JOB 18 - Dios Rimashcata Quillcashcami

Bildad cutinllatac rimashcamanta

¹ Suhitapuramanta Bildadca:

² «¿Ima horascamantac rimarinata saquigringui? Yuyaita alli japi. Chai quipaca parlanacushunllami.

³ ¿Ima nishpatac ñucanchictaca animal shina cashcata yuyangui? ¿Ima nishpatac ñucanchictaca yuyai illac cashcata yuyangui?

⁴ ¡Yallita piñarishpa tucuricuc runalla! ¿Canllamantachu llactaca shitashca saquiringa? ¿Rumi quingraicunapish tiyacushca pushtumantaca cuyuchishcachu canga?

⁵ Diosta mana manchaccunapac achicyachic lamparaca huañuchishcami canga. Chai ninapish ashtahuan llamataca mana cungachu.

⁶ Achicyachicpish paicunapac huasipica amsayangami. Paicunapi cac lamparapish huañungami.

⁷ Sinchita puric cashpapish allimantami puringa. Paitaca, pai imata yuyacushcallatacmi urmachinga.

⁸ Paipac chaquillatacmi tucllapi urmachinga. Chai tucllapimi churarishpa saquiringa.

⁹ Shuc huascami paipac chaquipi churarishpa urmachinga. Paita japingapacca tucllatami churanga.

¹⁰ Paita urmachingapacmi huascaca pambapi pacalla tiyacun. Paita japina tucllapish pai purina pushtupimi tiyacun.

¹¹ Tucui ladomantami llaquicuna shamushpa manchachinga. Chaqui talonpi saruc shinami yallita manchachishpa catinga.

¹² Yarcaihuanmi paipac fuerzata tucuchinga. Paipac ladollapitacmi llaquicunaca allichishca tiyacun.

¹³ Ungüica huañuipac cuchullapimi. Jahualla carata ismuchishpami, paipac cuerpotaca micushpa tucuchinga.

¹⁴ Paipac huasipi mana manchashpa sumacta causacucpipish, chaimanta llucshishpami, yallita manchachic jatun mandaccunapacman apashca canga.

¹⁵ Paipac huasipica, mana paipac huasipi shinami causanga. Paipac huasi jahuapica azufremi shic-huashca canga.

¹⁶ Allpa ucupi sapicuna chaquic shinami, jahuamanca ramacuna pitic shinami canga.

¹⁷ Paica cai pachapica chingarishcami canga. Paipac shutipish cai llactapica cungarishcami canga.

¹⁸ Achicyachicmanta llucchishpa, amsapi shitashcami canga. Cai pachamantapish llucchishpa, cachashcami canga.

¹⁹ Paipac aillupurapica, churicunatapish, nietocunatapish mana charingachu. Pipish paipac huasipica mana causangachu.

²⁰ Inti tigrana ladomanta shamuccunaca pai ima tucushcata yachashpami mancharinga. Inti llucshina ladomanta shamuccunapish yallita manchaihuanmi saquiringa.

²¹ Diosta mana manchaccunapac causana huasica chashnami canga. Diosta mana ricsic runapish shinallatacmi tucunga» nirca.