JOB 24 - Dios Rimashcata Quillcashcami

¹ Tucuita ruhuac Diospacca huatacunapish mana pacallachu can. ¿Ima nishpatac paita ricsinchicmi niccunaca paipac punzhataca mana ricuncuna?

² Maijancunaca linderocunatami anchuchin. Huagracunatapish shuhuashpami michincuna.

³ Taita mama illaccunapac burrotapish apancunami. Viuda huarmipac huagratapish, prendashpami quichuncuna.

⁴ Imatapish mana chariccunataca ñanmantami callpachincuna. Cai pachapi causac huacchacunaca paicunata manchashpami miticuncuna.

⁵ Huacchacunaca, sacha burrocuna shitashca pambaman llucshic shinami micunata mashcashpa rincuna. Shitashca pambapimi, paipac huahuacunamanca micunata tarincuna.

⁶ Shucpac allpacunamantami micunata tandachincuna. Diosta mana manchaccunapac uvas chagramantami pallancuna.

⁷ Churana illaccunataca lluchullatami sueñuchincuna. Chirihuan cacpipish, mana catachincunachu.

⁸ Urcucunapimi tamyahuan jucuncuna. Rumi quingraicunapimi miticuncuna.

⁹ Taita illac huahuacunatapish chuchumantami quichuncuna. Huacchacunatapish prendashpami japincuna.

¹⁰ Huacchacunataca, churana illactami purichincuna. Yarcaihuan caccunamantaca trigo gavillatami quichuncuna.

¹¹ Paicunapac pirca ucullapimi aceiteta capincuna. Uvasta sarucushpapish yacunayaihuanmi huañucuncuna.

¹² Ña huañugricuccunaca pueblopimi caparishpa huacancuna. Ashtahuanpish Diosca paicuna mañashcataca mana uyanchu.

¹³ Paicunaca achicta piñaccunami. Achicpica mana causancunachu, Dios munashca shina causanatapish mana ricsincuna.

¹⁴ Huañuchic runaca, achic punzhami huacchacunata, imata mana chariccunata huañuchingapac jatarin. Tutaca shuhuacmi tucun.

¹⁵ Huainayashpa causaccunaca tutayacta shuyashpami: “Pi mana ricungachu” yuyashpa, ñahuita tapashpa llucshin.

¹⁶ Shuhuacca tutayacpimi shuhuangapac huasipi yaicun. Punzhaca ucupimi huichcarin. Achictaca mana munanchu.

¹⁷ Paicunamanca achic punzhaca pura tuta shinami. Paicunata pi ricsinataca, huañuchic amsata shinami manchancuna.

¹⁸ Jatun yacupi puscu callpac shinami miticuncuna. Paicuna charishca allpacunapish mana alli nishcami canga. Paicunapac uvas chagrapica pi mana puringacunachu.

¹⁹ Usyai, rupai rasuta yacuyachic shinami, juchayuc runataca Seolpi chingachinga.

²⁰ Paicunataca mamapish cungaringami. Curucunami paitaca mishquilliringa. Jaicapi mana yuyaringacunachu. Pitishca yura shinami mana cazuccunaca tucuringa.

²¹ Huahuata mana chari pudic huarmitami llaquichircacuna. Viuda huarmimanpish, jaicapi ima allita mana ruhuarcacunachu.

²² Sinchi tucushcacunataca imatapish ruhuac Diosmi chingachinga. Paicuna jatarishpapish mana causai pudingachu.

²³ Diosca paicunamanca, imatapish mana manchashpa, paipi shunguta churana yuyaitami cun. Shina cashpapish, paicuna purishcataca ricuracunmi.

²⁴ Asha punzhallatami jatun tucushca cancuna, ashtahuanpish utcami chingarincuna. Paicunata cumurichishcaca pitishca quihua anguyac shinami. Cebada umata pitishca shinami tucuncuna.

²⁵ ¿Pitac mana chashnachu ni pudingayari? ¿Pitac ñucataca llullacunguimi ni pudingayari? ¿Pitac ñuca rimashcacunataca yangallami ni pudingayari?» nirca.