JOB 23 - Dios Rimashcata Quillcashcami

Job Diosman imata ruhuashcata huillashcamanta

¹ Jobca:

² «Cunanpish llaquihuanmi rimasha, ñuca llagacunaca, ñuca huacaitapish yallimi nanacun.

³ ¡Dios maipi cashcata yachashpaca pai maipi tiyacuc pushtumanmi riman!

⁴ Paipac ñaupapimi ñuca ima tucushcata huillaiman. Ñuca shimihuanmi imatapish niman.

⁵ Pai imata nishcatami uyaiman, Pai imata nishcatami entendiman.

⁶ ¿Ñucahuanca sinchitachu rimanman? Mana, chaipac randica uyanmanllami.

⁷ Cashcata ruhuac runaca chaipimi paiman parlanga. Ñucaca, ñuca juezpac ñaupamantaca mana juchanchishcachu llucshiman.

⁸ Inti llucshina ladoman rishpapish, paitaca mana tarishachu. Inti tigrana ladoman rishpapish, paihuanca mana tupashachu.

⁹ Pai imata ruhuac cashcata jahuaman ricuchicpipish mana ricushachu. Ura ladoman ricpipish, mana yachashachu.

¹⁰ Ashtahuanpish paica, ñuca maita puricpipish tucuimi ricun. Pai ñucata ima shina cashcata ricushpa llaquichicpica, curi shinami ricurisha.

¹¹ Ñuca chaquicunaca, pai sarushcatami catirca. Paipac ñanmanta mana anchurishpami paillatac catircani.

¹² Paipac shimihuan mandashcamantaca mana anchurircanichu. Paipac rimashca shimicunataca micunata yallimi huacaichishpa causarcani.

¹³ Ashtahuanpish pai imata ruhuasha nishcataca, ¿pitac shuctacyachingayari? Paillami imatapish ruhuan.

¹⁴ Pai ñucata imata ruhuasha nishcataca ruhuangatacmi. Tucui pai imata ruhuasha nicushcatami pactachinga.

¹⁵ Chaimantami paipac ñaupapica ñucaca yallita mancharini. Pai ima shina cacta yuyarishpaca yallitami chucchuni.

¹⁶ Diosmi ñuca shungupica manchaita churarca. Tucuita ruhuac Diosmi ñucataca manchachishpa charicun.

¹⁷ ¿Ima nishpatac manchana amsallapitac mana huañurcani? ¿Ima nishpatac chai manchana amsaca ñuca ñahuita mana quillparcayari?