JOB 14 - Dios Rimashcata Quillcashcami

Gentecunapac causaica tucurinalla cashcamanta

¹ Huarmimanta huacharishcaca, asha punzhacunallatacmi causan. Llaquicunataca yallitami charin.

² Sisa sumacta pascarishpa chaquic shina, llandu ricurishpa chingaric shinami can.

³ ¿Chashna cashca jahuachu ñahuita ñucapi churashpa juchanchisha ningui?

⁴ ¿Pitac mana allita ruhuashcataca pichai pudingayari? Chaitaca pi mana ruhuai pudinchu.

⁵ Paipac causaica asha punzhacamanllami. Pai causana quillacunapish cambac maquipimi. Canmi ima punzhacaman causanataca churashcangui. Chai punzhamantaca mana pasangachu.

⁶ Paita can cungaricpica, huañungallami. Trabajac runa shinami punzha tucuricta shuyacun.

⁷ Yurata piticpica retoñomi llucshin. Retoñacpica ramacunaca mana illangachu.

⁸ Allpa ucupi sapi chaquishpapish, allpapi tronco ismucushpapish,

⁹ yacu chayacpica cutin verdiyashpa, mushuc yura shinami ramacuna junda tucunga.

¹⁰ Ashtahuanpish runa huañushpaca, tucurinmi. Samai chingarishpaca, ¿maimanshi rin?

¹¹ Mama cuchamanta yacu tucuric shina, callpacuc yacucuna, ashancaman chaquic shinami,

¹² runa huañushpa tigrashpaca mana jatarin. Jahua pacha tucuringacaman manatac jataringachu. Sueñucushcamantaca mana riccharingachu.

¹³ ¡Can piñarishca cashcamanta alli tucungacaman Seolpi miticugrishpachari alli caiman! ¡Ashata shuyashpa ñucata yuyaringuiyari!

¹⁴ ¿Shuc runa huañushpaca causaringachu? Tucui ñuca causai punzhacunami quishpirina chayamunata shuyacushalla.

¹⁵ Can cayacpica, ñucaca uyashami. Chaipica cambac maquihuan ruhuashcatami yuyaringui.

¹⁶ Ashtahuanpish cunanca ñuca purishcatami yupangui. Ñuca juchacunataca mana yuyaringuichu.

¹⁷ Ñuca mana cazushcacunataca sacopi sirashpa sellac shinami cungaringui. Tucui juchacunatami perdonangui.

¹⁸ Shina cacpipish, urcu tuñiric shina, quingraimanta rumicuna cuyuric shina,

¹⁹ jatun yacucuna rumicunata tucuchic shina, ñuto allpata yacu apac shinami, runa imata shuyacushcatapish tucuchingui.

²⁰ Runataca huiñaitami chingachingui. Runataca chingachinguimi. Huañucpica shuc punzhacaman nishpami cachangui.

²¹ Paipac churicuna alli nishca cacpipish, paica mana yachac chayangachu. Paicuna llaquichishca cacpipish mana yachangachu.

²² Paipac cuerpollatatacmi nanachinga. Paillamantatacmi llaquiringa» nirca.