JOB 22 - Dios Rimashcata Quillcashcami

Elifaz Jobta juchanchishcamanta

¹ Temanitapuramanta Elifazca:

² «¿Runaca Diospacca ima allipac valingachu? ¿Jatun yachac cashpapish Diosmanca allita ruhuai pudingachu?

³ Can cashcata ruhuac cashcamantaca, ¿tucuita ruhuac Diosca cushicungachu? Can ima pandata mana ruhuac cashcamantaca, ¿ima allita japingachu?

⁴ ¿Can allita caticushcamantachu rimashpa taripacun yuyanguichu?

⁵ Ashtahuanpish can millaita ruhuashcacunaca yallita achcami. Can mana allita ruhuashcacunaca mana tucuripacmi.

⁶ Cambac huauquicunamantaca yangami prendata japircangui. Churanata mana chariccunamantaca churanatami quichurcangui.

⁷ Shaicushca runamanpish mana yacuta curcanguichu. Yarcachicucpipish mana micunata cararcanguichu.

⁸ Achcata charic runalla, allpatami japircangui. Alli nishca runalla, chaipimi causarcangui.

⁹ Viuda huarmimanpish imata mana cushpami chushaclla maquita cacharcangui. Taita mama illac huahuacunatapish llaquichircanguimi.

¹⁰ Chaimantami cambac muyundipi llaquichiccunaca tiyan. Cungailla llaquicuna japishpami manchachinga.

¹¹ Yallita amsa cacpimi, mana ricui pudingui. Achca yacumi cantaca aguachicun.

¹² Diosca jahua pachamanta ashtahuan jahua pachapimi tiyacun. Lucerocunapish paimanta urapimi cancuna. Chaitaca ricuiyari.

¹³ Shina cacpipish canca: “¿Diosca imatatac yachanyari? Yallita amsapica, ¿ima shinatac taripangayari?

¹⁴ Jahua pachapi caiman chaiman puricushpapish, Puyu tapashca cacpica, mana ricungachu” ninguimi.

¹⁵ ¿Millaita ruhuac runa purishca ñanllatatacchu canpish purisha ningui?

¹⁶ Paicunaca manarac huañuna punzha chayacpimi huañurcacuna. Jatun yacu apashca shinami tucurirca.

¹⁷ Paicunaca Diostaca: “Ñucanchicmanta anchuri” nicmi carca. Tucuita ruhuac Diosca ñucanchicmantaca, ¿Imatatac ruhuai pudinga? nircami.

¹⁸ ¡Achca charinacunatami paicunapac huasipi jundachirca. Shina cacpipish, ñucaca mana paicuna shina yuyarisha ninichu!

¹⁹ Cashcata ruhuaccunaca chaita ricushpami cushicunga. Mana faltayuc runacunaca:

²⁰ “Ñucanchicta piñaccunataca tucuchishcami. Paicuna ima charishcacunataca ninami tucuchishca” nishpami asingacuna.

²¹ Cunanca Dios-huan alli tucuiyari. Sumac causaitami charingui. Chaimantaca allicunatami japingui.

²² Cunanca paipac shimihuan mandashcata uyaiyari. Paipac shimicunata cambac shungupi huacaichiyari.

²³ Tucuita ruhuac Diosman cutirishpaca cutinllatacmi sinchiyangui. Cambac huasimantapish millaitaca tucuimi anchuchingui.

²⁴ Curitami allpata yalli charingui Ofir llactamanta curitaca, yacu huaicu rumita shinami charingui,

²⁵ tucuita ruhuac Diosmi cambac curi shinaca, cullquitaca achcatami charingui.

²⁶ Tucuita ruhuac Dios-huanmi cushicungui. Cambac ñahuihuanmi Diosta huichailla ricungui.

²⁷ Can paita mañacpica uyangami. Canpish paiman imata cusha nishcataca pactachinguimi.

²⁸ Can imata munashcapish pactangami. Can purina ñanpipish luzmi achicyachinga.

²⁹ Jatun tucushcacunaca, pingaichishcami canga. Yangalla caccunataca Diosmi jatunyachinga.

³⁰ Millaita mana ruhuac runataca Paimi quishpichinga. Cambac maquihuan ima millaita mana ruhuashcamantami cantaca quishpichinga» nirca.