JOB 16 - Dios Rimashcata Quillcashcami

Job Elifaz rimashcata cutichishcamanta

¹ Jobca:

² «Cashna nishcataca achca cutinmi uyashcani. Cancunaca cushichinapac randica llaquichicunguichicmi.

³ Yuyai illac shina rimashcacunaca ¿manachu tucurin? Cutichishpa catingapacca ¿pitac cantaca rimachicun?

⁴ Ñuca shina cancuna cacpica, ñucapish cancuna shina imatapish nimanllami. Ñucapish umata cuyuchishpa, cancunata piñachishpa rimaimanllami.

⁵ Ashtahuanpish ñuca rimashpaca cushichimanmi. Ñuca rimashca cushichishpami cancunapac nanaita samachiman.

⁶ Ñuca rimacpica, ñuca nanaica mana tucuringachu. Upalla cacpipish mana anchuringachu.

⁷ Diosmi ñucataca yallita shaicuchishca. Tucui ñuca ricsishcacunatami caruyachishca.

⁸ Ñuca cuerpotami muruyachishca. Ñuca irquiyashcataca ñuca ñahuillatacmi ricuchicun. Chaimantami ñuca cuerpoca tullulla saquirishca.

⁹ Pai yallita piñarishpami ñucataca pitinacuc shina ruhuashca. Quirucunapish canirishpami ñucataca piñarca. Ñucata piñac runaca nanachic shinami ricucurca.

¹⁰ Ñucata piñashpami rimarircacuna. Ñucata rimashpa llaquichishpami chulla lado ñahuipi huactashpa chugrichircacuna. Ñucata piñashpami tucui mashna tandanacurca.

¹¹ Diosca llullac runacunapac maquipimi churashca. Paita mana manchaccunapac maquipi urmachunmi saquishca.

¹² Ñuca sumacta causacucpimi, ñutuchic shina saquirca. Cungamanta japishpami pitinacuc shina ruhuarca. Lanzahuan shitangapac ricuchic shinatami ruhuarca.

¹³ Paipac flechata shitac runacunami ñucataca muyushpa shayarircacuna. Mana llaquishpami ñuca riñoncunatapish pasachinacushca. Chashna ruhuacpimi ñuca hielpish pambapi tallirirca.

¹⁴ Ñucataca catipi catipimi llaquichirca. Sinchita macanacuc runa catic shinami llaquichirca.

¹⁵ Sharpa churanataca llutac shinami ñuca cuerpopi churarircani. Ñuca umataca ñuto allpapimi pambarcani.

¹⁶ Ñuca yallita huacacpimi ñahuica punguillishca. Ñuca ñahuipish amsayashpa ña mana ricunchu.

¹⁷ Chashnami ñuca maquihuan, ima mana allita ruhuashca cashpapish, alli shunguhuan paita mañac cashpapish, cashna llaquihuan causacuni.

¹⁸ ¡Allpalla, ñuca yahuartaca ama tapaichu! ¡Can tapacpica, ñuca caparinapish illangami!

¹⁹ Ñucamanta huillacpish, ñucamanta rimacpish jahua pachapimi can.

²⁰ Ñucamanta rimaccunaca ñuca ricsishcacunallatacmi. Ashtahuanpish Diospac ñaupapimi huiquita urmachishpa mañasha.

²¹ ¡Runa paipac ricsishcahuan rimaric shina Dios-huan rimari pudishpachari alli canman!

²² Ñuca mana ashtahuan cutina ñanta japishpa ringapacca asha huatacunallami tiyan.