JEREMÍAS 42 - Dios Rimashcata Quillcashcami

Johananman huillashcamanta

¹ Soldadocunata mandaccunapish, Careapac churi Johananpish, Osaiaspac churi Jezaniaspish, gentecunapish uchillamanta callarishpa yuyaccamanmi

² Dios ima nishcata huillac Jeremiaspacman shamurca. Paicunaca: —Ñucanchic mañashcata uyaiyari. Ñucanchicmantapish, maijan saquirishca gentecunamantapish Mandac Diosta mañaiyari. Ñucanchicca achca cashpapish ashallami saquirishcanchic. Chaitaca canllatac ricunguimi.

³ Canta Mandac Dios maijan ñanta catinatapish, imata ruhuanatapish ñucanchicman yachachichun mañaiyari— nirca.

⁴ Shina nicpimi, Dios ima nishcata huillac Jeremiasca: —Allimi. Cancuna mañashca shina, Mandac Diosta mañagrinimi. Mandac Dios tucui imata nishcataca mana pacashpami cancunaman huillasha— nirca.

⁵ Shina nicpimi, paicunaca Jeremiastaca: —Mandac Dios tucui canman nishcatami ruhuashun. Ñucanchic nishca shinatac mana ruhuacpica, cashcata nic, imatapish pactachic Mandac Diosllatac ricuchun.

⁶ Mandac Dios imatapish ruhuachun nishcataca alli canatapish, mana alli canatapish ruhuashunllami. Cantaca mañachunmi cachanchic. Chashna alli ruhuashpami alli causashun— nirca.

⁷ Chunga punzha quipami Mandac Dios Jeremiasman huillarca.

⁸ Chaimantami Jeremiasca Careapac churi Johanantapish, paihuan cac soldadocunatapish, mandaccunatapish, uchillamanta callarishpa yuyaccaman tucui gentecunata cayarca.

⁹ Chashna cayashpaca: «Cancunaca ñucataca israelcunata Mandac Diosta cancunamanta mañachunmi cacharcanguichic. Paica:

¹⁰ Cancuna cai llactamanta mana llucshishpa, caipi causai callaricpica, cutin sinchiyachishpa, mana tucuchishachu. Cancunataca tarpushca shinata ruhuashpa, mana pilashachu. Cancunata llaquichishcamantaca llaquirinimi.

¹¹ Cancuna manchana Babilonia llactata jatun mandactaca ama manchaichicchu. Paipac maquimanta cacharichishpa, quishpichingapacca ñucami cancunahuan casha. Paitaca ama manchaichicchu.

¹² Ñuca cancunata llaquicpica, chai jatun mandacpish cancunata llaquingami. Shina llaquishpami, cancunapac llactaman cutichishpa cachanga. Chaitaca Mandac Dios ñucami nini.

¹³ Ashtahuanpish Mandac Dios mandashcata mana cazushpa: “Cai llactapica mana causashunchu.

¹⁴ Chaipac randica Egiptomanmi rishun. Chaipica jatun macanacuitapish mana ricushunchu, macanacuipi tocana trompetatapish mana uyashunchu. Yarcaipish mana tiyangachu. Chaipica allita causashun” nishpaca,

¹⁵ maijan saquirishca Judá llactapi causaccuna Mandac Dios rimashcata uyaichic. Israelcunapac tucuita Mandac Diosca: Egipto llactapi causagrinata munashpa, chai llactapi causacucpica,

¹⁶ chai llactapipish cancuna manchana macanacuipimi huañunguichic. Yarcaita manchacushpapish, Egipto llactapica yarcaihuanmi huañunguichic.

¹⁷ Egipto llactaman cutishpa, chaipi causagrinata munaccunaca shucllapish mana saquirishpami, jatun macanacuipi yarcaihuan, jatun ungüihuan huañunguichic. Ñuca chaipi causaccunata llaquichicpica, shucllapish mana quishpiringuichicchu. Chaitaca Mandac Dios ñucami nini.

¹⁸ Israelcunapac tucuita Mandac Diosca: Ima shinami ñuca nina japiric shina piñarishpa Jerusalenpi causaccunata yallita llaquichircani, chashnallatacmi Egipto llactaman riccunatapish llaquichisha. Chaipimi cancunaca mana alli nishcapish, pingaichishcapish, tucuipac mancharinapish causanguichic. Cai llactataca mana cutin ricunguichicchu ninmi.

¹⁹ Mandac Diosca Judá llactapi maijan saquirishcacunataca: Ama Egipto llactaman ringuichicchu nircami, Chaitaca cunanmi alli huillani.

²⁰ Cancunallatac: “Mandac Diosta ñucanchicmanta mañagri. Mandac Dios tucui nishcataca ñucanchicman huillangui. Tucui pai nishcata ruhuashunllami” nishpaca, pandarishpa llaqui tucushcanguichic.

²¹ Chaimantami cunanca Mandac Dios cancunaman imata huillachun mandashcacunata tucui huillarcani. Ashtahuanpish pai imata mandashcataca mana cazushpami causanguichic.

²² Chaimanta cunanca caita alli yachacuichic. Chaica, cancuna causagrinata munashca llactapica, jatun macanacuipi yarcaihuan, jatun ungüihuanmi huañunguichic» nirca.