JEREMÍAS 46 - Dios Rimashcata Quillcashcami

Egipto llacta llaqui tucunata huillashcamanta

¹ Mandac Diosmi shuctac llactacunata llaquichinamanta Jeremiasman huillarca.

² Josiaspac churi jatun mandac Joacim Judá llactata chuscu huatata mandacucpimi, Babilonia llactata jatun mandac Nabucodonosorca Egipto llactata jatun mandac Faraón nishca Necaopac soldadocunata Eufrates yacu ladopi tiyac Carquemis llactapi macanacushpa misharca. Chai soldadocunamanta Mandac Dios rimashpaca:

³ «Uchilla escudocunata apashpa macanacuiman shamuichic.

⁴ ¡Carretacunata caballopi huataichic! ¡Caballocunapi montaichic! ¡Fierro cascota churarichic! ¡Lanzacunatapish mulaichic! ¡Shunguta pacac fierro churanata churarichic!

⁵ ¿Ima nishpatac mancharishpa, huashaiman cuticunguichic? Egipto sinchi soldadocunaca manchaihuanmi mana tigra ricushpa, miticungapac callpan. Tucui ladopimi manchai tiyan.

⁶ Yallita callpac runapish, mana callpai pudinchu. Yalli sinchi runapish mana ati pudinchu. Jahua lado Eufrates yacu ladopimi huactarishpa urmancuna.

⁷ ¿Pitac jatun Nilo yacu shina huacyashpa shamucun?

⁸ Egipto llacta gentecunaca jatun Nilo yacu shinami miramun. Paicunaca: “Huichai rishpa, tucui llactata tapashpami, llactapi causaccunatapish tucuchishun” nincuna.

⁹ Caballopi, Carretapi tiyarishpa callpaichic. Alli sinchi soldadocunaca escudota apaichic. Etiopía llacta, Put llacta soldadocunapish llucshichic. Arcohuan macanacuc Lud llactamanta soldadocunapish llucchichic.

¹⁰ Chai punzhaca tucuita Mandac Diospac punzhami canga. Paita piñaccunataca llaquichina punzhami canga. Espadaca tucuita huañuchishpami, yahuarsapa tucushpa, machashca shina canga. Tucuita Mandac Diosca jahua lado llacta Eufrates yacu patapimi yallita huañuchinga.

¹¹ ¡Carihuan manarac chayarishca soltera shina, Egipto runacunalla, Galaad llactaman huichai rishpa, balsamota apamugrichic! Mashna jambicunata tandashpapish, mana alli tucunguichicchu.

¹² Cancunata pingaichishcataca shuctac llactacunapish ñami yachan. Cancuna caparishcaca tucui cai pachapimi uyarin. Sinchi soldadoca caishuc sinchi soldadohuan huactarishpami urman» nishpami huillarca.

Jatun mandac Nabucodonosor Egiptopi causaccunata mishashcamanta

¹³ Babilonia llactata jatun mandac Nabucodonosor shamushpa, Egipto llactapi causaccunata llaquichinamanta Mandac Dios pai ima nishcata huillac Jeremiasman huillashpaca:

¹⁴ «Egipto llactapi huillaichic. Migdol, Menfis, Tafnes llactacunapi huillashpa: “¡Allichirishpa shayarichic. Cancuna causacuc muyunditaca espadahuanmi tucuchinga!” nichic.

¹⁵ ¿Ima nishpatac Apis nishca dios huagraca tucurishca? Mandac Dios urmachicpimi, Apis nishca dios huagraca urmarca.

¹⁶ Soldadocunaca yallita mitcarishpami paicunapac jahuallapitac urmancuna. Chashna urmashpaca: “Jatariyari, ñucanchic llactaman, ñucanchic huacharishca llactaman jacuchic. Jatun macanacuimanta miticushpa callpashunchic” nincuna.

¹⁷ Chaipi caparishpaca: “¡Egipto llactata jatun mandac Faraonca shimillami! Macana horasca imata mana ruhuanchu” nishpami caparirca.

¹⁸ Ñucaca causacuc Jatun Mandacmi cani. Ñuca shutica tucuita Mandac Diosmi. Soldadocunaca tucui urcucunamanta yalli Tabor urcuta, mama cucha ladopi tiyac Carmelo urcuta yalli jatunmi chayamunga.

¹⁹ Egiptopi causaccunalla, prezu apacpi, ringapac quipita allichichic. Menfisca shitashca pambami saquiringa. Chaipi causaccunaca shucllapish mana tiyangachu.

²⁰ Egipto llactaca sumac vaquilla shinami. Shina cacpipish, jahua llactamantaca tucuchicmi shamucun.

²¹ Cullquillamanta macanacuc soldadocunapish huira beci shinami. Paicunapish mana tigra ricushpami callparca. Llaquichina punzhacuna, huatacuna shamushcamantami chashna callparca.

²² Egiptopi causaccunaca culebra shinami sas nishpa callpan. Paicunata piñaccunaca shuc yantac runa shinami hachahuan shamun.

²³ Chai llaquichic runacunaca langostacuna shinami maita mana yupaipac, mana yaicuipac jatun sachaman yaicushpa, yuracunata tigrachinga. Chaitaca Mandac Dios ñucami nini.

²⁴ Egipto llactapi causaccunaca pingaichishcami canga. Jahua llacta gentecunapac maquipi churashcami canga» ninmi.

²⁵ Israelcunapac tucuita Mandac Diosca: «Ñucaca Tebas llacta Amón diosta llaquichishami. Faraontapish, pai mandacuc Egipto llactatapish, paicunapac dioscunatapish, paicunapac mandaccunatapish llaquichigrinimi. Faraontapish, paipi shunguta churashpa causaccunatapishmi llaquichisha.

²⁶ Paicunata huañuchisha niccunapac maquipi, Babilonia llactata jatun mandac Nabucodonosorpac maquipi, jatun mandacta serviccunapac maquipimi churasha. Shina cashpapish, quipataca punta punzhacuna shinallatacmi Egipto llactapi causanga. Chaitaca Mandac Dios ñucami nini.

Mandac Dios pai acllashcacunata quishpichinamanta

²⁷ Mandac Diosca: «Shina cacpipish, ñucata servic Jacobolla, ama manchaichu. Israelcunalla, ama manchaichicchu. Ñucami cancunataca caru llactamanta cacharichimusha. Cancunapac huahuacunatapish prezumanta quishpichimushami. Jacobopac huahuacuna cutishpaca imatapish mana manchashpami, cushilla causanga. Pipish mana manchachingachu.

²⁸ Ñucata servic Jacobolla, ñucami canhuan cani. Chaimanta ama manchaichu. Canta ñuca llucchishpa cachacpi, caita chaita rishpa causana llactacunataca tucuchigrinimi. Shina cashpapish cantaca mana tucui tucuchishachu. Ñuca caita, chaita cachacpimi, shuctac llactacunapi causacungui. Tucui chai llactacunatami tucuchisha. Ashtahuanpish cantaca mana tucuchishachu. Chaipac randica, cashcata ruhuashpami llaquichisha. Canta llaquichinataca manatac saquishachu» ninmi.