JOB 2 - Dios Rimashcata Quillcashcami

Satanás Jobta ungüihuan llaquichishcamanta

¹ Shuc punzhami Diospac huahuacunaca Mandac Diospac ñaupapi ricuringapac shamurcacuna. Shina shamucpimi, Satanaspish Mandac Diospac ñaupapi ricuringapac shamurca.

² Chaipimi Mandac Diosca Satanastaca: —¿Maimantatac shamungui?— nirca. Shina nicpi, Satanasca Mandac Diostaca: —Cai pachata ricushpa, muyushpami shamuni— nirca.

³ Shina nicpi, Mandac Diosca Satanastaca: —Ñucata servic Jobca cashcata ruhuac, pi mana juchanchipac, Diostapish manchac, millaita ruhuanamanta anchurishca runa cashcataca, ¿manachu ricushcangui? Cai pachapica pai shinaca pipish mana tiyanchu. Shina causacucpipish llaquichingapac cui nircanguimi. Shina cucpipish, paica cunancamanca ima mana allita manarac ruhuanchu— nirca.

⁴ Shina nicpi, Satanasca Mandac Diostaca: —¡Maijan paita mana imata ruhuacpica, cushillami can! Runaca paipac causaimantaca pai tucui charishcatami cunga.

⁵ Ashtahuanpish cunanca cambac maquihuan paipac tullupipish, aichapipish ungüita churai. Shina ruhuacpica, cantaca cambac ñaupallapitacmi mana alli nishpa rimanga— nirca.

⁶ Shina nicpi, Mandac Diosca Satanastaca: —Riqui, paica cambac maquipimi. Shina cacpipish paipac causaipica ama tuparinguichu— nirca.

⁷ Shina nicpimi, Satanasca Mandac Diospac ñaupamanta rishpa, Jobtaca chaquimanta uma coronacaman jatun sisu ungüihuan llaquichirca.

⁸ Shina ruhuacpimi, Jobca uchupapi tiyarishpa, callana paquishcahuan aspiricurcalla.

⁹ Chashna cacpimi, paipac huarmica: —¿Cunancamanchu Diosta cazushpa catingui? ¡Diosta mana alli nishpa rimashpa huañui!— nirca.

¹⁰ Shina nicpimi Jobca: —¡Canca maijan yuyai illac huarmi shinami rimaringui! Diosmantami allicunata japishcanchic. ¿Manachu ima llaquicunatapish japina canchic?— nirca. Chai tucui llaquicuna japicpipish, Jobca paipac shimihuan millaita rimashpaca mana juchallircachu.

Jobta paipac ricsishcacuna ricugrishcamanta

¹¹ Jobpac quimsa ricsishcacunami chai tucui llaquita apacun nicta uyashpa, paicunapac llactamanta shamurca. Paicunamanta shucca temanitapuramanta Elifazmi carca. Caishucca suhitapuramanta Bildadmi carca. Chaishucca namatitapuramanta Zofarmi carca. Paicunaca Jobta llaquinacushpa cushichingapacmi quimsa tucushpa shamunata yuyarircacuna.

¹² Chai runacunaca carumanta ricushpaca mana ricsircacunachu. Chaimantami yallita caparishpa huacarcacuna. Paicunapac jahualla churanatapish lliquishpami, quimsata paicunapac umapi allpata shitarircacuna.

¹³ Chashna jatun nanaihuan tiyacucta ricushpami, paicunaca imata mana rimarishpa, canchis punzhata, canchis tutata paipac ladopi tiyacurcacunalla.