JOB 29 - Dios Rimashcata Quillcashcami

Job utcapi ima shina cashcata yuyarishcamanta

¹ Job cutin yuyarishpa rimashpaca:

² «¡Sarun quillacunapi Dios ñucata cuidacushcaman ñuca ima shina cashca punzhacunaman maijan cutichishpachari alli canman!

³ Paipac achic-huan ñucata achicyachicpimi, amsa cacpipish mana manchashpa, puric carcani.

⁴ Ñuca huambra cacpica, chashnami carca. Diosmi ñuca huasitaca bendiciacurca.

⁵ Tucuita ruhuac Dios ñucahuan cacpica, ñuca churicunapish ñuca ladopimi carca.

⁶ Lecheca yallitami tiyac carca. Aceiteca yacu shinami rumimanta llucshic carca.

⁷ Ñuca pueblo punguman ima ruhuashcacunata ricungapac ricpica, plazapimi tiyarinata allichiccuna carca.

⁸ Quipa huiñaicuna ñucata ricushpaca ladomanmi cuchuyaccuna carca. Yuyaccuna ricushpaca jatarishpami shayariccuna carca.

⁹ Mandaccunaca mana rimaricchu carca. Maquihuanmi shimita tapariccuna carca.

¹⁰ Jatun mandaccunapish paicunapac callu huataricpimi, upalla saquiriccuna carca.

¹¹ Pipish ñucamanta uyashpaca: “¡Allimi cangui!” nicmi carca. Ñucata ricuccunaca ñuca ima shina cashcatami huillaccuna carca.

¹² Yarcaihuan capariccunamanca ñucami cararcani. Taita mama illaccunataca ñucami ayudac carcani.

¹³ Ña huañugricucca paita ayudashcamantami ñucata bendiciarca. Viuda huarmi huacacucpipish cushichircanimi.

¹⁴ Ñucaca churanata churaric shinami cashcata ruhuashpa causarcani. Chaimi ñucataca pilluchirca. Ñucapac jahualla churana shinaca, allita ruhuanami carca.

¹⁵ Ñucaca ñahui mana ricucpacca ñahui shinami carcani. Suchupacca chaqui shinami carcani.

¹⁶ Imata mana chariccunapacca taita shinami carcani. Imata mana yachaccunamantaca ñucami rimac carca.

¹⁷ Millaicunataca jazhatami paquic carcani. Imata quichushca cacpica, quirumantami cacharichic carcani.

¹⁸ Ñuca shungupica: “Ñuca camallapitacmi huañusha. Ñuca causai punzhacunaca, tiyu shinami canga” yuyarcanimi.

¹⁹ Ñuca sapica yacu cuchupi tiyac yura shinami carca. Ramacunapica achca shulla tiyaric shinami carca.

²⁰ Ñucaca alli nishcami caticurcani. Ñuca maquihuanmi arcotaca sinchita charircani.

²¹ Ñuca rimashcacunatapish, cunashcacunatapish, upallami uyaccuna carca.

²² Ñuca rimacpica pi mana cutichicchu carca. Ñuca yuyaita cushcaca paicunapac yuyaipica allimi carca.

²³ Usyai quillacunapi, tamyata shuyac shinami, ñuca rimashcataca cushilla chasquiccuna carca.

²⁴ Paicunahuan ñuca asicpica, mana crircacunachu. Ñucaca jaicapi, mana llaquilla ñahuichu carcani.

²⁵ Paicunataca ñucami ima ruhuanapipish pushac carcani. Paicunahuanca pushac shinami tiyaric carcani. Soldadocunata mandac shinami paicunahuanca causarcani. Huacaccunatapish cushichicmi carcani.