JOB 11 - Dios Rimashcata Quillcashcami

Zofar runa Jobta juchanchishpa rimashcamanta

¹ Naamatitapuramanta Zofarca:

² «¿Yallita rimaricmanca cutichinachu canga? ¿Yallita rimarishpaca jucha illacchu tucunga?

³ ¿Can yallita rimarishpaca upallachinguichu? Can mana cazushpa asicpica, ¿manachu pi cantaca pingaichinga?

⁴ Canca: “Ñuca yachachishcaca allimi. Cambac ñahuipica mapa illacmi cani” ninguimi.

⁵ Dios canta paipac shimihuan rimacpica, mai cushicuichari canman,

⁶ Paimi pi mana yachashca, yachaicunata yachachinga. Chaicunaca ima charishcacunata yalli valic cactami ricuchin. Chashnami can mana allita ruhuashcamantaca, Diosca ashallata llaquichicushcata yachangui.

⁷ ¿Canca Diospac pacashca yuyaicunataca yachai pudinguichu? ¿Tucuita ruhuac Dios ima shina cashcataca entendinguichu?

⁸ Paica jahua pachatapish yalli jatunmi. Chashna cacpica, ¿imatatac ruhuai pudingui? Seolmanta ashtahuan ucu pachapimi. Shina cacpica, ¿ima shinatac ricsi pudingui?

⁹ Paica cai pachatapish yalli jatunmi. Mama cuchatapish yalli anchomi.

¹⁰ Pai shamushpa, prezu japishpa, ima ruhuashcata tapungapac cayacpica, ¿pitac jarcai pudingayari?

¹¹ Pi llullac cashcataca yachanmi. ¿Mana allita ruhuac cashcata yachashpaca saquingallachu?

¹² Sacha burro genteta huachacpimi, mana entendic runapish yuyaita japinman.

¹³ Cambac shungupi allichirishpaca cambac maquita paipacman chutai pudinguimi.

¹⁴ Cambac maquihuan mana allita ruhuashca cashpaca saquingui. Cambac huasipi ima mana alli tiyachunca, ama saquinguichu.

¹⁵ Shinami jucha illac ñahuihuan huichai ricungui. Sinchi tucushpami imatapish mana manchangui.

¹⁶ Chashna ruhuashpami cambac llaquicunatapish, yacu pasarishca shina mana yuyaringui.

¹⁷ Cambac causaica chaupi punzhatapish yalli achicllami canga. Tutapish tutamanta shinami canga.

¹⁸ Shuyana tiyacpimi, shunguta churashpa alli cangui. Muyundita chapashpami mana manchashpa sueñungui.

¹⁹ Can sueñucucpica pi mana manchachingachu. Achcacunami can ayudachun mañac shamunga.

²⁰ Ashtahuanpish millaita ruhuaccunaca chingaringami. Paicunaca maipi mana miticui pudingachu. Paicuna imata shuyacushcapish, tucuri samai shinami canga» nirca.