JEREMÍAS 51 - Dios Rimashcata Quillcashcami

Babilonia llacta tucurinamanta

¹ Mandac Diosca: «Babilonia llactatapish, caldeocunatapish llaquichingapacmi jatun huairata cachasha.

² Huairachic shina tucuchic gentecunatami Babilonia llactaman cachashpa tucuchisha. Paita llaquichina punzhami chayamushca. Tucui ladomantami paita llaquichingapac jataringa.

³ Flechata shitaccuna flechata shitachun. Fierro churanata ama churarichun. ¡Quipa huiñaicunatapish, paicunapac tucui soldadocunatapish tucui huañuchishpa shucllatapish ama saquichunmi mandasha!

⁴ Huañushcacunaca caldeocunapac llactapimi urmanga. Callecunapimi lanzacunahuan chugrishca urmanga.

⁵ Israelcunata Mandac Diosca chai llactapi yallita juchata ruhuashpa paita piñachicucpipish israelcunatapish, Judá llacta runacunatapish mana saquishcachu.

⁶ ¡Babilonia llactapi causaccunapac juchamanta mana huañungapac chaimanta llucshichicyari! Paicuna llaquichishca shinallatac paicunatapish Mandac Dios llaquichina punzhami chayamushca. Paicunaman cuna cashcatami cugrin.

⁷ Babilonia llactaca Mandac Diospac maquipica curi copa shinami carca. Chai copa vinohuanmi tucui llactapi causaccunata machachirca. Chaita ubiashpaca tucuimi yuyaita chingachirca.

⁸ Babilonia llactaca cungaillami urmashpa ñuturirca. Paimanta huacaichicyari, Pai nanaita pasachichunca bálsamo jambita churaichicyari. Chashna ruhuacpica, alliyangapishchari» ninimi.

⁹ Babilonia llactata jambisha nircanchicmi. Shina cacpipish, mana alliyarcachu. Paicunapac juchata taripashpa llaquichinaca jahua puyucaman, jahua pachaman jundashcami. Chaimanta paicunata saquishpa, ñucanchic llactacunaman jacuchiclla.

¹⁰ Ñucanchictaca Mandac Diosmi ñucanchicman cashcata ruhuac cashcata ricuchishca. ¡Mandac Dios ruhuashcata jacuchic Sionpi parlashun!

¹¹ Flechacunata pichaichic. Escudotapish rigrapi apaichic. Mandac Diosca Babilonia llactata tucuchinatami yuyarishca. Media llactata jatun mandaccunapac shungupimi tucuchina yuyaita churashca. Mandac Diosca paipac huasita urmachishcamantami paicunatapish llaquichinga.

¹² Mandac Diosca pai nishca shina llaquichinata yuyarishcami. Babilonia llactata llaquichishami nishcataca pactachingatacmi. Chaimanta Babilonia llacta muyundi jatun pircapi banderata shayachichic. Chaimanta ama llucshichun, soldadocunata chapachun churaichic. Chaiman yaicungapac allichirichic.

¹³ Jatun yacucuna tiyac allpapi causaccunalla, cancunaca chayuccunami canguichic. Cancunapac huañuimi chayamushca.

¹⁴ Tucuita Mandac Diosca paipac shutillapitac ari nishpami: «Ñucaca canta piñaccunataca langostacunata shinami jundachisha. Paicunami caparishpa canhuan macanacungapac shamunga» nirca.

Mandac Diosta alli ninamanta

¹⁵ Mandac Diosca poderyuc cashpami cai pachataca ruhuarca. Yallita yachac cashpami cai pachataca maita mana cuyuchipacta churarca. Alli yuyaiyuc cashpami, jahua pachataca pañota tendic shina churarca.

¹⁶ Pai rimacpica, yacucunapish jahua pachapi tulun nishpa uyarinmi. Huairatapish, puyutapish tucui cai pachamanta huichaiman apanmi. Paillatacmi relampa jaguin nishpa tamyachin.

¹⁷ Tucui gentecunami imata mana yachac, yuyai illac tucuncuna. Yanga dioscunata ruhuaccunapish chai dioscuna yanga cashcamantami pingai tucun. Chai dioscunaca mana samaita charinchu.

¹⁸ Chai dioscunaca burlashpa asinami. Yalli llaqui punzhacunapica tucuchishcami canga.

¹⁹ Jacobopac Mandac Diosca mana paicuna shinachu. Paica tucuita ruhuac Diosmi. Paipac shutica tucuita Mandac Diosmi. Israelcunaca pai mandana vara shinami.

Babilonia llactata tucuchinamanta

²⁰ Babilonia llactalla, ñuca llaquichina martillo shina, ima shuctac macanacuna shinami canguichic. Cancunahuanmi llactacunata urmachisha.

²¹ Cancunahuanmi caballocunatapish, caballopi riccunatapish, carretacunatapish, chaipi riccunatapish tucuchisha.

²² Cancunahuanmi caricunatapish, huarmicunatapish, yuyaccunatapish, huambracunatapish, mosocunatapish, solteracunatapish tucuchisha.

²³ Cancunahuanmi michictapish, manada ovejacunatapish, chagrata ruhuaccunatapish, yunta huagratapish, mayoralcunatapish, mandaccunatapish tucuchisha.

²⁴ Babilonia llactapi causaccunatapish, Caldea runacunatapish, Sionta llaquichishcamantaca cancunapac ñaupapimi llaquichigrini» ninmi

²⁵ Mandac Diosca: «Tucui llactacunata tucuchic urculla, cantaca yallitami piñani. Canmi tucui llactacunata tucuchircangui. Ñuca llaquichishpami rumi quingraita singuchisha. Shinami rupashca urcuta saquisha.

²⁶ Chai tucushca pushtumantaca pipish huasita shayachishpa, callaripi churangapac shuc rumillatapish mana japingachu. Huiñaitami shitashca pamba saquiringa. Chaitaca Mandac Dios ñucami nini.

²⁷ ¡Chai llactapica banderata alzaichic! Chai llactapi causaccunahuan macanacungapac trompetapi tocashpa llactacunamanta tandachichic. Paicunahuan macanacungapac Ararat, Mini, Askenaz llactacunata jatun mandaccunata tandachichic. Chai macanacuita pushachunca, alli pushacta churaichic. Langosta shina, caballocunapi montashpa huichai shamuichic.

²⁸ Media llactata jatun mandaccunatapish, shuctac mandaccunatapish, soldadocunata mandaccunatapish, chai llactapi causaccunatapish tandachishpa allichirichic» ninmi.

²⁹ Mandac Diosca Babilonia llactata tucuchishpa pipish mana causana shitashca pambata ruhuangapac yuyarishcataca pactachigrinmi. Chaimantami cai pachaca cuyurishpa chucchunga.

³⁰ Babilonia sinchi soldadocunaca macanacunata saquishpami, jatun torre ucucunapi miticushca. Fuerza illac saquirishpami, huarmicuna shina tucushca. Paicunapac huasicunaca rupashcami. Llacta pungu aldabacunapish paquirishcami.

³¹ Babilonia llactata japishcata huillaccunapish, cartata saquiccunapish catinacuimi Babilonia llactata jatun mandacpacman ringa.

³² Jatun yacu chimba lado pambacunata japishpami, baluartecunapish tucui rupachishca. Soldadocunaca manchaihuanmi chucchucun.

³³ Israelcunapac tucuita Mandac Diosca: «Sumaimana Babilonia llactaca trigota trillana era shinami. Asha punzha quipaca ñami cosechana punzha chayamugrin» ninmi.

³⁴ Jerusalenpi causaccunaca: «Babilonia llactata jatun mandac Nabucodonosormi pandachirca. Ñutuchishpami micurca. Shinami chushaclla platota shina saquirca. Jatun manchana dragón shamushpami, huicsa jundata micuc shinami, ñucanchic charishca sumaccunataca tucuchirca. Chashna micushpaca ñucataca llucchishpami cacharca.

³⁵ ¡Ñucata llaquichishcamantaca Babilonia llactata llaquichichun!» ningami. Sionpi causaccunaca: «¡Ñucanchic jichashca yahuarmantaca caldeocunata llaquichichun!» ningami.

³⁶ Chaimantami Mandac Diosca: «Ñucami canta llaquichishcamantaca llaquichisha. Ima shinami llaquichishca shinallatacmi paicunataca llaquichisha. Paicunapac jatun yacucunatapish, tucyacuc yacucunatapish chaquichishami.

³⁷ Babilonia llactaca rumi montonllami saquiringa. Chacal animalcunallami causanga. Shuc runallapish mana tiyangachu. Tucuipac burlashpa asinami tucunga.

³⁸ Leoncuna shinami tucui mashna caparinga. Huahua leoncuna shinami huacanga.

³⁹ Ñucaca paicuna rupaipi cacpimi, jatun micuita ruhuashpa, ubiachishpa machachisha. Chashna machashpa cushicushpami, jaicapi mana riccharingapac sueñunga. Chaitaca Mandac Dios ñucami nini.

⁴⁰ Paicunataca maltón ovejata shina, carnero ovejacunata chivocunahuan huañuchina ucuman apac shinami apamuchun mandasha» ninmi.

⁴¹ ¡Tucui llactacuna alli nishca Babilonia llactataca japishcami! ¡Llaquinayaitami prezu japi tucushca! ¡Tucui llactacunapac mancharinami tucushca!

⁴² Mama cucha yacumi Babilonia llactata tapashca. Manchana yacu jatarishpami tucuchishca.

⁴³ Tucui chai llactacunaca chaquishca, shitashca pambami saquirishca. Chaipica pipish mana causangachu. Pipish chaita mana pasangachu.

⁴⁴ Shinallatac: «Babilonia llactapi cac Bel diosta llaquichishpami, imata micushcatapish huicsamanta llucchisha. Shuctac llactacunaca paipacmanca mana ashtahuan shamungachu. ¡Babilonia llacta muyundi jatun pircaca urmashcami!

⁴⁵ ¡Ñuca acllashcacunalla, chai llacta chaupimanta llucshichicyari! Mandac Dios nina japiric shina, yallita llaquichinamanta llucshichicyari.

⁴⁶ Llactacunapi llaquita uyashpapish ama manchaichicchu. Ama shaicuichicchu. Chai llaquicunaca huatantami uyaricungalla. Shuc llactata jatun mandacca shuctac llactata mandac-huanmi piñanacunga.

⁴⁷ Riquichic, Babilonia llactapi tiyac ruhuashcalla dioscunata llaquichina punzhami chayamun. Tucui llactami pingaipi saquiringa. Chai llacta chaupipimi huañunga.

⁴⁸ Jahua lado llactamantami Babilonia llactata llaquichingapac shamunga. Paicuna shamushpa, tucui tucuchicpica, jahua pachapish, cai pachapish, chaipi tiyaccunapish cushicushpami cantanga.

⁴⁹ Babilonia llactaca tucui cai pachapi causaccunata llaquichishcamantami tucurca. Chai llactapi causaccunaca israelcunata huañuchishcamantami huañushpa tucuringa» ninmi.

Babilonia llactapi cac israelcunamanta

⁵⁰ Mandac Diosca: «¡Jatun macanacuipi mana huañushpa, saquirishcacunaca mana samarishpa, utca callpaichicyari! Carupi cashpapish Mandac Diosta yuyaringuichicyari. Jerusalentaca cancunapac yuyaipi charinguichic» ninmi.

⁵¹ Paicunaca: «Caru llacta gentecunami Mandac Diospaclla huasi ucuman yaicushca. Chaimantami ñucanchicca burlashca, asishca, yallita pingaichishca canchic. Chaimantami ñahuita maipi churanata mana pudishpa, pingaihuan canchic» ningacuna.

⁵² Chaimantami Mandac Diosca: «Babilonia llactapi tiyac ruhuashcalla dioscunata tucuchina punzhacunami shamushca. Chashna tucuchicpimi, tucui chai llactapi caccunaca chugririshpa llaquiringa.

⁵³ Babilonia llacta muyundi pirca jahua pachaman cacpipish, chaimanmi ñuca cachashca piñaccunaca chayanga.

Babilonia llacta tucurinamanta

⁵⁴ ¡Babilonia llactapi yalli llaquihuan caparishcami uyarin! ¡Caldeocuna manchaihuan chucchushcami ricurin!

⁵⁵ Chaica, Mandac Diosmi Babilonia llactata tucuchishpami, caparinacushcatapish upallachinga. Paicunata piñaccunaca mama cucha shinami jataringa. Manchanayaita yacu huacac shinami shamun.

⁵⁶ Tucuchiccunaca Babilonia llactaman shamushpami tucui tucuchishpa, sinchi soldadocunatapish prezu apanga. Paicunapac arcopish polvoringami. Mandac Diosca paicuna imata ruhuashca shinallatacmi llaquichinga.

⁵⁷ Paicunata mandaccunatapish, jatun yachaccunatapish, llactapi mandaccunatapish, soldadocunata mandaccunatapish, tucui sinchi runacunatapish machachishami. Chashna machachicpica, huiñaita mana riccharishpami, sueñucungalla. Chaitaca Jatun Mandacmi nin. Paica tucuita Mandac Dios shutimi.

⁵⁸ Babilonia llacta muyundi ancho pircapish tucuimi tuñiringa. Jatun pungucunapish uchupami saquiringa. Gentecunaca yangami trabajashca. Ninapi rupachunllami shuctac llacta gentecunapish yallita shaicushca» ninmi.

Jeremías quillcashcata Babilonia llactaman apashcamanta

⁵⁹ Judá llactata jatun mandac Sedequias-huan Babilonia llactaman ricucpimi, Dios ima nishcata huillac Jeremiasca Neriaspac churi, Maasiaspac nieto Seraiasman shuc quillcata mingashpa cacharca. Sedequiasca ñami chuscu huatata mandacurca. Seraiasca Sedequiaspac sueñuna ucuta allichicmi carca.

⁶⁰ Babilonia llactata llaquicuna japinatami Jeremiasca shuc carapi quillcarca. Babilonia llactata ima shina llaquichinata tucui rimashcata quillcashcami chaipica tiyacun.

⁶¹ Chai quipami Jeremiasca Seraiastaca: «Babilonia llactaman rishpaca, caipi quillcashcata rezangui.

⁶² Chashna rezacushpaca: “Mandac Dioslla, canmi cai Babilonia llactata piñashpa, chaipi causac gentecunatapish, animalcunatapish tucui tucuchisha nircangui. Chashnami huiñaita shitashca pamba saquiringa” nircangui.

⁶³ Cai quillcashcata tucui rezashpaca, chai quillcapi shuc rumita huatashpa Eufratespi shitangui.

⁶⁴ Chaipi shitashpaca: “Chashnami cai Babilonia llactaca ucuyanga. Ñuca cachashca llaquimantaca jaicapi mana quishpiringachu. Tucuimi chingaringa” ninmi ningui» nirca. Jeremías huillashcaca caicamanllami.