JOB 27 - Dios Rimashcata Quillcashcami

Jobca millaicunataca llaquichingami nishcamanta

¹ Job rimashpa catishpaca:

² «Ñuca japina cashcata quichuc Diosca causacunmi. Ñuca almata llaquichic tucuita ruhuac Diosca ricucunmi.

³ ¡Ñucapi causaita cuc samaipish, Diospac samaipish tiyashcacamanca,

⁴ ñuca shimica mana ima millaita rimangachu! ¡Ñuca callupish mana llullangachu!

⁵ Cancunataca allitami nicunguichic ninaca ama chayashca cachun. Huañungacamanmi ima pandata mana rimasha.

⁶ Ñucaca cashcata ruhuanataca charirac shina manatac saquishachu. Ñuca causashcacamanca ñuca shungupica manatac cungarishachu.

⁷ Ñucata piñacca Diosta mana manchac runa shina, ñucata llaquichicca mana allita ruhuac runa shina cachun.

⁸ Chaica, ¿millaita ruhuac runa mashnata shuhuashca cacpipish Dios paipac causaita quichucpica, ima shuyanata charingachu?

⁹ ¿Paita jatun llaqui japicpi, Diosta mañashpa caparicpica uyangachu?

¹⁰ ¿Tucuita ruhuac Diosmantaca cushicuita charingachu? ¿Punzhanta Diosta mañai pudingachu?

¹¹ Diospac podermantaca ñucami cancunaman yachachisha. Tucuita ruhuac Dios imata ruhuagricushcataca mana pacashpami huillasha.

¹² Tucui cancunami chaitaca ricurcanguichic, ¿ima nishpatac yangata rimaricunguichic?

¹³ Diosta mana manchac runaca cai llaquicunatami Diosmantaca chasquinga. Millaita ruhuac runaca cai llaquicunatami tucuita ruhuac Diosmantaca japinga.

¹⁴ Paicunapac huahuacunaca espadapi huañungapacllami achcata miraringacuna. Chuchucuc huahuacunapish mana huicsa pactata micungachu.

¹⁵ Causaihuan saquiriccunataca huañuchic ungüimi tucuchinga. Viudacuna saquirishpapish paicunamantaca mana huacangachu.

¹⁶ Allpata shinami cullquita montonanga. Turuta shinami achca churanata ruhuanga.

¹⁷ Chashna tucuita allichicpipish, cashcata ruhuac runami chai churanataca churaringa. Mana juchayuc runami cullquitaca chaupinga.

¹⁸ Paipac huasica polilla huasichishca shinallami. Cuidac runa cuidangapac ruhuashca huasi shinallami.

¹⁹ Chayuc runaca sueñungapacmi siririn, riccharishpa ñahuita pascacpica imapish mana ricuringachu.

²⁰ Manchana yacu shinami jatun manchaica japinga. Manchaipac tamya huaira tuta shamushpami tucuchinga.

²¹ Jatun acapana huaira shamushpami pai tiyacushcamanta apanga. Inti llucshina ladomanta huaira shamushpami, jatarichishpa apanga.

²² Diospac podermanta pai miticusha nicucpipish, Diosca mana llaquishpami yalli llaquihuan paitaca llaquichinga.

²³ Maquita huactashpa cushicuc shinami huairaca llaquichinga. Silbashpa burlac shinami pai tiyacushcamanta apanga.