JOB 30 - Dios Rimashcata Quillcashcami

Job llaquilla cashcata yuyarishpa huacashcamanta

¹ Ashtahuanpish ñucapac quipa huiñaicunami asicuncuna. Paicunapac taitacunataca ñuca animalta cuidac allcucunahuanpish mana churaimanchu carcani.

² Paicunapac fuerzaca ñucamanca, ¿imapactac valinman carca? Paicunaca fuerza illacmi carca.

³ Huaccha cashcamanta, yarcaihuan cashcamantami paicunalla manchaipac amsapi, shitashca pambacunapi pacalla puriccuna carca.

⁴ Yuracuna chaupipimi malvacunata tandaccuna carca. Masharingapacca retama sapitami tandaccuna carca.

⁵ Paicunataca shuhuacta shina caparishpami llactamanta llucchishpa cachashca carca.

⁶ Yacu huaicu jutcucunapi, quingrai machaicunapimi causarcacuna.

⁷ Sacha chaupicunapi capariccuna, casha ucucunapi tandanacuccunami carca.

⁸ Paicunaca yuyai illac gentecunapac churicuna, paicunapac llactapi piñashca, shuti illaccunami carca.

⁹ Cunanca paicunapac burlashca, asishpa imacunata rimanami tucushcani.

¹⁰ Ñucata millashpami ñahuipi tucashpa caruyancuna.

¹¹ Diosllatacmi ñuca arco cuerdata pascac shina ñucataca cumurichirca. Chaimantami ñuca ñaupapica mana jarcarishpa imatapish rimarcacuna.

¹² Ñuca alli ladomanca, achca gentecuna jatarishpami ñucataca tangashpa shitarca. Ñucata chingachingapacmi, pandachic ñancunata allichircacuna.

¹³ Ñuca llaqui tucuchunmi ñuca purina ñantapish jarcancuna. Ñuca llaquipi cacta ricushpami chashna ruhuarcacuna. Paicunataca pipish mana jarcarcachu.

¹⁴ Pirca jutcushcata yaicuc shina yaicushpami, chai llaqui jahuallapitac llaquichircacuna.

¹⁵ Yallita manchaimi ñucata japirca. Ñucaca alli nishca canamantaca huaira urmachic shinami chingarircani. Ñuca ima charishcapish puyu shinami chingarirca.

¹⁶ Cunanca ñuca causaica yacuyac shinami chingarin. Ñucaca punzhantami yallita llaquihuan cani.

¹⁷ Tutacunaca tullucamanmi nanan. Nanaicunaca manatac samarinchu.

¹⁸ Llaquicunami ñuca cuerpotaca tucuchicun. Jahualla churarina cungapi sipic shinami ñucataca sipicun.

¹⁹ Diosca turupimi ñucataca urmachirca. Ñuto allpa, uchupa shinami cani.

²⁰ Canta mañacpipish mana uyanguichu. Cambac ñaupaman ricpipish mana chasquinguichu.

²¹ Canca yallita llaquichicmari ñucapacca tucushcangui. Cambac sinchi maquihuanmi catinta llaquichingui.

²² Huairapi tiyachishpami jahuata cacharcangui. Manchana tamya puntapimi cacharircangui.

²³ Canca ñucataca huañuiman, tucui causaccuna huañushpa, rina llactaman apacushcatami yachani.

²⁴ Ashtahuanpish enterrana jutcuman ama richunca, paipac maquihuanca mana ayudangachu. ¿Pai llaquichicucpica, huañushcacunaca caparingachu?

²⁵ ¿Manachu ñucaca llaquihuan caccunamanta huacarcani? ¿Manachu ñucaca huacchacunata llaquircani?

²⁶ Ashtahuanpish allita shuyacucpica, mana allimi shamurca. Achicta shuyacucpica, amsaracmi chayamurca.

²⁷ Ñuca cuerpoca yallitami nanaihuan. Tucui chai nanaicunaca manatac anchurinchu. Ñucamanca llaqui punzhacunami chayamushca.

²⁸ Manapish inti rupachicpimi yanayashcani. Tucui tandanacushcapac ñaupapimi caparishpa mañarcani.

²⁹ Ñucaca sacha animalcunapac huauquimi tucushcani. Avestruzcunahuan apanacucmi tucushcani.

³⁰ Ñuca aicha caraca yanayashpami urman. Ñuca tullucunapish rupacunmi.

³¹ Ñuca arpaca llaquilla tocacmi tucushca. Ñuca flautapish huacaccunapac cunga shinami tucushca.