JOB 17 - Dios Rimashcata Quillcashcami

¹ Ñuca samaica tucuricunmi. Ñuca causai punzhacunapish tucurimunmi. Ñucata enterrarina jutcupish shuyacunmi.

² Ñucata asiccunallami muyushpa shayacuncuna. Ñuca ñahuica paicuna llaquichishcallatacmi ricucun.

³ Sumac Dioslla, ñucapac randi shayariyari. ¿Can ñucamanta mana shayaricpica, pitac shayaringayari?

⁴ Canmi paicuna ama entendichun yuyaicunatapish anchuchishcangui. Chashnami paicunataca yangallata ruhuashcangui.

⁵ Maijanpish imata japishpa paicunapac ricsishcacunata llaquichichun huillacca paicunapac huahuacuna huañuctami ricunga.

⁶ Paimi ñucataca yuyaita japina rimaicunahuan tucuipac rimanata ruhuashca. Ñucataca tucuimi ñahuipi tucancuna.

⁷ Ñuca ñahuicunaca yallita llaquihuan cashpami amsayashca. Tucui ñuca cuerpoca llandu shinallami.

⁸ Chaita ricushpami allita ruhuaccunaca mancharinga. Mana juchayuc runaca Diosta mana manchac runatami llaquichingapac jataringa.

⁹ Ashtahuanpish cashcata ruhuac runaca, cashcata ruhuashpa caticungallami. Ima mana allita ruhuac chuya maqui runaca ashtahuanmi sinchi tucunga.

¹⁰ Ashtahuanpish cunanca tucui cancuna cutimuichiclla. Cancunapurapi yuyaisapa runataca mana tarishachu.

¹¹ Ñuca causai punzhacunapish tucurishcami. Ñuca imata yuyacushcapish chingarishcami. ¡Ñuca shungupi imata munashcapish anchurishcami!

¹² Paicunami tutataca punzhata ruhuarca. Chairac tuta cacpiracmi achicca ñami chayamun nincuna.

¹³ Ñucaca Seoltami ñuca huasita shina shuyacuni. Amsa purapimi ñuca camata ruhuasha.

¹⁴ Ñuca ismushpa tucurinataca: “Canca ñuca taitami cangui” nini. Curucunataca: “Ñuca mama, ñuca panicunami canguichic” nini.

¹⁵ Cunanca ñuca shuyanaca, ¿maipitacyari? Ñuca shuyacushcataca, ¿pitac ricungayari?

¹⁶ Seol ucumanmi ñucahuan ringa. Ñuto allpapimi tandanacushpa samarishun» nirca.