JEREMÍAS 43 - Dios Rimashcata Quillcashcami

Jeremiasta Egiptoman apashcamanta

¹ Jeremías Mandac Dios huillashcata gentecunaman tucui huillacpimi,

² Asaiaspac churi Azariaspish, Careapac churi Johananpish, jatun tucushca runacunapish, Jeremiastaca: «¡Canca llullacunguimi! Mana Mandac Dioschu: “Ama Egiptopi causagrichu” nichun cachashca canga.

³ Ashtahuanpish Neriaspac churi Barucmi ñucanchicta caldeocunapac maquipi churashpa huañuchingapac, Babilonia llactaman prezu cachangapac chashna nichun yuyaita cushca canga» nirca.

⁴ Shina nishpami, Careapac churi Johananpish, soldadocunata mandaccunapish, gentecunapish Mandac Dios rimashcata mana cazushpa, Judá llactapi mana saquirirca.

⁵ Ashtahuanpish Careapac churi Johananhuan, soldadocunata mandaccunahuanmi shuctac llactacunamanta cutishpa, Judá llactapi causangapac saquirishca tucui

⁶ caricunatapish, huarmicunatapish, huahuacunatapish jatun mandacpac ushicunatapish, Ahicampac churi, Safanpac nieto Gedaliastapish, Dios ima nishcata huillac Jeremiastapish, Neriaspac churi Baructapish aparca. Chai gentecunataca soldadocunata mandac Nabuzaradanmi Gedaliasta cuidachun churashca carca.

⁷ Mandac Dios mandashcata mana cazushpami, Egiptoman rishpa, Tafnes llactaman chayarca.

⁸ Tafnes llactapi cacpimi, Mandac Diosca Jeremiasta rimashpaca:

⁹ «Jatun rumicunata japishpa, Judá llacta runacunapac ñaupapi, Tafnes llacta Faraonpac huasiman yaicuna chimba lado, ladrillota ruhuana turupi pambai.

¹⁰ Chashna pambashpaca, israelcunapac tucuita Mandac Diosca: “Ñucata servic Babilonia llactata jatun mandac Nabucodonosortami cachagrini. Shina cachashpami, pai mandashpa tiyarinataca chai rumicunapac jahuapi churasha. Chai jahuapimi sumac carpa huasita shayachinga.

¹¹ Pai shamushpami, Egiptopi causaccunataca huañungapac caccunataca huañuchinga. Prezuringapac caccunataca prezunga. Jatun macanacuipi huañungapac caccunataca jatun macanacuita cachashpa tucuchinga.

¹² Egipto llactapi tiyac dioscunata mañana huasitaca ninata japichishpami rupachinga. Cutin chaipi causaccunataca prezungami. Egipto llactataca shuc michic paipac jahualla churanata chaspic shinami, tucui anchuchinga. Shina ruhuashpami, paica pipish imata mana nishca paipac llactallaman cutinga.

¹³ Egipto llactapi tiyac Bet-semes llactapi rumi dioscunata paquishpa, huasicunataca rupachishpami saquinga” ninmi ningui» nirca.