JOB 3 - Dios Rimashcata Quillcashcami

Job pai huacharishca punzhata mana alli nishcamanta

¹ Chai quipami Jobca pai huacharishca punzhataca mana alli nishpa rimarirca.

² Job sinchita rimarishpaca:

³ «Ñuca huacharishca punzha ama tiyashca cachun. “Cari huahuatami charingui” nishpa, huillashca tutapish chingarishca cachun.

⁴ Chai punzha amsa tucushca cachun. Jahua pachamanta Dios cungarishpa, achicta ama cachachun.

⁵ Chai punzhaca purayashca huañuna llandu cachun. Punzha purayashca shina, manchanayaita ruhuashpachari alli canman.

⁶ Chai tuta purayashpachari alli canman. Ñuca huacharishca punzhapish, huatapish, quillapish, mana tiyashpachari alli canman.

⁷ ¡Chai tutaca pipish ama huacharichun, ima cantanapish ama tiyachun!

⁸ Chai punzhata mana alli niccuna manchana leviatán animalta japishpa ricchachiccuna mana alli nichiyari.

⁹ Tutamanta llucshic lucerocunapish, amsayashpachari alli canman. Punzhayangami nicucpipish, mana punzhayashpachari alli canman. Pacaricpi, achicta mana ricushpachari alli canman.

¹⁰ Chai punzha mana huacharishca cashpaca, cai tucui llaquicunataca manachari apaiman carcani.

¹¹ Ñucaca, ¿ima nishpatac mana huicsallapitac huañurcani? ¿Ima nishpatac mana huacharishcahuan huañurcani?

¹² ¿Ima nishpatac, changapi churashpa marcarcacunayari? ¿Imapactac chuchuchircayari?

¹³ Huañushca cashpaca, samaricuimanmi carcani. Sumactami sueñucuiman carcani.

¹⁴ Cai pachata mandaccunahuan, paicunaman yuyaita cuccunahuanmi samaricuiman carcani. Paicunaca urmashca huasicunatami, paicunapac cachun allichincuna.

¹⁵ Mana cashpaca curita charic mandaccunahuan, cullquita huasipi jundachic runacunahuanmi samaricuiman carcani.

¹⁶ ¿Ima nishpatac ñucataca shullushca huahuata shina, achicta manarac ricuc huahuata shina mana pacarcacunayari?

¹⁷ Huañushpami Diosta mana manchaccunaca shuccunata pandachinataca saquincuna. Llaquipi causaccunapish chaipimi samarincuna.

¹⁸ Prezucunapish chaipimi samarincuna. Piña mandaccuna caparishcapish, mana uyarinchu.

¹⁹ Uchillapish, jatunpish, chaillapitacmi can. Servishpa causaccunapish, amopac maquimantaca cacharishcami cancuna.

²⁰ ¿Ima nishpatac llaquihuan causaccuna achicta ricuchunca saquinyari? ¿Ima nishpatac shungu nanarishcamanca causaita cunyari?

²¹ Paicunaca huañuitami shuyan. Huañuica mana chayanchu. Curi pacashcata shina mashcacucpipish huañuica mana japinchu.

²² Enterrana jutcuta tarishpaca yallitami cushicuncuna.

²³ Diosllatac jarcashpa charicucpi maita rinata mana yachac runamanca, ¿imapactac causaita cunyari?

²⁴ Micunapac randica, shunguracmi llaquirin. Ñuca llaquirishcaca yacu shinami callpacun.

²⁵ Ñuca imatami manchani, chaillatacmi ñucataca japishca. Ñuca imatami manchani, chashnallatacmi tucushca.

²⁶ Alli, sumac causaita, samarinata mana charishcanichu. Ashtahuanpish yuyaita chingachic llaquicunami shamushca» nirca.