JOB 26 - Dios Rimashcata Quillcashcami

Diospac poderta Job huillashcamanta

¹ Shina nicpimi, Jobca Bildadtaca:

² «¿Imahuantac imatapish mana ruhuai pudic runataca ayudarcangui? ¿Ima shinatac fuerzata mana charic rigrataca ayudarcangui?

³ ¿Imatatac mana entendic runamanca yachachircangui? ¿Ima alli yachaitatac ricuchircangui?

⁴ ¿Pi ayudacpitac cai shimicunataca huillarcangui? ¿Pipactac canmanta llucshicuc samaica?

⁵ Huañushcacunaca allpa ucupimi chucchucun. Mama cucha yacupish, chaipi tiyaccunapish chucchunmi.

⁶ Diospac ñaupapica Seolpish pascashcami. Abadonpish imahuan mana jarcashcachu can.

⁷ Paica jahua pachatapish airepimi churarca. Cai pachatapish, imahuan mana churachishpami charicun.

⁸ Yacutaca puyuhuanmi pillurca. Chashna pillushca cashpapish, puyuca mana lliquirinchu.

⁹ Paipac jatun tiyarinataca Paimi sumacta charicun. Chai jahuataca puyuhuanmi quillparca.

¹⁰ Paimi achic-huan, amsahuan tucuringacaman, maicaman yacu tiyanatapish linderota churarca.

¹¹ Pai rimashcata uyashpaca jahua pachata charic pilarcunapish chucchunmi.

¹² Paipac poderhuanmi mama cuchatapish cuyuchin. Paica jatun yachac cashpami mama cuchapi cac Rahabtaca llaquichin.

¹³ Paipac samaihuan pucushpami jahua pachataca achicta ruhuarca. Paipac maquihuanmi callpac culebratapish huañuchirca.

¹⁴ Cai ruhuashcacunaca callari ruhuaicunallami. ¡Paimantaca asha ashallatami uyanchic! Paipac jatun podertaca ¿pitac alli yachai pudinga?» nirca.