JEREMÍAS 41 - Dios Rimashcata Quillcashcami

¹ Chai huata, canchis quillapimi jatun mandacpac huahuapuramanta Netaniaspac churi Elisamapac nieto Ismaelca caishuc chunga mandaccunahuan Gedaliaspacman Mizpa llactaman shamurca. Chashna shamushpami, chaipi tandanacushpa micurca.

² Ña micushpami, Netaniaspac churi Ismaelca paihuan cac chunga runacunahuan jatarishpa Safanpac churi Ahicampac nieto Gedaliasta espadahuan huañuchirca. Shinami Babilonia llactata jatun mandac chai llactata mandachun churashca runata huañuchirca.

³ Shinallatac Ismaelca Mizpa llactapi Gedalias-huan causac Judá llacta runacunatapish, chaipi causac caldeocunatapish huañuchircami.

⁴ Gedaliasta huañuchishca quipa punzhapi, paita huañuchishcata pipish manarac yachacpimi,

⁵ Siquem, Silo, Samaria llactacunamanta pusac chunga runacuna Mizpa llactaman shamurca. Paicunaca barbasta pitishca, churanacunapish lliquishca, tucui cuerpopish aspishcami ofrendata, inciensota, Mandac Diospac huasiman apamurca.

⁶ Chashna chayacpimi, Netaniaspac churi Ismaelca Mizpa llactamanta huacashpa tupangapac llucshirca. Paicunahuan tupashpaca: «Ahicampac churi Gedaliaspacman shamuichic» nirca.

⁷ Ashtahuanpish llactaman yaicucpica, Netaniaspac churi Ismaelmi paihuan cac runacunahuan japishpa huañuchishpa, yacuta jundachina jutcupi shitarca.

⁸ Chaimantami paicunapuramanta chunga runacuna Ismaeltaca: «Ñucanchicta ama huañuchichu. Ñucanchic allpapica achca trigota, cebadata, aceiteta, abeja mishquitami pacashpa charicunchic» nirca. Chaimantami paicunahuan cac runacunata shina mana huañuchirca.

⁹ Ismael huañuchishpa cuerpocunata shitashca jutcuca jatun jutcumi carca. Chai jutcutaca Judá llactata jatun mandac Asami Israel llactata jatun mandac Baasa macangapac shamucpi, miticungapac ruhuashca carca. Chai jutcupimi Netaniaspac churi Ismaelca huañushcacunata jundachirca.

¹⁰ Chai quipami Ismaelca Mizpa llactapi saquirishca jatun mandacpac ushicunatapish, shuctac gentecunatapish prezu aparca. Paicunataca soldadocunata mandac Nabuzaradanmi Ahicampac churi Gedaliasman mingashca carca. Netaniaspac churi Ismaelca tucui prezushpami amonitacunapacman rirca.

¹¹ Chai tucui llaquicunata Netaniaspac churi Ismael ruhuashcata yachac chayashpami, Careapac churi Johananpish, paihuan cac soldadocunata mandaccunapish,

¹² soldadocunata tandachishpa, Netaniaspac churi Ismaelhuan macanacungapac rirca. Chashna rishpami, Ismaeltaca Gabaón ladopi tiyac jatun cucha yacu ladopi japirca.

¹³ Chaipimi Ismaelhuan cac gentecunaca Careapac churi Johanantapish, soldadocunata mandaccunatapish ricushpa cushicurca.

¹⁴ Chashna cushicushpami, tucui Mizpa llactamanta Ismael prezu apashca gentecunaca Careapac churi Johananpac parte tucurca.

¹⁵ Ashtahuanpish Netaniaspac churi Ismaelca paihuan cac pusac runacunahuanmi Johananpac ñaupamanta miticushpa, Amón llactapi causaccunapacman rirca.

¹⁶ Careapac churi Johananca paihuan cac soldadocunahuanmi Netaniaspac churi Ismael Mizpa llactamanta apashca gentecunata cutinllatac japirca. Ismaelca Ahicampac churi Gedaliasta huañuchishpami soldadocunata, huarmicunata, huahuacunata, eunuco runacunata charicushca carca. Paicunataca Johananmi Cabaón llactamanta Mizpa llactaman cutichimushca carca.

¹⁷ Chaimantaca Egiptopi miticugrina yuyaihuanmi Belén ladopi tiyac Gerut-quimam llactapi causangapac rirca.

¹⁸ Caldeocunata manchashcamantami chaipi causarca. Netaniaspac churi Ismael Ahicampac churi Gedaliasta huañuchishcamantami paicunaca mancharca. Gedaliastaca Babilonia llactata jatun mandacmi chai llactata mandachun churashca carca.