JOB 15 - Dios Rimashcata Quillcashcami

Elifaz Jobta rimashcamanta

¹ Shina nicpi, temanitapuramanta Elifazca:

² «¿Alli yachac runaca imatapish yangata rimangachu? ¿Paipac huicsapica huairatachu jundachin?

³ ¿Yangalla shimita rimangachu? ¿Manapish imata yuyachic shimicunatachu ninga?

⁴ Diosta manchanatapish yangalla cashcatami ruhuangui. Diospac ñaupapi mañanatapish mana valichinguichu.

⁵ Cambac shimillatacmi can mana alli cashcataca huillacun. Canca yachac tucushcacunapac rimaitami acllashcangui.

⁶ Cambac shimillatacmi cantaca llaquipi churacun. Mana ñucachu llaquipi churacuni. Cambac shimillatacmi canta llaquichinataca huillacun.

⁷ ¿Canchu Adanpac punta huacharircangui? ¿Urcucuna manarac tiyacpichu canca ña tiyarcangui?

⁸ ¿Canca Dios pacalla rimashcatachu uyarcangui? ¿Canllachu jatun yachaita chasquircangui?

⁹ Canca, ¿imatatac ñucanchic mana yachashcataca yachangui? ¿Imatatac ñucanchic mana entendishcataca entendingui?

¹⁰ Ñucanchicpurapica yurac accha yallita yuyaccunami tiyan. Paicunaca cambac taitacunata atishpa yalli huatacunatami charin.

¹¹ ¿Canman Dios cushicuita cushcatapish, sumacta rimashcatapish yangapichu churangui?

¹² ¿Ima nishpatac cambac shunguca paimanta caruyan? ¿Ima nishpatac cambac ñahuihuan nina japiric shina piñaringui?

¹³ ¿Ima nishpatac Dios-huan piñaringui? ¿Imamantatac imatapish rimaringuilla?

¹⁴ ¿Runaca mapa illac cangapacca imatacyari? Huarmimanta huacharishca runaca ¿ima shinatac allita ruhuac cashcaca ricuringayari?

¹⁵ Diosca paipaclla causaccunapipish mana shunguta churanchu. Jahua pachapish paipac ñahuipica mana mapa illacchu can.

¹⁶ Yacuta ubiac shina mana allita ruhuac runaca, ¿maitatac alli ricuringayari?

¹⁷ Ñuca huillashcata uyaiyari. Ñuca ñahuihuan ricushcatami canman huillasha.

¹⁸ Alli yachaccuna, paicunapac ñaupa taitacunamanta yachacushpa, mana pacashpa ñucanchicman yachachishcatami huillasha.

¹⁹ Paicunamanmi cai llactataca curca. Paicunapac llacta chaupitaca mana ricsishca runacunaca mana rircachu.

²⁰ Diosta mana manchac runacunaca tucui punzhacunami nanaihuan llaquita causacun. Millaita ruhuac runaca yupashca punzhallatacmi charin.

²¹ Paipac ringripica manchana culun nishcami uyarin. Cushilla causacucpimi, tucuchic runa shamushpa tucuchinga.

²² Paica manchana amsamanta cutimunataca mana yuyanchu. Espadahuan huañuchinallami causacun.

²³ Paica yangami puricun. Paipac aichataca ullachucunami micunga. Manchana amsaman rina punzha pungupi cashcatapish yachanmi.

²⁴ Llaquicunapish, huacaicunapish yallitami manchachishpa charin. Jatun mandac macanacungapac allichirishpa shamuc shinami paita llaquichingapac shamun.

²⁵ Paillatacmi Diosta maquita alzashpa piñachishca. Paillatacmi tucuita ruhuac Diospac ñaupapi jatun tucushca.

²⁶ Umata alzashpami Diosta llaquichingapac callparca. Escudohuan jarcarishpami shayarirca.

²⁷ Ñahui chingarictami huirayarca. Huicsa carapish huarcurishcami carca.

²⁸ Shitashca pueblopi, ña urmanalla shitashca huasicunapimi causarca.

²⁹ Mana chayucyangachu, imata charishcapish mana unayangachu. Charishcacunapish cai pachapica mana mirangachu.

³⁰ Manchana amsamantapish mana quishpiringachu. Ninami paipac ramacunataca chaquichinga. Dios paipac shimihuan pucucpimi huañunga.

³¹ Canllatac pandarishpa imata charishcacunapi ama shunguta churaichu. Chaita ruhuashpaca yangallatatacmi japingui.

³² Paica huañuna punzha manarac chayacpimi huañunga. Paipac retoñocunapish mana verdiyangachu.

³³ Paica jayac uvas yura shinami chingaringa. Paipac sisacunapish olivos sisa shinami chaquishpa urmanga.

³⁴ Diosta mana manchaccunapac tandanacuica chingarishcami canga. Imatapish pacalla japishpa charicyashca huasicunataca ninami tucuchinga.

³⁵ Millaitami huicsayuc tucurcacuna mapatami sajuarircacuna, Paicunaca pandachina yuyaillami causancuna» nirca.