JEREMÍAS 45 - Dios Rimashcata Quillcashcami

Jeremías Barucman huillashcamanta

¹ Josiaspac churi jatun mandac Joacim Judá llactata chuscu huatata mandacucpimi, Dios ima nishcata huillac Jeremiasca Neriaspac churi Barucman Dios huillachun nishcata shuc carapi quillcachirca. Chai quillcapica:

² «Baruclla, israelcunata Mandac Diosca cantaca:

³ “Canca: ‘¡Aij, ñucalla! Mandac Diosca ñuca llaquihuan cacpipish, ashtahuan llaquichinmi. Huacacushpalla shaicushcami cani, mana samarinichu’ nicunguimi” ninmi.

⁴ Paitaca: “Mandac Diosca cantaca: Ñuca shayachishcatami urmachicuni. Ñuca tarpushcacunatami pilashpa shitacuni. Tucui cai llactapi causaccunatami chashna ruhuasha.

⁵ ¿Canca alli canatachu munangui? Chaitaca ama munaichu. Chaica, jatun llaquihuanmi tucui gentecunata llaquichigrini. Shina cacpipish, canmanca maipi cacpipish, causaita cushami. Chaitaca Mandac Dios ñucami nini” ninmi» nirca.