JEREMÍAS 52 - Dios Rimashcata Quillcashcami

Judá llactata Sedequías mandashcamanta

¹ Sedequiasca ishcai chunga shuc huatayuc cashpami, mandai callarirca. Paica chunga shuc huatatami Jerusalenpi mandarca. Paipac mamaca Libna llactamanta Jeremiaspac ushi Hamutalmi carca.

² Sedequiasca ñaupa jatun mandac Joacim shinallatacmi Mandac Diospac ñaupapica mana allita ruhuarca.

³ Chaimantami Mandac Diosca yallita piñarishpa, Judá llactapi causaccunatapish, Jerusalenpi causaccunatapish paipac ñaupamanta llucchishpa cacharca. Sedequiasca Babilonia llactata jatun mandacta mana cazushpami piñarirca.

Jerusalén urmashcamanta

⁴ Sedequías ña iscun huata, chunga quilla, chunga punzhata mandacucpimi, Babilonia llactata jatun mandac Nabucodonosorca Sedequías mana cazushpa piñachishcamanta Jerusalenta llaquichingapac shamurca. Chashna shamushpami, chai llacta muyundipi carpacunata shayachishpa, macanacuna pushtucunata allichirca.

⁵ Sedequías Judá llactata chunga shuc huatata mandangacamanmi Jerusalén muyundipi chapashpa causarca.

⁶ Chai huata chuscu quilla, iscun punzhapimi Jerusalenpica yalli yarcai tiyarca. Chaimantami chai llactapi causaccunaca micuna illac carca.

⁷ Chaimantami chai llacta muyundi jatun pircata shuc jutcuta ruhuashpa, tucui soldadocuna miticushpa callparca. Chashnami tuta jatun mandacpac huerta ladopi tiyac ishcai pirca chaupipi tiyac punguta llucshirca. Caldeocuna muyundipi chapacucllapitacmi Arabá pambaman rina ñanta callparca.

⁸ Ashtahuanpish caldeocuna catishpa rishpami, jatun mandac Sedequiastaca Jericó pambapi japirca. Paita japicpica, tucui soldadocunami shitashpa rirca.

⁹ Chaimantami jatun mandactaca prezushpa, Babilonia llacta jatun mandacpacman Hamat llactapi cac Ribla llactaman aparca. Chaipimi paitaca ima shina llaquichinata mandarca.

¹⁰ Babilonia llacta jatun mandacca Sedequiaspac churicunataca paipac ñaupallapitacmi huañuchirca. Judá llactata mandaccunatapish Ribla llactallapitacmi tucuita huañuchirca.

¹¹ Babilonia llactata jatun mandacca Sedequiasta ñahuita surcushpami, cadenahuan huatashpa, Babilonia llactaman prezu aparca. Chai llactapimi huañungacaman prezu carca.

Judá prezu rishcamanta

¹² Jatun mandac Nabucodonosorca Babilonia llactata chunga iscun huata, pichca quilla, chunga punzhata mandacushpami paipac ñaupapi servishpa causac soldadocunapac mandac Nabuzaradanhuan Jerusalenman rirca.

¹³ Chashna rishpami, Mandac Diospac huasitapish, jatun mandacpac huasitapish, Jerusalenpi tiyac huasicunatapish, jatun huasicunatapish tucui rupachirca.

¹⁴ Tucui paipac soldadocunahuanmi Jerusalén muyundi jatun pircacunataca tucui urmachirca.

¹⁵ Soldadocunata mandac Nabuzaradanca Jerusalenpi causac huacchacunatapish, chai llactapi saquirishca gentecunatapish, Babilonia llactata jatun mandacpac parte tucushca gentecunatapish, chai llactapi causac artesanocunatapish apamuchun mandarcami.

¹⁶ Shina mandashpapish, cuidac soldadocunata mandac Nabuzaradanca imata mana charic huaccha gentecunataca ashalla uvasta, granota tarpuchunmi saquirca.

¹⁷ Caldeocunaca Mandac Diospac huasi ñaupapi shayachishca jatun bronce pilarcunataca paquircami. Shinallatacmi broncellamantatac ruhuashca jatun pailatapish, uchilla pailacunatapish paquirca. Mandac Diospac huasimanta tucui broncecunataca Babilonia llactamanmi aparca.

¹⁸ Shinallatac Diospacta ruhuangapac imalla tiyashcacunatapish, jatun mangacunatapish, palacunatapish, mechata pitinacunatapish, jatun lavacaracunatapish, cucharacunatapish, broncemanta ruhuashca charinacunatapish tucuitami aparca.

¹⁹ Cuidac soldadocunata mandacca inciensota rupachinacunatapish, lavacaracunatapish, vasocunatapish, uchilla mangacunatapish, candelerocunatapish, uchilla platocunatapish, uchilla lavacaracunatapish aparcami. Curi vasocunatapish, cullqui vasocunatapish tucuitami aparca.

²⁰ Ishcai jatun pilarcunata, jatun pailata, chai ucupi tiyac bronce huagracunata, caishuc uchilla tanquecunataca jatun mandac Salomón causacushpami, broncemanta ruhuachishca carca. Chaicunami Mandac Diospac huasipi tiyacurca. Tucui chaicuna mashna pezactaca mana yachai tucuipacmi carca.

²¹ Jatun pilarcunaca cada pilarmi pusac metro yalli alto, pichca metro chaupi racu carca. Chai pilar ucutaca jutcumi carca. Chai muyundica canchis centímetro racumi carca.

²² Chai pilarcuna jahuapi churashca capitel ishcai jatun bolacunaca ishcai metro yalli altomi carca. Chaicunapish broncellamanta ruhuashcami carca. Chai uma muyundipica linchihuan pilluchishcapish, granadacunata ruhuashpa huarcushcapishmi carca. Ishcai pilarcunapac umacunapish chai shinallatacmi carca.

²³ Cada filapimi patsac granadacunata linchipi huarcushca carca. Chaicunamanta chuscuca mana ricunallapi cacpimi, cada uma muyundipica iscun chunga sucta granadacunalla ricuric carca.

Judá runacunata prezu apashcamanta

²⁴ Cuidac soldadocunata mandacca curacunata mandac Seraías curatapish, paipac quipa Sofonías curatapish, Diospac huasi pungupi cuidac quimsa soldadocunatapish quimsatatacmi prezurca.

²⁵ Jerusalenpi causac soldadocunata mandactapish, jatun mandacpac ricsishcatapish, Jerusalenpi causac canchis pushac yuyaccunatapish, macanacunata yachachingapac tandachishpa shuticunata quillcactapish, Jerusalenpi saquirishca chunga runacunatapish prezurcami.

²⁶ Cuidac soldadocunata mandac Nabuzaradanca tucui paicunata prezushpami, Babilonia llactata jatun mandacpacman Ribla llactaman aparca.

²⁷ Hamat llactapi tiyac Ribla llactaman chayachicpimi, Babilonia llactata jatun mandacca espadahuan huañuchichirca. Chashnami tucui Judá gentecunaca paicunapac llactamanta prezu rircacuna.

²⁸ Nabucodonosor canchis huatapi Judá llactamanta prezu apashcacunaca quimsa huaranga ishcai chunga quimsa gentecunami carca.

²⁹ Pai mandacui chunga pusac huatapica pusac patsac quimsa chunga ishcai gentecunatami Jerusalenmanta prezu aparca.

³⁰ Nabucodonosor ishcai chunga quimsa huatata mandacucpica, cuidac soldadocunata mandac Nabuzaradanmi canchis patsac chuscu chunga pichca gentecunata Judamantaca prezu aparca. Tucuita tandachishpa yupacpica, chuscu huaranga sucta patsac gentecunami carca.

Babilonia llactapi Joaquinta allipi churashcamanta

³¹ Jatun mandac Evil-merodac Babilonia llactata mandai callaricpica, Judá llactata jatun mandac Joaquinca quimsa chunga canchis huatatami Babilonia llactapi prezu carca. Chai huata, chunga ishcai quilla, ishcai chunga pichca punzhami Judá llactata jatun mandac Joaquintaca carcelmanta llucchirca.

³² Chashna llucchishpami, sumacta Joaquinhuan rimashpa, shuctac llactacunamanta Babilonia llactaman apashca tucui jatun mandaccunamanta yalli allipi churarca.

³³ Carcelpi churarinata llucchishpami, shuctac alli churanata churachirca. Chai punzhamanta pachami Joaquinca paipac tucui causaipi chai llactata jatun mandac-huan punzhanta mizapi micushpa causarca.

³⁴ Babilonia llactata jatun mandacca Joaquinpac tucui causaipimi punzhanta ima illashcata cushpa, huañungacaman sumacta carashpa charirca.