JOB 28 - Dios Rimashcata Quillcashcami

Yachaita alli nishcamanta

¹ Cullquita maimanta llucchinaca tiyanmi, curita rupachishpa yacuyachinapish tiyanmi.

² Fierrotaca ñuto allpamanta, cobretaca rumita yacuyachishpami llucchin.

³ Runaca manchana amsatapish mana manchashpami ucuta allashpa mashcan. Manchana amsa ucupimi cobre rumitaca mashcan.

⁴ Paicuna causacushcamanta caruta rishpami jutcuta ruhuashpa mashcancuna. Pi mana purina shitashca pambacunapimi huascahuan huarcurishpa trabajancuna.

⁵ Allpapimi micunaca pucun. Allpa ucupica rupacuc ninami tiyan.

⁶ Chai ucu rumipica zafiromi tiyan. Ñuto allpapica curimi tiyan.

⁷ Chai ucutaca huairata ric alasyuc animalcunapish mana ricsinchu. Jatun angapish jaicapi mana ricushcachu.

⁸ Millai animalcunapish chaipica mana sarushcachu. Leonpish chaitaca mana purishcachu.

⁹ Paipac maquihuanmi jatun rumicunata huactarca. Urcucunatapish chaquimanta allashpami urmachirca.

¹⁰ Rumi quingraicunata paquishpami yacuta llucchirca. Chaipi tucui imalla tiyac sumaccunata paipac ñahuihuanmi ricurca.

¹¹ Yacu llucshina pushtutapish chaquichircami. Pacalla ima tiyaccunatapish achicmanmi llucchirca.

¹² ¿Ashtahuanpish alli yachaica maipishi tariringa? ¿Maipishi alli yuyaipish tiyan?

¹³ Chai mashna valishcataca runaca mana yachanchu. Cai pachapipish mana tiyanchu.

¹⁴ Jatun huaicupish: “Mana caipichu” ninmi. Mama cuchaca: “Caipipish mana canchu” ninmi.

¹⁵ Yachaitaca alli curihuanpish mana randipacchu. Pezashca cullquihuanpish mana randipacchu.

¹⁶ Yachaitaca Ofir llacta curihuanpish, sumac ónice, zafiro, rumihuanpish mana randipacchu can.

¹⁷ Curipish, achic nicuc diamantepish, yachaihuanca mana chimbapuraipacchu. Yachaitaca curimanta ruhuashca imacunahuanpish mana cambiaipacchu can.

¹⁸ ¡Chai yachaica coraltapish, perlastapish yalli valishcami! Alli yachaica achic nicuc rumitapish yallimi.

¹⁹ Yachaitaca Etiopía llacta topacio rumihuanpish mana chimbapuraipacchu. Ashtahuan sumac curihuanpish mana randipacchu.

²⁰ Shinashpaca, ¿maimantatac alli yachaica shamun? ¿Maipitac alli yuyaica tiyan?

²¹ Cai pachapi causaccunapac ñahuipica mana ricurinchu. Volashpa ric animalcunamantapish pacashcami can.

²² Abadonpish, huañuipish rimashpaca: “Pai mai alli cashcataca ñucanchic ringrihuanmi uyarcanchic” nincunami.

²³ Diosllami alli yachaiman rina ñantapish, maipi tiyacuctapish yachan.

²⁴ Paica cai pacha maicaman cashcata, tucui chaipi tiyaccunata jahua pachamanta ricuc cashcamantami yachan.

²⁵ Paimi huairatapish pezashpa, yacucunatapish medishpa churarca.

²⁶ Tamyatapish ima shina tamyachunmi mandarca. Relampacuna culun nishpa purichunpish ñanta ricuchircami.

²⁷ Pai punta alli ricushpami tucuita allichishpa tucuiman ricuchirca.

²⁸ Chaimantami runataca: “Alli yachaica Mandac Diosta manchanami. Alli yuyaica millaimanta anchurinami” ninmi» nirca.