañashcata cutichichun! ¡Ñucata piñacca quillcashpa ñucata juchanchichun! nishpami ñuca shutitaca quillcani.

³⁶ Chaitaca ñuca hombrospimi apashpa puriman. Coronata shinami umapi churariman.

³⁷ Ñuca imalla ruhuashcacunataca, shuc mandac shinami paipac ñaupapi tucuiman huillaiman.

³⁸ Ñuca allpacuna ñucata piñashpa caparishca cacpi, chaipi tiyac huachucuna huacashca cacpi,

³⁹ mana pagashpa chaipi ima pucushcacunata micushca cacpi, chai allpayucta shungupi llaquichishca cacpica,

⁴⁰ trigo huiñanapac randica cashacuna huiñachunlla. Cebadapac randica yanga quihuacuna huiñachunlla» nircami. Job huillashcacunaca caillapimi tucurin.