JEREMÍAS 50 - Dios Rimashcata Quillcashcami

Babilonia llacta llaqui tucunamanta

¹ Caldeocuna causana Babilonia llacta llaqui tucunamanta Mandac Dios huillac Jeremiasman huillachishpaca:

² «Llactacunapi caparishpa huillaichicyari. Banderacunata shayachichicyari. Mana pacashpa huillashpa: “Babilonia llactaca shuccunapac maquipimi. Bel diosca yallita pingaimi tucushca. Merodac diospish polvoshcami. Paicunapac ruhuashcalla dioscunapish ñutuchishcami siricun” nishpa caparichicyari.

³ ¡Jahua llactamantami llactata llaquichingapac rishca! Paicunami tucui ima tiyashcata chingachinga. Chai llactapica runacunapish, animalcunapish mana tiyangachu. Tucuimi shitashpa ringa» ninmi.

Israelcuna cutimunamanta

⁴ Mandac Diosca: «Chai punzhacunaca israelcunapish, Judá runacunapish tandanacushpami cutinga. Ñucata mashcashpami, quiquin chaquihuan purishpa, huacashpa ñucapacman shamunga.

⁵ Sionman rina ñanta tapushpami, chai ñanta catishpa, Mandac Dios ñucahuan ari ninacushpa, huiñaita mana cungarishpa causangapac shamunga.

⁶ Ñuca acllashcacunaca chingarishca ovejacuna shinami carca. Michiccunami chingachirca. Chaimantami urcucunapi, lomacunapi purishpa, corraltapish cungarishpa mana cutirca.

⁷ Ñuca ovejacunataca pipish tarishpaca huañuchircami. Paicunata piñaccunaca: “Caicunata huañuchishcamantaca mana faltayucchu canchic. Paicunallatacmi cuidashpa causac Mandac Diosta mana cazurca. Paicunapac ñaupa taitacuna shunguta churashpa causana Mandac Diostami piñachirca” nirca.

⁸ Caldeocuna causana llactata saquishpa Babilonia llactamanta llucshichicyari. Shuc carnero manada ovejacunata ñaupac shina, pushashpa llucshichicyari.

⁹ Ñucami jahua llactamanta Babilonia llactata llaquichichun, sinchi llactacunata tandachishpa pushamugrini. Chai llactacuna allichirishpa shamushpami macanacushpa mishanga. Chai runacunaca mana pandarishpa, allita flechacunata shitac runacunami.

¹⁰ Caldeocuna tucui charishcata quichunataca mana shaicungachu.

¹¹ Caldeocunalla, ñuca llactata tucuchishpaca, cushicuihuan saltashpa, llullu quihuaman beci yaicushca shinami cushilla carcanguichic. Caballocuna huacacuc shinami caparicurcanguichic.

¹² Chaimantami cancunapac llactaca yallita pingaichishca saquiringa. Canta sajuaric mamaca yallita pingai tucushpa, tucui llactamanta yalli yangallami saquiringa. Shitashca pamba, chaquishca llactami saquiringa.

¹³ Ñuca yallita piñarishpami chai llactaca shitashca pamba, shucllapish mana causanata saquisha. Babilonia llactata pasaccunaca llaquinayai siricucta ricushpami mancharinga. Burlashpami asingacuna.

¹⁴ Babilonia llactapi causaccunahuan macanacungapac muyundita allichirishpa shayarichic. Flechacunahuan shitaccuna ama pandarishpa shitaichiclla. Paicunaca Mandac Diostami piñachirca.

¹⁵ Paicunapac muyundipi caparichic. ¡Ñamari Babilonia llactaca cumurishca! Muyundi jatun pircapish tuñirinmi. Callari rumicunapish urmanmi. Mandac Dios ñuca llaquichina punzhami chayamushca. Paicuna shuccunata llaquichishca shinallatac paicunatapish llaquichichiclla.

¹⁶ Babilonia llactapi causaccunataca tarpuc runatapish, cosechac runatapish huañuchichic. Jatun macanacui yallita llaquichicucpica, shuctac llactacunaman, quiquin llactacunaman, paicunapac familiacunapacmanmi cutinga.

¹⁷ Israelcunaca chingarishca ovejacuna shinami. Leoncunami catishpa shic-huarca. Puntaca Asiria llactata jatun mandacmi micurca. Tullucunataca Babilonia llactata jatun mandac Nabucodonosormi paquirca.

¹⁸ Chaimantami israelcunapac tucuita Mandac Diosca: Babilonia llactata jatun mandactaca Asiria llactata jatun mandacta shinallatacmi paipac tucui llactandi llaquichigrini.

¹⁹ Israelcunataca paicunapac llactamanmi cutichimusha. Chashna cutichimucpimi, ñuca ovejacunaca Carmelo, Basán, Efraín, Galaad urcucunapi alli micushpa huirayanga.

²⁰ Ñucallatac causachun saquishca israelcunapac juchacunataca perdonashami. Chaimantami chai punzhacunapi, chai huatacunapica israelcunapish, Judá runacunapish jucha illac cangacuna. Paicunapica juchaca mana tiyangachu. Chaitaca Mandac Dios ñucami nini.

²¹ Merataim llactapi causaccunahuan, Pecod llactapi causaccunahuan macanacungapac llucshichicyari. Ñuca mandashca shina, huañuchishpa tucuchichicyari.

²² Cai pachapica jatun macanacui, yalli caparinacuimi tiyan.

²³ ¡Tucui cai pacha llactacunata llaquichic martillo shina Babilonia llactamari tucurishca! ¡Chai llactaca shuctac llactacunapac chaupipica mancharina, shitashca pambami tucushca!

²⁴ Babilonia llactalla, ñucallatacmi tucllata churarcani. ¡Chaipi urmashpa prezu japi tucunataca mana yacharcanguichu! Mandac Dios ñucata mana cazushcamantami chashnaca tucurcangui.

²⁵ Mandac Dios ñucami macanacunata huacaichishca ucuta pascashpa, nina japiric shina piñarishpa macanacunata llucchircani. Tucuita Mandac Dios ñucami caldeocunapac llactapi ñuca ruhuana cashcata ruhuasha.

²⁶ Tucui cai pacha llactacunamanta shamushpa paihuan macanacuichic. Paipac grano huacaichinacunata polvoshpa, tucuita apaichic. ¡Tucui tiyashcata tucuchishpa, rumi montonllata saquichic!

²⁷ ¡Paipac soldadocunatapish, huagratapish huañuchichic! ¡Aij, paicunalla, paicunata llaquichina punzhami chayamushca!

²⁸ Babilonia llactamanta miticushpa shamuccuna caparishcatami uyani. Mandac Diosmi Babilonia llactapi causaccunata paipac huasita urmachishcamanta llaquichishami nishcata pactachicushcata Sionpi huillangapac shamun.

²⁹ Babilonia llactapi causaccunata llaquichingapac flechacunata shitanata yachaccunata, flechayuc runacunata tandachishpa, paicunapac muyundipi shayarichic. Shucllatapish causactaca ama saquinguichicchu. Paicuna mana allita ruhuashca shinallatac llaquichichic. Paicunaca israelcunapac jucha illac Mandac Diostami piñachirca.

³⁰ Chaimantami paicunapac quipa huiñaicunataca plazacunapi huañuchinga. Chaitaca Mandac Dios ñucami nini.

³¹ Jatun tucushca llactalla, ñucami canhuanca piñarircani. Ñuca canta ñacachishpa, llaquichina punzhami chayamun. Tucuita Mandac Dios ñucami nini.

³² Jatun tucushca runaca chacnarishpami urmanga. Paitaca pi mana jatarichingachu. Paipac llactacunataca ninata japichishpami, tucui muyundi llactacunandi uchupata saquisha» ninmi.

³³ Tucuita Mandac Diosca: «Israelcunapish, Judá llactapi causaccunapish llaquichishcami causan. Paicunata prezu apaccunaca mana cacharishpami charicun.

³⁴ Shina cacpipish, paicunata quishpichicca sinchimi. Paipac shutica tucuita Mandac Diosmi. Babilonia llactata llaquichishpami israelcunataca cacharichishpa samachisha. Babilonia llactapi causaccunamanca manchaitami cachasha.

³⁵ Babilonia llactapi causaccunatapish, caldeocunatapish espadahuanmi huañuchingapac shamunga. Paicunata mandaccunatapish, paicunapac yachaccunatapish llaquichingami.

³⁶ Espadahuan shamushpami, adivinocunatapish upayachinga. Paicunapac sinchi runacunatapish chucchuchingami.

³⁷ Espadahuan shamushpami, paicunapac caballotapish, carretacunatapish tucuchinga. Chaimantami huarmicuna shina manchanga. Espadahuan shamushpami, paicuna charishcacunatapish quichushpa apanga.

³⁸ Yacucunata chaquichicpimi, yacuca mana tiyanga. Chai llactapi ruhuashca dioscuna yalli tiyashcamantami chashnaca tucunga. Chaipi yalli yanga dioscuna tiyacpimi, chaipi causaccunaca yuyaita chingachinga.

³⁹ Chaimantami Babilonia llactaca shitashca pambapi causac chacal animalcuna, avestruz animalcuna causana tucunga. Gentecunaca manatac ashtahuan chaipica causangachu.

⁴⁰ Ñuca Sodomata, Gomorrata, chai muyundi llactacunata llaquichicpi, llaqui tucurca, chashnallatacmi Babilonia llactapish tucunga. Chaipica pi ña mana causangachu. Huiñaitami shitashca saquiringa. Chaitaca Mandac Dios ñucami nini.

⁴¹ Jahua llactamantami achca gentecuna shamun. Cai pacha tucuri llactacunamantami achca gentecuna jatun mandaccunandi shamunga.

⁴² Babilonia llactapi causaccunalla, sinchi gentecunami arcohuanpish lanzahuanpish shamun. Paicunaca mana llaquishpami huañuchinga. Mama cucha yacu jatarishpa huacac nic shinami manchanayaita shamunga. Cancunahuan macanacungapac allichirishpami caballocunapi shamunga.

⁴³ Babilonia llactata jatun mandac chaita uyashpaca chucchushpami saquirirca. Yallita llaquirishpami, sajuarina nanai huarmita japic shina tucurca.

⁴⁴ León animalta japingapac Jordán yacu pata sachamanta llucshic shinami, paicunata llaquichishpa callpachisha. Ñuca acllashca runamanmi mingasha. ¿Pitac ñuca shinaca cangayari? ¿Pitac ñucahuan chimbapurai pudingayari? Ñuca llaquichicucpica, ¿pi michictac misai pudingayari?

⁴⁵ Chaimanta Mandac Dios ñuca Babilonia llactata ima shina llaquichinata, caldeocunata imata ruhuanata yuyarishcataca uyaichicyari. Paicunapac manada ovejacunamanta ashtahuan uchilla ovejacamanmi apanga. Ovejacuna shayanacunatapish tucui urmachishpami saquinga.

⁴⁶ Babilonia llactata llaqui japicpi, caparinacushcaca allpata chucchuchingami. Chashna caparishcaca, tucui llactacunamanmi uyaringa nini» ninmi.