JOB 13 - Dios Rimashcata Quillcashcami

Job mana juchayucchu cani nishcamanta

¹ Tucui caicunatami ñuca ñahuihuantac ricuni. Ñuca ringrihuan uyashpami entendini.

² Ñucapish cancuna shinallatacmi yachani. Cancunamanta yalli yangapish mana canichu.

³ Ashtahuanpish ñucaca tucuita ruhuac Dios-huanmi parlasha nini. Ñucaca paihuanmi rimanacusha nini.

⁴ Cancunaca llullashpa pandachiccunami canguichic. Cancunaca jambiccuna mana jambinata yachac shinami canguichic.

⁵ Cancunaca upalla cashpaca jatun yachac runacuna shinami canguichicman.

⁶ Cunanca ñuca yuyarishpa rimashcata uyaichic. Ñuca rimashcata uyashpa yuyaita japichic.

⁷ Millaita rimashpaca, ¿Diosmantachu rimacunguichic? Llullashpaca, ¿paimantachu parlanguichic?

⁸ ¿Maijantac ñahuita ricushpalla rimashpaca, Diospac allipacchu rimanguichic? ¿Diospac randichu rimacunguichic?

⁹ Cancuna ima ruhuashcata pai taripacpica, ¿allichu ricuringuichic? ¿Paitaca shuc runata ricushpa asic shinachu burlanguichic?

¹⁰ Ñahuita ricushpalla imata pacalla ruhuacpica, cancunataca llaquichingami.

¹¹ Dios tucuita ruhuac cashcahuanca manchachishpa cancunapac jahuapi jatun manchaita churangami.

¹² Cancunapac yuyaita japina parlocunaca uchupa shina yangallami. Cancunapac jarcarishpa rimashcacunaca allpamanta ruhuashca shinami.

¹³ Ñuca rimashcata uyaichic. Quipaman ima tucungapacpish rimashallami.

¹⁴ ¿Imamantatac ñuca aichataca ñuca quirucunallahuantac pitishayari? ¿Imapactac ñuca causaitaca huañuna patapi churashayari?

¹⁵ Dios ñucata huañuchicpipish, paillapimi shunguta churashpa shuyasha. Ñuca ima shina cashcataca paipac ñaupapimi ricuchisha.

¹⁶ Paillatacmi ñucataca quishpichinga. Paita mana manchacca manatac ricuringachu.

¹⁷ Ñuca rimarishcacunataca allita uyaichic. Ñuca ima nishcacunataca cancunapac ringrihuan uyaichic.

¹⁸ Ñucataca cashcata ruhuacmi ningami. Chaimantami ñuca ima shina cashcata rimanata munani.

¹⁹ ¿Pitac ñucataca juchanchishpa rimai pudin? Maijan tiyacpica ñucaca upalla saquirishpa huañushallami.

²⁰ Dioslla, ñucataca cai ishcaillatami ama ruhuachun munani. Chaicunata mana ruhuacpica cambac ñaupamanta mana miticushachu.

²¹ Cambac maquita ñucamanta cutichi, jatun manchaita ñucamanta anchuchi.

²² Chai quipaca ñucata cayailla. Ñucaca canhuan rimashallami. Mana cashpaca ñuca rimasha, can cutichinguillami.

²³ ¿Mashna cutinta mana allita, shinallatac juchata ruhuashcani? Mashna cutin pandarishcata ricuchiyari.

²⁴ ¿Ima nishpatac cambac ñahuita pacashpa canta piñac runata shina ricunguiyari?

²⁵ Ñucaca shitashca panga shinami cani. ¿Imapactac llaquichisha ningui? Chaquishca ucsha shinami cani. ¿Imapactac catinpi llaquichisha ningui?

²⁶ ¿Ima nishpatac nanachic llaquicunata ñucaman cunguiyari? ¿Ima nishpatac huambrarac cashpa, juchata ruhuashcamanta ñucata llaquichingui?

²⁷ Ñuca chaquicunatami cadenahuan huatangui. Ñuca imata ruhuactami callarishpa ricucungui. Ñuca purishcatami tucuita ricucungui.

²⁸ Chashnami ñuca cuerpoca ismushca shina tucuricun. Churanata polilla tucuchicuc shinami tucuricun.