JOB 20 - Dios Rimashcata Quillcashcami

Zofar mana allita ruhuaccunata llaquichinata huillashcamanta

¹ Naamatitapuramanta Zofarca:

² «Ñuca shungupi tiyashca yuyaicuna nanachicpimi utca rimanata munani.

³ Ñucata mana alli nishpa rimashcatami uyashcani. Chaimantami ñucapac yuyaicunallatac ñucataca rimachinga.

⁴ Cai pachapi runata churashcamanta pacha chashna cashcata, ¿Manachu yachangui?

⁵ Mana allita ruhuaccunapac cushicuica utcami tucurin, Diosta mana manchac runapac cushicuipish ashacamallami can.

⁶ Jahua pachaman chayacta jatun tucushca cashpapish, paipac umahuan puyupi tupacushpapish,

⁷ pai huanurishca mapa shinami huiñaita chingaringa. Chaita ricushpaca: “¿Paica imatac tucushca?” ningami.

⁸ Muscushca shinallami tucuringa. Paitaca mana taringachu. Muscuipi ricushca shinallami chingaringa.

⁹ Paita ricuccunapish mana ashtahuan ricungachu. Pai maipi cashcata ricuccunapish cutinca mana ricungachu.

¹⁰ Paipac huahuacunaca huacchacunamanmi mañangacuna. Paipac maquillahuantacmi pai imata shuhuashcata cutichinga.

¹¹ Paipac tullucuna sinchirac cashpapish, paillahuantacmi ñuto allpapi samaringa.

¹² Mana allita shimipi mishquilliricucpipish, callu ucupi pacashpa charicucpipish,

¹³ allimi nishpa mana shitashpa, paipac shimi ucullapi charicucpipish,

¹⁴ chai micunaca huicsa ucupimi shuctacyanga. Chashna jayacyashpami huicsapica culebrapac veneno shina tucunga.

¹⁵ Pai charishcacunata micushca cashpapish arcadangami. Paipac huicsa ucumantami Diosca llucchinga.

¹⁶ Culebrapac venenotami sunganga. Culebrapac callumi huañuchinga.

¹⁷ Yacu callpac shina bunga mishquitapish, lechetapish mana ricungachu.

¹⁸ Tucui pai trabajashcamanta japishcataca mana micushpami cutichinga. Chaihuanca mana jatun tucushpa cushicungachu.

¹⁹ Chaica, huacchacunata llaquichishpa, imata charishcacunata quichushpa, mana huasiyuc cashpapish, quichushpami huasiyuc tucushca.

²⁰ Paica jaicapi mana sacsangachu. Pai imata munashcataca manatac atichingachu.

²¹ Pai mana micushcaca imapish mana tiyarcachu. Chaimantami pai imalla charishcacunaca mana unaicaman canga.

²² Achcata charishpapish llaquihuanmi causanga. Millaicuna shamushpami tucui quichunga.

²³ Huicsa pactata micugricucpimi, Diosca nina japiric shina piñarishpa, paipac jahuapipish, paipac micuna jahuapipish tamyachinga.

²⁴ Fierrohuan huañuchigricucpi, miticushpa ricucpica, bronce arcohuan shitashpami chugrichinga.

²⁵ Paipac cuerpo huashamanmi flechaca llucshinga. Jagan nicun flechami paipac hieltaca chaupishpa pasanga. Jatun manchaimi paitaca japinga.

²⁶ Paipac charishcacunata tucuchingapacca manchana amsami huacaichishca tiyacun. Manapish pucuna ninami paitapish, paipac huasipi tiyaccunatapish tucuchinga.

²⁷ Pai millaita ruhuashcataca jahua pachami ricuchinga. Paita llaquichingapacca cai pachami jataringa.

²⁸ Paipac huasipi tiyaccunataca Dios yallita piñarishca punzhami tucuita tucuchinga.

²⁹ Chaitami Diosca paita mana manchaccunamanca allichishpa charicun. Diosca paipac shimihuanmi runa japinataca cusha nishca» nirca.