JEREMÍAS 49 - Dios Rimashcata Quillcashcami

Amonta llaquichinata huillashcamanta

¹ Mandac Diosca Amonta llaquichinamanta rimashpaca: «¿Manachu israelcunaca huahuacunata charin? ¿Manachu paicunaca herenciata japiccunata charin? ¿Imamantatac Milcom diosca Gad aillupac llactata quichushca? ¿Imamantatac paipac gentecunarac chai llactacunapi causacun?

² Chaimantami amonitacunapac Rabá llactapica jatun macanacuipi caparinacuita uyana punzhacuna chayamun. Chai puebloca tucui urmachishpa, rumi montonllami saquiringa. Chaipi tiyac caishuc llactacunapish rupachishcami canga. Chai punzhacunami israelcunaca paicunamanta quichushca pueblocunata cutin japinga. Chaitaca Mandac Dios ñucami nini.

³ Hai llactaca ñami tucurishca. Chaimanta Hesbón runacunalla, caparishpa huacaichicyari. Rabá runacunalla, caparishpa huacaichicyari. Sharpa churanata churarishpa, llaquilla tucushpa, pirca huashata muyuichicyari. Cancunapac Milcom diostaca curacunandi, mandaccunandimi ña prezu apashca.

⁴ Mana cazuc llactalla, ¿ima nishpatac cancunapac alli pucuc pugru pambamanta jatun tucunguichicyari? Chai pugru pambacunaca ñami tucurishca. Cancunapac charishcapi shunguta churashpami: “¿Pitac ñucanchictaca llaquichingapac shamunga?” nicunguichic.

⁵ Riquichic, ñucami cancunapac muyundi llactacunamanta yalli manchaita apamugrini. Shina ruhuacpica, tucui cancunami caita chaita callpanguichic. Shina miticushpa riccunataca pi mana ayudashpa cutin tandachingachu.

⁶ Shina cashpapish chai quipaca ñucallatacmi Amón llactapi causaccunataca prezu apashcamanta cutichimusha. Chaitaca Mandac Dios ñucami nini» ninmi.

Edom llactata llaquichinamanta

⁷ Mandac Dios Edom llactata llaquichinamanta rimashpaca: «Temán llactapica, ¿ñachu yachaccuna tucurirca? Yachaccuna cunashcacunapish, ¿ñachu tucurirca? Paicunapac yachaica, ¿ñachu huacllirirca?

⁸ Dedanpi causaccunalla, huashaiman cutishpa callpaichicyari. Esaupac huahuacunapac llaqui punzhaca ñamari chayamugrin. Huaicucunapi miticuichicyari.

⁹ Uvasta pallaccuna uvasta shamushpaca, ¿manachu maijan uvasllatapish saquinman? Shuhuaccuna tuta shamushpapish apasha nishcallatami apancuna.

¹⁰ Ashtahuanpish Esaupac huahuacunataca lluchullatami llaquichisha. Paicuna maipi miticunapish ricunallami canga. Maipi mana miticui pudingacunachu. Shinami paipac huahuacunapish, paipac huauquicunapish, cuchullapi causaccunapish tucui tucuringa.

¹¹ Taita mama illac huahuacunataca saquichiclla, ñucami huiñachisha. Viuda huarmicunapish ñucapi shunguta churachunlla» ninmi.

¹² Mandac Diosca: «Ñuca piñarishpa ubiachinata copamanta manapish ubiana caccunapish ubiangacunami. ¡Chaimantaca cancunalla mana ubiashpa saquirinataca ama yuyaichicchu, ashtahuanpish ubianatacmi canguichic!

¹³ Bosra llactaca tucui urmachishca, mana alli nishca, shitashca pambami saquinga. Shinallatac muyundi caishuc llactacunapish chashnami huiñaita urmachishca canga. Mandac Dios ñucapac shutipimi nini» ninmi.

¹⁴ Shuc huillacta cachashcatami yachac chayarcani. Mandac Dios chai huillacta llactacunapi huillachun cachashpaca: «¡Tucui mashna tandanacuichic! ¡Edom llactapi causaccunahuan macanacungapac tandanacuichic!

¹⁵ Cancunataca tucui llactacunamanta yalli uchillatami ruhuagrini. Tucui gentecunami cancunataca mana valichinga.

¹⁶ Jatun quingrai jutcucunapi, jatun urcu lomacunapi causaccunalla, cancunapac shungupi jatun tucushpa cariyashcamantami cancunallatac umai tucushcanguichic. Aguilacuna jatun quingraipi cuzhata ruhuashca shina causacucpipish chaimantami uricuchisha. Chaitaca Mandac Dios ñucami nini» ninmi.

¹⁷ Mandac Diosca: «Edom llactaca mancharina llaquimi tucunga. Chaita pasaccunaca chashna llaquinayaita siricucta ricushpaca mancharingacunami. Burlashpami asingacuna.

¹⁸ Chai llactaca Sodoma, Gomorra llactacunata, chai muyundi pueblocunata tucuchishca shinami saquiringa. Shucllapish mana saquiringachu, pipish mana causangachu.

¹⁹ Jordán yacu pata sachamanta león animalta japingapac llucshic shina, llucshishpami Edom llactapi causaccunataca chaimanta callpachisha. Chaipica ñuca acllashca runacunatami churasha. ¿Pitac ñuca shina tiyan? ¿Pitac ñucahuan chimbapurai pudin? Ñuca llaquichicucpica, ¿pi michictac misai pudingayari?

²⁰ Edom llactapi causaccunapish, Temanpi causaccunapish Mandac Dios ima shina llaquichinata yuyarishcata uyaichicyari. Paicunapac manada ovejacunamanta ashtahuan uchillacamanmi apanga. Ovejacuna shayanacunatapish tucui urmachishpami saquinga.

²¹ Edom llacta urmacpi, caparinacushcaca allpatami chucchuchinga. Puca cuchacamanmi uyaringa.

²² Bosrapi causaccunata llaquichingapacca shuc águila alasta pascashpa shamuc shinami shamunga. Chai punzhacunapica Edom llactapi ashtahuan cari tucushca runaca sajuarina nanai huarmita japishca shinami tucunga» ninmi.

Damasco llaqui tucunamanta

²³ Mandac Dios Damascota llaquichinamanta huillashpaca: «Hamat, Arfad llactacunapi causaccunaca mana alli huillaita uyashpami yallita llaquirirca. Mama cucha chaupipi cac shinami, yalli llaquihuan shuc ratollapish mana samarincuna.

²⁴ Damascopi causaccunaca manchaihuan imata mana ruhuai pudishpami miticushpa callpancuna. Paicunataca jatun manchaimi japirca. Sajuarina nanai huarmita japic shinami llaquita apancuna.

²⁵ ¡Chai sumac ñuca cushicuna jatun llactatami shitarincuna!

²⁶ Chaimantami quipa huiñaicunaca plazacunapi huañunga. Chai punzhapica alli macanacuc soldadocunami huañunga.

²⁷ Damasco pircapica ninatami japichisha. Chai ninami Ben-adad mandana huasitapish tucuchinga» ninmi.

Cedarmantapish, Hazormantapish

²⁸ Babilonia llactata jatun mandac Nabucodonosor macashpa atishca Cedar aillucunamantapish, Hazor llactata mandaccunamantapish Mandac Dios huillashpaca: «¡Cedar ailluhuan macanacungapac huichai shamuichic! ¡Inti llucshic llactapi causaccunataca tucuchichicyari!

²⁹ Paicunapac carpa huasicunatapish, ovejacunatapish quichungacunami. Paicuna jarcarina lienzocunatapish, tucui charishcacunatapish, camellocunatapish quichushpa japingacunami. Chashna quichucpimi paicunaca: “¡Tucui muyundipimi manchai tiyan!” nishpa caparinga.

³⁰ Hazorpi causaccunalla, chashna quichucpimi paicunaca: caruman rishpa, jatun huaicucunapi miticuichicyari. Babilonia llactata jatun mandac Nabucodonosorca cancunata llaquichingapacmi ima shina japinata yuyarishca.

³¹ Imatapish mana manchashpa, paicunalla cushilla causac gentecunata llaquichigrichic. Paicunaca pungucunapish mana aldabashca llactacunapimi causan.

³² Paicunapac camellocunatapish, achca huagracunatapish tucuita quichushpami apanguichic. Jatun tucushca runacunataca tucui llactacunamanmi caita chaita cachasha. Llaquichiccunataca tucui ladocunamantami apamusha.

³³ Hazorca huiñaitami shitashca pamba saquiringa. Chacal animalcunallami causanga. Cutinca pi mana causangachu» ninmi.

Elam llacta llaqui tucunamanta

³⁴ Judá llactata jatun mandac Sedequías mandacui huata Mandac Dios Elam llactata llaquichinamanta pai ima nishcata huillac Jeremiasta rimashpaca:

³⁵ «Tucuita Mandac Dios ñucaca: Elam llactapi causaccunaca arcohuan sinchita macanacuccunami. Chai arcocunataca paquigrinimi.

³⁶ Cai pacha chuscu ladomantami jatun huairata apamushpa, Elam llactapi causaccunataca caita, chaita cachagrini. Chashna cachacpica, tucui llactapimi miticushpa causagringacuna.

³⁷ Elam llactapi causaccunamanca paicunata huañuchinata munaccunapac, paicunata piñaccunapac ñaupapica yallita manchaitami cugrini. Paicunata tucuchichunmi huañuchiccunata cachagrini. Ñuca nina japiric shina, piñarishpami llaquichigrini.

³⁸ Elam llactapica ñuca mandashpa tiyarinata churashpami jatun mandactapish, shuctac mandaccunatapish tucuchisha.

³⁹ Shina ruhuashpapish, tucuri punzhacunapica Elam llactamanta prezu apashca gentecunataca cutichimushami. Chaitaca Mandac Dios ñucami nini» ninmi.