JEREMÍAS 4 - Dios Rimashcata Quillcashcami

¹ Mandac Diosca: «Israelcunalla, ñucapacman cutishpaca, tucui shunguhuan cutimuichic. Yanga dioscunata saquichic. Ñucamanta ama ashtahuan anchurichicchu.

² Mandac Dios ñucapac shutipi ari nishpaca, mana llullashpa cashcata nichic. Shina ruhuacpica, shuctac llactacunapi causaccunapish, ñucamantami bendiciashca canga. Ñucahuanmi cushicunga.

³ Mandac Dios ñuca Judá llactapi causaccunatapish, Jerusalenpi causaccunatapish rimashpaca: Samarishca allpata yapuichic. Casha chaupicunapica ama tarpuichicchu.

⁴ Judá llactapi causaccunalla, Jerusalenpi causaccunalla, circuncisionta ruhuashpa, cancunapac shungumanta asha carata pitic shina, ñucapacman cuichic. Cancuna mana allita ruhuashcamantaca pacta nina japiric shina piñariman. Chai piñarishca nina shinataca pi mana huañuchi pudingachu nini» ninmi.

Judá llactata llaquichinamanta

⁵ Mandac Diosca: «Judá llactapipish, Jerusalenpipish: “¡Cai llactapi cornetapi tocaichic!” nichicyari. Shinallatac sinchita caparishpa: “¡Muyundita pircashca llactacunaman tandanacushpa yaicushunchic!” nichicyari.

⁶ ¡Sión ladoman banderata alzaichicyari! ¡Ama unaiyashpa miticungapac callpaichic! Jahua lado llactamantami yalli llaquichicta cachagrini. Chaica yalli llaquimi canga.

⁷ Leonmi sacha ucumanta shamucun. Llactacunata tucuchingapacmi pai tiyacushca pushtumanta caiman shamungapac, ñanman llucshishca. Cancunapac llactacunapica shuc runallapish mana saquiringachu. Tucui tucuchishcami canga.

⁸ Chaimanta sharpa churanata churarishpa, yallita llaquirishpa, caparishpa huacaichicyari. Mandac Dios ñucaca cancunahuan piñarishcami cani» ninmi.

⁹ Mandac Diosca: «Chai llaqui punzhacunapica, jatun mandacpac shungupish, pai churashca mandaccunapac shungupish yallita manchaihuanmi shaicushca shina tucunga. Curacunapish mancharishpami musparinga. Ñucamanta huillaccunapish manchaihuan chucchungami» ninmi.

¹⁰ Shina nicpimi ñucaca: «¡Aij, Mandac Dioslla! Ñucanchicca espadahuan huañunallami canchic. Judá llactapi, Jerusalenpi causaccunata: “Cancunaca cushi causaitami charinguichic” nishpaca, llullashcanguimi» nircani.

¹¹ Chai punzhacunapica Judá llactapi, Jerusalenpi causaccunataca: «Ñuca llactapi causaccunapacmanca shitashca urcumantami chaquishca huaira shamurca. Chai huairaca mana granota chuyayachic huairachu.

¹² Chai huairaca ñuca cachashca ashtahuan sinchi huairami. Cunanca ñucami paicunataca taripashpa llaquichigrini.

¹³ Piñac runacunaca puyu huichai shamuc shina, carretacunaca acapana huaira shinami shamun. Caballocunaca angata yallimi callpan. Chashna shamucpica cancunaca: “¡Aij, ñucanchiclla, imachari tucushun!” ninguichicmi.

¹⁴ Jerusalenpi causaccunalla, cancuna quishpiringapacca cancunapac shungu mapayashcata maillarichicyari. ¿Ima horascamantac millaillata ruhuana yuyaihuan causagringuichic?

¹⁵ Dan llactamanta, Efraín urcumantami llaqui tiyashcataca huillangapac shamucun.

¹⁶ Shuctac llactacunatapish, Jerusalentapish: “Caru llactamantami soldadocunaca muyunacushpa, Judá llactacunapi causaccunata llaquichingapac caparishpa shamucun” nichicyari.

¹⁷ Cancunallatac mana cazushcamantami chai soldadocunaca chagrata cuidac runacuna shina, muyundipi chapacun. Chaitaca Mandac Dios ñucami nini.

¹⁸ Cancuna mana allita ruhuashpa causashcallatacmi cancunataca llaquichirca. ¡Chai jayac shina llaquimi shunguman chayashpa, yallita llaquichishca!» ninmi.

Israel llaqui tucushcamanta Jeremías llaquirishcamanta

¹⁹ Shina nicpimi Jeremiasca: «¡Aij, ñuca shungulla, ñuca shungulla! Ñuca shunguca nanaihuan pitirigrinmi. Ñuca shunguca yallitami saltacun. Jatun macanacuita huillac cornetapi tocashcatapish, yallita caparishcatapish uyashpaca, ¡ima shinatac upalla cashayari!

²⁰ Yalli llaquicuna shamucushcataca catintami huillan. Tucui llactacunami tucuchishca. ¡Cungaillami ñuca carpa huasicunatapish, cortinatapish lliquishpami tucuchincuna!

²¹ ¿Ima horascamantac urcupi banderata ricushayari? ¿Ima horascamantac cornetapi tocashcata uyashayari?

²² Ñuca acllashcacunaca ñucata mana ricsic yuyai illaccunami. Ñuca huahuacunaca imatapish mana yachac, imatapish mana entendiccunami. Millaita ruhuanataca allita yachancunami. Ashtahuanpish allita ruhuanataca mana yachancunachu.

²³ Cai pachata ricucpica, llaquinayaita tucuchishca, imapish mana tiyarcachu. Cutin jahua pachata ricucpica, ima achicpish mana tiyarcachu.

²⁴ Urcucunata ricucpica chucchucurcami. Lomacunapish cuyuricurcami.

²⁵ Tucui muyundita ricucpica, shuc runallapish mana ricurircachu. Tucui volac animalcunapish rishcami carca.

²⁶ Alli pucuc allpacunata ricucpica, shitashcami saquirishca carca. Mandac Diosca yallita piñarishpami, tucui llactacunatapish, paipac ñaupapi tucuchishca carca» nircani.

²⁷ Mandac Diosca: «Tucui llactata tucuchishpapish, mana tucuita tucuchishachu.

²⁸ Chaimantami cai pachaca yana churanata churarishca shina tucunga. Jahua pachapish purayangami. Chaita ruhuanataca ñucallatacmi yuyarircani. Chaitaca manatac saquishachu. Ñuca ruhuasha nishcataca ruhuashatacmi.

²⁹ Caballopi montac soldadocunapish, flechata cacharic soldadocunapish yallita tulun nishpa shamucucta uyashpami llactapi causaccunaca jatun sachacunapi, rumi quingraicunapi miticunga. Tucui llactacunata shitashpa rishcamantami shucllapish mana tiyanga.

³⁰ Can chai llaquihuan cashpaca, ¿imatatac ruhuangui? Sumac pucanlla churanata churarishcapish, sumac coronata churarishcapish, cambac ñahui millmacunata yananllata ruhuashca cashpapish imata mana ruhuai pudinguichu. Yangami sumacta allichiringui. Canta cuyaccunaca canta piñashpami, huañuchingapac mashcancuna.

³¹ Punta sajuaric huarmi shina, llaquinayaita caparicuctami uyarcani. Sionpi causaccunami yallita caparishpa huacacun. Paicuna maquita chutashpaca: “¡Aij ñucalla, cunanca imachari tucusha! Ñucaca huañugrinimi. Cai runacunami ñucataca tucuchigrin” nishpami caparicun» ninmi.