JEREMÍAS 5 - Dios Rimashcata Quillcashcami

Jerusalenpi, Judá llactapi causaccuna juchallishcamanta

¹ Mandac Diosca: «Cunanca, Jerusalén ñancunapi purishpa alli ricuichic. ¿Cashcata ruhuac, allita mashcac runaca tiyanchu? Plazacunapi mashcaichic. Shuc runallapish allita ruhuac tiyacpica, Jerusalentaca quishpichishami.

² Maijan: “Mandac Diospac shutipimi ari nini” nishpapish yangallami ari ninga» ninmi.

³ Mandac Dioslla, canca mana llullac cachunmi munangui. Paicunaca can macacpipish, llaquichishpa tucuchicpipish, mana entendircachu. Rumitapish yalli sinchi shungu tucushpami, cambacman cutinataca manatac munarca.

⁴ Ñucaca: «Mandac Dios mandashcatapish, pai munashca shina causanatapish mana yachashcamantami, imatapish mana yachashpa, yuyai illac tucushca.

⁵ Cunanca yachaccunapacman rishpa, paicunahuan parlasha. Paicunaca Mandac Dios mandashcatapish, pai taripashpa llaquichinatapish yachancunami. Ashtahuanpish paicunapish yugota paquishpami, coyundatapish pitirca.

⁶ Chaimantami paicunataca sachapi causac leoncuna huañuchinga. Shitashca pambapi causac atuc shamushpami tucuchinga. Leopardomi paicunapac llacta muyundipi shayacunga. Maijanpish chaimanta llucshictaca japishpami micunga. Paicunaca yallitami Diosta mana cazushpa, juchata ruhuashca» nircani.

⁷ Mandac Diosca: «Paicunapac huahuacunapish ñucata saquishpami yanga diospac shutipi ari nirca. Paicunaman mana nicta caracucpipish ñucata saquircami. Tandanacushpami cullquimanta huainayac huarmipac huasiman rirca. Chai juchacunamantaca, ¿ima shinatac mana llaquichishayari?

⁸ Huira caballocuna caticuc shinami, shucpac huarmita catirca.

⁹ Chai juchamantaca, ¿manachu llaquichina cani? Chashna millaita ruhuac llactataca, ¿manachu paicuna mana allita ruhuashca shinallatac llaquichina cani?

¹⁰ Pircacunata huichicushpa uvas chagrata polvoichic. Shina polvoshpapish ama tucuchichicchu. Chai ramacunata tucui anchuchichic. Chaica mana ñucapacchu.

¹¹ Israel aillucunapish, Judá aillucunapish, ñucataca mana cazurcacunachu. Chaitaca Mandac Dios ñucami nini» ninmi.

¹² Mandac Diosta negashpami: «Diosca mana tiyanchu. Ñucanchictaca ima llaquipish mana japingachu. Jatun macanacuipish, yarcaipish mana tiyangachu» ningacuna.

¹³ Ashtahuanpish ñuca ima nishcata huillaccunaca huaira shinami chingaringa. Dios ima nishcata huillaccunaca mana huillacunchu. Chaimantami paicuna huillashca shinallatac tucuringa.

¹⁴ Chaimantami tucuita Mandac Diosca: «Paicuna chashna nishcamantami cunanca ñuca rimashcataca ninata shina cambac shimipi churani. Chai gentecunaca yanta shinami tucunga. Cai rimashcacunami paicunataca tucuchinga.

¹⁵ Israelcunalla, cancunata llaquichichunca caru llactamantami ñaupa pachamanta causac, sinchi runacunata apamugrini. Paicunaca mana ricsishca rimaitami rimancuna. Paicuna rimashcataca mana entendinguichicchu.

¹⁶ Tucui paicunami yalli sinchi runacuna. Paicunapac flechacunata huacaichinaca huañushcata enterrana jutcu shinami.

¹⁷ Paicunami cancunapac granotapish, ovejacunatapish, huagracunatapish, uvas chagracunatapish, higo yuracunatapish tucuchishpa, cancunapac churicunatapish, ushicunatapish micunga. Chashna ruhuashpami, cancuna shunguta churashpa, causana muyundita pircashca llactacunatapish espadacunatapish tucuchinga» ninmi.

¹⁸ Mandac Diosca: «Shina cacpipish, chai punzhacunapica, mana tucuitachu tucuchisha.

¹⁹ Chai punzhapi maijan: “Mandac Diosca, ¿imamantatac ñucanchictaca chashna llaquichin?” nicpica: “Cancunallatac Mandac Diosta saquishpa, cancunapac llactapi shuctac dioscunata servinguichic. Chashnallatacmi cancunaca mana ricsishca runacunata servishpa, mana ricsishca llactapi causagringuichic” ninguichic» nirca.

²⁰ Mandac Diosca: «Caitaca Jacobopac huahua huahuacunaman huillashpa, Judá llactapi causaccunaman uyachishpaca:

²¹ Yuyai illac, mana entendic gentecuna caita uyaichic. Cancunaca ñahuita charishpapish mana ricunguichicchu. Ringrita charishpapish mana uyanguichicchu.

²² ¿Manachu ñucataca manchanguichic? Ñuca ñaupapica, ¿manachu chucchunguichic? Ñucami tiyu allpataca mama cucha patapi huiñai huiñaita lindero cachun churarcani. Mama cucha sinchita huac nishpa shamushpapish mana pasangachu.

²³ Ashtahuanpish cai gentecunaca mana cazuc millai shungucuna cashpami, ñucamanta caruyashpa maitapish rincuna.

²⁴ Paicunapac shungupica: “Mandac Diosta manchashpa causashunchic. Paimi punta tamyatapish, chagrata pucuchic tamyatapish chai punzhacunapi cachan. Cosechana tiyachunpish paillatacmi usyai punzhacunata cachan” mana nincunachu.

²⁵ Cancunapac mana allita ruhuashcacunami, allita ruhuanataca caruyachirca. Cancunapac juchallatacmi chai allicunataca anchuchirca.

²⁶ Ñuca acllashcapurapica millai gentecunami tucllata churac shina, llaquichiccuna tiyan. Runacunata japingapacca tucuilaya tucllatami churan.

²⁷ Volac animalcunata jaulapi jundachishca shinami, paicunapac huasipica tucuilaya shuhuashcacuna tiyacun. Chashnami chayucyashpa jatun tucun.

²⁸ Chashnami huirayashpa puca ñahuicuna tucurca. Paicunaca yalli mana allitami ruhuarca. Taita mama illac huahuacunamanpish ima allita mana ruhuancunachu. Huacchacunata llaquichicucpipish, mana misancunachu.

²⁹ Chaimantaca, ¿manachu llaquichina cani? Chashna millaita ruhuac llactataca, ¿manachu paicuna mana allita ruhuashca shinallatac llaquichina cani?

³⁰ Cai llactapica, yallita mancharina mana ricuipac millaitami ruhuancuna.

³¹ Dios ima nishcata huillaccunapish llullashpami huillan. Curacunapish paicuna munashca shinami pushacun. Ñuca acllashcacunapish chaitami munancuna. Chaimanta llaqui punzhacuna chayamucpica, ¿imatatac ruhuanguichic?