JOB 12 - Dios Rimashcata Quillcashcami

Zofar rimashcata Job cutichishcamanta

¹ Shina nicpimi Jobca:

² «Cancunaca alli runacunami canguichic. Cancuna huañucpica, jatun yachaica tucuringami.

³ Ñucapish cancuna shinallatac allita entendicmi cani. Cancunamanta yalli yangapish mana canichu. Cancuna yachashcallataca, ¿pitac mana yachangayari?

⁴ Ñucaca ñuca ricsishcacunapac burlashpa asinami tucushcani. Diosta mañacpica paica uyarcami. Imatapish cashcata ruhuac runatapish, mana allita ruhuac runatapish, burlashpami asincuna.

⁵ Allita causaccunaca llaquipi caccunataca rimashpami llaquichincuna. Urmanalla shina causaccunataca tangashpami shitancuna.

⁶ Shuhuaccunapac huasipica tucuimi alli can. Diosta piñaccunapish, imatapish mana manchashpami cushicushpa causancuna. Diosllatac cucpi paicuna ima charishcapi shunguta churashpami causancuna.

⁷ Shina cashpaca, animalcunaman tapuichicyari. Paicunaca yachachingami. Jahuata volac animalcunaman tapuichicyari. Paicunaca ricuchingami.

⁸ Mana cashpaca allpahuan parlaichicyari. Paipish yachachingami. Mama cuchapi tiyac challuacunaman tapuichicyari. Paicunapish parlangami.

⁹ Paicunamantaca, ¿maijantac Mandac Dios paipac maquihuan ruhuashcataca mana yachanyari?

¹⁰ Tucui causaccunapac almapish, samaipish paipac maquipimi.

¹¹ Ringri uyacpimi, imata rimashcatapish yachan. Callumi imalaya micuna cashcatapish yachan.

¹² Yuyaccunami allita yachan. Unai huatata causaccunami alli yuyaita charin.

¹³ Diosmi imatapish ruhuac, alli yachacpish can. Paimi alli yuyaita cuc, alli entendicpish can.

¹⁴ Pai urmachishcataca pi mana cutin allichinchu. Pai runata huichcashpa churashcataca pi mana cacharic pudinchu.

¹⁵ Pai mana tamyachicpica, tucuimi chaquin. Pai yallita tamyachicpica, allpa ucuyanmi.

¹⁶ Pai imatapish ruhuac cashpami huiñaita mishachin. Pandachiccunapish, pandariccunapish paipacmi.

¹⁷ Yuyaita cuc runacunatapish, paimi yuyai illacta saquin. Juezcunatapish paimi yuyaita chingachin.

¹⁸ Paimi jatun mandaccuna cadenahuan huatashpa charicucmanta cacharichishpa, huascallahuan cinturapi huatan.

¹⁹ Curacunataca paicuna imata ruhuana cashcamanta anchuchinmi, poderta chariccunatapish llucchishpami cachan.

²⁰ Cashcata nishpa rimaccunatapish upallachinmi. Yuyaccunapac yachaitapish quichunmi.

²¹ Jatun mandaccunatapish mana valichinllami. Alli sinchita huatallishcatapish pascachinllami.

²² Amsa ucutapish ricuchinmi. Huañuchic amsatapish achictami ruhuan.

²³ Llactacunatapish paillatacmi jatunyachin, shinallatac paillatacmi chingachin. Llactacunamantaca caita chaitami cachan, shinallatac paillatacmi tandachin.

²⁴ Cai pachata mandaccunapac yuyaita quichunmi. Shitashca pambapi, maimanpish mana llucshi pudishpa, chingarichunmi saquin.

²⁵ Machashca shinatami ruhuan. Amsa tutapi shinami tantiashpalla purincuna.