JOB 21 - Dios Rimashcata Quillcashcami

Job millaita ruhuaccunami allita causan nishcamanta

¹ Chaimantami Jobca:

² «Ñucata cushichingapac ñuca rimashcata alli uyaichic.

³ Quipata burlashpa asingapacpish ñuca rimashcata sumacta uyaichic.

⁴ ¿Ñucaca runamanchu aij nishpa huillacuni? ¿Ima nishpatac ñuca shungupica mana llaquirisha?

⁵ Ñucata ricushpa mancharishpa saquirichicyari. Shimita maquihuan tapaichicyari.

⁶ Chaicunata yuyarishpaca ñucallatacmi yallita mancharini. Chaita yuyarishpami ñuca cuerpopish chucchuita charini.

⁷ ¿Ima nishpatac Diosta mana manchaccunaca yuyaccaman causashpa ashtahuan charicyancuna?

⁸ Paicunapac huahua huahuacunapish paipac ñaupapimi sinchita huiñacun. Paipac nietocunapish paipac ladopimi causacun.

⁹ Paipac huasipi causaccunaca imatapish mana manchashpami causancuna. Paicunataca Diospish mana llaquichinchu.

¹⁰ Paipac torocunapish, churiyuc torocunami. Vacacunaca mana shullushpami huachan.

¹¹ Paipac uchilla huahuacunapish ovejacuna shinami callpacuncuna. Paipac churicunaca jahuata saltashpami purincuna.

¹² Paicunaca tamborapi, arpapi tocashpami cantancuna. Flautapi tocashpami cushicuncuna.

¹³ Tucui punzhacuna cushilla causashpami huañushpapish sumacta Seolman urai rincuna.

¹⁴ Chashna causashpami Diostaca: “¡Ñucanchicpac ñaupamanta anchuri! Can imata ruhuachun nishcacunataca mana yachacushun ninchicchu.

¹⁵ Servingapacca, ¿pitac tucuita ruhuac Diosca? ¿Paita mañashpaca imatatac japishun?” nincuna.

¹⁶ Riquichic, Dios cushca allicunaca mana paicunapac maquipichu. ¡Amatapish ñucaca paicuna shina yuyaricusha!

¹⁷ ¿Mashna cutinta Diosta mana manchaccunapac lamparataca huañuchishca? ¿Mana cashpaca paicunataca llaquicuna japishcachu? ¿Mana cashpaca Dios nina japiric shina piñarishpa tucuchishcachu?

¹⁸ Paicunaca huaira apanalla ucsha shina, mana cashpaca jatun huaira apanalla tamo shinami.

¹⁹ Diosca taitacunapac juchamantaca churicunatami llaquichingapac charicun nincunami. ¡Juchata ruhuacllatacmi llaquita apana can! ¡Chashna ruhuacpimi yuyaita japinga!

²⁰ ¡Paipac ñahuillahuantacmi paipac llaquitaca ricunga! Tucuita ruhuac Dios yallita piñarishcataca ubiac shinami chasquinga.

²¹ Paipac causanaca asha quillacunallami tiyan. Pai huañushca quipa paipac familia ima tucunataca ¿imatac yachangayari?

²² Diosca jahua pachapi causaccunata taripacmi. Shina cacpica, ¿pitac paitaca yachachi pudingayari?

²³ Shuc runa sinchirac cashpapish, sumacta causacushpapish, cushilla causacushpapish,

²⁴ huira runa cashpapish paipac tullucuna ñutcu junda cashpapish huañungami.

²⁵ Caishucca mana cushilla causashpa, causaipi mana cushicushpami huañunga.

²⁶ Shina cashpapish ishcaitacmi allpaman rin. Ishcaipitacmi curucunapish jundan.

²⁷ Ñucaca cancuna ima yuyacushcata, ñucata piñashpa, juchanchigricushcatapish yachanimi.

²⁸ Cancunaca: “¿Mandacpac mandana huasica maipitac? ¿Diosta mana manchaccunapac huasicunaca maipitac?” ninguichicmi.

²⁹ Cancunaca ñanta pasaccunataca, ¿manachu tapushcanguichic? Paicuna cutichishpa:

³⁰ ‘Millaita ruhuac runaca llaqui punzhapica mana ima tucungachu. Dios piñaric punzhaca huacaichishcami canga’ nishcataca, ¿manachu yuyaringuichic?

³¹ ¿Pitac pai mana allita ruhuashcataca ñahuipi ricuchingayari? ¿Pitac pai imata ruhuashcamantaca japina cashcata cungayari?

³² Paitaca enterrana jutcumanmi apanga. Chai allpa montón jahuapimi cuidanga.

³³ Pai samarina pugru pambaca mishquillami ashnacunga. Chai huañushcata huandushpa ricpica, achca gentecunami huashatapish, ñaupatapish ringacuna.

³⁴ ¿Ima shinatac cancunaca yangalla rimashcacunahuanca cushichinguichicyari?» nirca.