JEREMÍAS 7 - Dios Rimashcata Quillcashcami

Cancunapac causaita allichi nishcamanta

¹ Mandac Dios Jeremiasta rimashpaca:

² «Ñucapac huasi pungupi shayarishpa: “Tucui Judá llactapi causaccuna, Mandac Diosta alli ningapac yaicuccuna pai rimashcata uyaichic.

³ Israelcunapac tucuita Mandac Diosca: Cancunapac causaita allichishpa, allita ruhuaichic. Shina ruhuacpimi, cancunataca cai llactapi causachun saquisha.

⁴ Maijancuna: ‘¡Caica, Mandac Diospac huasimi! ¡Mandac Diospac huasimi! ¡Caica, Mandac Diospac huasimi!’ nicpipish, ama cringuichicchu.

⁵ Ashtahuanpish cancunapac causaita allichishpa, allita ruhuashpa, cancunapurapipish, shuctac runacunapurapipish cashcata ruhuanguichic.

⁶ Shuctac llacta runatapish, taita mama illac huahuatapish, viudatapish ama llaquichinguichicchu. Cai llactapi causac mana faltayuc runapac yahuarta ama jichaichicchu. Cancunapac allipacllata ama shuctac dioscunata catinguichicchu.

⁷ Chashna causacpica, cancunapac ñaupa taitacunaman huiñaicaman cushca llactapi causachunmi saquisha.

⁸ Cancunaca yanga llulla parlocunapimi shunguta churashpa causacunguichic.

⁹ Cancunaca huañuchishpa, shuhuashpa, huainayashpa, yanga ari nishpa, Baal dioscunaman inciensota cushnichishpa, mana ricsishca shuctac dioscunata catishpami causanguichic.

¹⁰ Cancunaca, ¿chashna causacushca jahuachu ñuca shutipi mañana huasiman shamushpa, ashtahuan millaicunata ruhuashpa: ‘Ñucanchicca quishpirishcami canchic’ ninguichic?

¹¹ Cancunaca ñuca shutita mañana huasitaca, ¿shuhuaccuna miticuna jutcu cashcatachu yuyanguichic? Cancuna imata ruhuacuctaca ñucapish ricucunimi.

¹² Ñaupa punzhacunapi ñuca shutita causachun churashca Silo llactaman richic. Chaipi ñuca acllashca israelcuna mana allita ruhuashcamanta ñuca imata ruhuashcata ricuichic.

¹³ Cunanca, cancunapish mana allita ruhuashpami causacunguichic. Ñaupa huatacunamanta pacha punzhanta cancunata ñuca rimacucpipish, mana cazurcanguichicchu. Ñuca cayacpipish, mana uyarcanguichicchu.

¹⁴ Chaimantami cancuna shunguta churashpa, ñuca shutita mañana huasitaca Silo llactata shinallatac ruhuagrini. Cai huasitaca cancunamanpish, cancunapac ñaupa taitacunamanpishmi curcani.

¹⁵ Ima shinami cancunapac huauquicunatapish, Efrainpac huahua huahuacunatapish ñuca ñaupamanta llucchishpa cacharcani, chashnallatacmi cancunatapish llucchishpa cachasha” ningui» ninmi.

Israelcuna mana cazushcamanta

¹⁶ Mandac Diosca: «Canca, ama cai gentecunamanta mañaichu. Ama paicunamanta ashtahuan caparishpa ñucata cutin cutin mañacuichu. Chai mañashcataca manatac uyashachu.

¹⁷ ¿Manachu Judá llactacunapi, Jerusalén ñancunapi mana allita ruhuacuctaca ricungui?

¹⁸ Huahuacunaca yantatami tandan. Taitacunaca ninatami japichin. Huarmicunaca jahua pachata mandac huarmi diosman cungapacmi tandata masancuna. Shuctac dioscunaman ofrendata cushpami, vinota tallin. Chashna ruhuashpami, ñucataca yallita piñachincuna.

¹⁹ ¿Paicunaca ñucata piñachingapacchu chashna ruhuancuna? ¿Manachu paicunapac pingaipacllatac chashna ruhuancuna?

²⁰ Ñucaca yallita piñarishpami, cai llactata llaquichigrini. Runacunatapish, animalcunatapish, pambapi shayacuc yuracunatapish, allpapi pucushca granocunatapish mana huañuc ninahuami llaquichigrini» ninmi.

Judá llactapi causaccunata llaquichishcamanta

²¹ Israelcunapac tucuita Mandac Diosca: «Cancunaca ashtahuan animalta cushpa tucui rupachichic. Chai aichata micuichic.

²² Ñucaca cancunapac ñaupa taitacunata Egiptomanta llucchimui punzhapica animalta tucui rupachinamanta mana parlarcanichu, shinallatac mana mandarcanichu.

²³ Chaipac randica ñucaca: Cancunaca ñuca ima nishcata cazuichic. Cancuna cazucpica, cancunapac Diosmi casha. Cancunapish ñuca acllashcacunami canguichic. Ñuca mandashcacunata cazushpaca, allimi causanguichic nircani.

²⁴ Shina mandacpipish, mana uyarcacunachu, mana cazurcacunachu. Ashtahuanpish sinchi shungu tucushpami, mana allita yuyarishpa, paicuna munashcata ruhuashpa, ñaupaman rinapac randica, huashaiman cutirirca.

²⁵ Ñuca ima nishcata huillac, ñucata serviccunataca cancunapac ñaupa taitacunata Egiptomanta llucchimushca punzhamanta pacha cunancamanmi punzhanta cancunapacman cachacurcanilla.

²⁶ Shina cachacpipish, mana uyarcacunachu. Ashtahuanpish paicunapac taitacunata yalli sinchi shungu tucushpami, mana allita ruhuarca.

²⁷ Can, cai rimashcacunata huillacpipish, mana cazungacunachu. Cayacpipish mana uyangacunachu.

²⁸ Chaimantami canca: “Cai llactapi causaccunaca paicunata Mandac Diostaca mana cazurcacunachu. Allita ruhuachun yachachishcatapish mana uyarcacunachu. Paicunaca cashcata ninataca saquishcami” ningui» nirca.

Diospac huasipi millaita ruhuashpa llaquichishcamanta

²⁹ Chaimanta cambac acchata pitishpa shitai. Lomacunaman rishpa caparishpa huacai. Mandac Diosta yallita piñachishcamantami huahua huahuacunataca mana ricunayachishpa shitashca.

³⁰ Mandac Diosca: «Judá llactapi causaccunaca ñucapac ñaupapimi mana allita ruhuancuna. Ñuca shutita mañana huasipi millana dioscunata churashpami mapayachirca.

³¹ Bet-hinom pambapi tiyac Tofet urcupipish altarcunata ruhuashpami, paicunapac churicunata, ushicunata cushpa rupachirca. Chaitaca mana mandarcanichu, mana yuyarircanipishchu.

³² Chaimanta Mandac Dios ñucallatacmi, chai punzhacunapica, chai pambaca mana Tofet nishcachu canga. Shinallatac Bet-hinom pugru pambatapish mana Bet-hinom nishcachu canga. Ashtahuanpish huañuchina pamba nishcami canga. Huañushcacunataca maipi enterrana mana tiyacpimi, Tofet pamballapitac enterranga.

³³ Chai cuerpocunataca volac animalcuna, pambata puric animalcunami micunga. Chai animalcuna micucucpica, pi mana manchachingachu.

³⁴ Judá llactapi tiyac llactacunapipish, Jerusalén ñancunapipish cushicushpa yallita asinapish mana tiyangachu. Shinallatac noviocuna, noviacuna cushicushpa asinapish mana tiyangachu. Tucui llactacunami llaquinayaita tucuchishca canga» ninmi.