JOB 19 - Dios Rimashcata Quillcashcami

Job Diospi shunguta churashcamanta

¹ Chaimantami Jobca:

² «¿Ima horascamantac ñuca almata llaquichishpa cancunapac shimicunahuan ñutuchic shina rimacugringuichic?

³ Ñucataca chunga cutinmi rimaringuichic. Ñucata mana alli nishpa rimarinataca, ¿manachu pinganayan?

⁴ Ñuca mana allita ruhuashpa pandarishca cacpipish, ñucami llaquichishca casha.

⁵ Ashtahuanpish cancunaca jatun tucushpami rimanguichic. Ñucata piñashpami rimaringuichic.

⁶ Diosllatac ñucata llaquichishpa, paipac linchipi japishcataca yachanami canguichic.

⁷ Ñucaca: “¡Ñucata llaquichincunami!” nishpa, caparicpipish mana uyanchu. Ayudaiyari nishpa caparicucpipish, mana pi cashcata ruhuanchu.

⁸ Diosca ñuca ama pasachunmi ñuca purina ñantapish jarcashca. Ñuca purina ñancunatapish manchana amsatami ruhuashca.

⁹ Ñuca alli canatapish quichushcami. Ñuca umamanta coronatapish anchuchishcami.

¹⁰ Tucui ladocunamanta llaquichishpami huañuchigrin. Ñuca shuyacushcataca yurata pitic shinami anchuchirca.

¹¹ Pai piñarishpaca, nina japiric shinami llaquichirca. Paita piñaccunata shinami ñucataca ruhuarca.

¹² Paipac soldadocunami, shuc shamuita shamushpa ñucata japircacuna. Ñuca huasi muyundipimi carpacunata shayachishpa tiyarircacuna.

¹³ Ñuca huauquicunatapish ñucamanta caruyachircami. Ñuca ricsishcacunatapish, ñucapac ñaupamanta anchuchircami.

¹⁴ Ñuca familiacunapish mana ricuc shamunchu. Ñucata ricsiccunapish cungarincunami.

¹⁵ Ñuca huasipi causaccunapish, ñucata servic huarmicunapish shuctac llacta runata shinami ricuncuna. Paicunapac ñahuipica carumanta shamushca runa shinami carcani.

¹⁶ Ñuca servicta cayacpipish mana uyanchu. Ñuca shimihuanmi paitaca rogani.

¹⁷ Ñuca huarmipish ñuca samaita millanayachinmi. Ñucamanta tiyashca huahuacunapacpish millanami cani.

¹⁸ Huahuacunapish ñucataca mana ricunayachinchu. Ñuca jataricpipish piñashpami rimancuna.

¹⁹ Ñucahuan yallita apanacuccunapish piñarcami. Ñuca cuyashca gentecunapish llaquichircami.

²⁰ Ñuca aicha carapish tullupimi llutarirca. Quiru siquipi tiyac aichallami saquirishca.

²¹ ¡Ñuca ricsishcacunalla ñucata cuyaichicyari! ¡Ñucata cuyaichicyari! Diospac maquimi ñucapi tuparishca.

²² ¿Ima nishpatac Dios llaquichic shinallatac ñucataca llaquichinguichic? Cancunaca ñuca aichata tucuchic shina llaquichicushpapish, ¿manachu amiringuichic?

²³ ¡Cunanca ñuca rimashcacunata maijanpish quillcashpachari alli canman! ¡Chai shimicunata shuc libropi quillcashpachari alli canman!

²⁴ ¡Fierro cincelhuan, plomadahuan sinchi rumipi huiñaipac quillcashpachari alli canman!

²⁵ Ñucata quishpichic Dios causacushcataca yachanimi. Ñuto allpamanta jatarina cashcatapish yachanimi.

²⁶ ¡Ñuca aicha ismushpa chingaricpipish, Diostaca ñucallatacmi ricusha!

²⁷ ¡Paitaca ñucallatami ricusha! Ñuca shungu ucupi llaquihuan huañucushpapish, ñuca ñahuihuantacmi ricusha. Pi shucca mana ricungachu.

²⁸ Ashtahuanpish cancunaca: “¿Ima nishpatac paitaca llaquichishpa catinchicyari?” Mana allita ruhuashcaca paillapitacmi sapi shina tiyacun ninguichicmi.

²⁹ Ashtahuanpish espadata manchaichic. Cashcata mana ruhuashcamantami, cancunata llaquichingapac, piñarishpa espadahuan shamucun. Taripana tiyashcata yachachunmi chashna tucunga» nirca.