JOB 10 - Dios Rimashcata Quillcashcami

Job llaquirishpa huacashcamanta

¹ Cai causaihuanca ñami shaicushca cani. Mana manchashpami aij nicushalla. Ñucaca almahuan llaquirishpami huillacushalla.

² Diostaca: “Ama jatun llaquiman cachaichu. Ñucahuan imamanta piñarishcata ricuchiyari.

³ ¿Cambac maquihuan ruhuashca runata llaquichishpa, canta mana manchaccunapac maquipi churanaca allichu canga?

⁴ Canca mana huañunalla runa, shinachu ricungui.

⁵ ¿Cambac causai punzhacunaca runapac causai punzhacuna shinachu? ¿Cambac huatacunaca, huañunalla runapac huatacuna shinachu?

⁶ ¿Imapactac ñuca mana allita ruhuashcacunata ñuca juchallishcata tapushpa, yachasha ninguiyari?

⁷ Canca, ñuca mana juchayuc cashcatapish, cambac maquimanta pi mana quishpichi pudishcatapish canllatacmi yachangui.

⁸ Ñucataca cambac maquihuanmi sumacta ruhuarcangui. Shina ruhuashca jahuami ñucataca tucuchisha ningui.

⁹ Ñucata allpamanta ruhuashcataca yuyariyari. ¿Ñuto allpallamantacchu tigrachigringui?

¹⁰ Ñucataca lecheta shina tallishpami, queselluta shina ruhuarcangui.

¹¹ Ñuca cuerpotaca carahuan, aichahuanmi churachishcangui. Shinallatac tullucunahuan, angucunahuanmi ahuarcangui.

¹² Llaquishpami ñucamanca causaitapish curcangui. Canmi ñuca samaitaca cuidarcangui.

¹³ Cambac shungupimi shuc yuyaita huacaichishpa charicungui. Chaicunata cambac yuyaipi huacaichishpa, charicushcataca yachanimi.

¹⁴ Ñuca juchata ruhuacpipish, canllatacmi ricungui. Ñuca mana allita ruhuacpipish mana perdonanguichu.

¹⁵ Ñuca juchayuc cashpaca, ¡aij imachari tucusha! Cashcata ruhuac cashpapish, umallatapish mana alzai pudinichu. Cunanca llaquihuanpish, nanaihuanpish shaicushcami cani.

¹⁶ Ñuca umata alzacpica, leonta shinami japingui. Chashna japishpaca ñucapimi, jatun mancharinacunata ruhuangui.

¹⁷ Ñucata llaquichishpa huillaccunatapish ashtahuanmi apamungui. Soldadocuna shinami, mana shaicushpa llaquichingui.

¹⁸ ¿Imapactac ñucataca mamapac huicsamanta llucchircanguiyari? Ñuca huañushca cacpica, pi mana ricunmanchu carca.

¹⁹ Mamapac huicsamanta enterrana jutcuman apashca cacpica, mana huacharishca shinachu caiman carcani.

²⁰ Ñuca causana punzhacunaca ashallami. Ama ashtahuan llaquichishpa, ashallatapish cushicuchun saquiyari.

²¹ Mana cutingapac, manchana amsa ucuman manarac rishpami mañani.

²² Yallita pura tuta, imapish mana alli llactaman, Chaipi tiyac achicpish, manchana amsa tuta shinallatac llactaman amarac cachaichu” ninmi» nirca.