JEREMÍAS 38 - Dios Rimashcata Quillcashcami

Jeremiastaca jatun jutcupi churashcamanta

¹ Matanpac churi Sefatiaspish, Pasurpac churi Gedaliaspish, Selemiaspac churi Jucalpish, Malquiaspac churi Pasurca Jeremías tucui gentecunaman huillacuctami uyarca. Jeremías huillashpaca:

² «Mandac Diosca: “Maijanpish cai llactapi saquiricca jatun macanacuipi yarcaihuan, yalli ungüihuanmi huañunga. Ashtahuanpish caimanta llucshishpa, caldeocunapac maquipi yaicugricca mana huañungachu. Chashna ruhuashpaca causangami” ninmi.

³ Mandac Diosca: “Cai llactaca Babilonia llactata jatun mandac soldadocunapac maquipi yaicungami. Paimi cai llactataca japinga” ninmi» nirca.

⁴ Shina nicpimi, mandaccunaca jatun mandactaca: «¡Cai runaca huañunami can! Pai chashna huillashpaca cai llactapi saquirishca macanacuc runacunatapish, tucui gentecunatapish maquita irquiyachic shinami manchaipi churan. Cai runaca gentecuna alli causachunca, mana munanchu. Ashtahuanpish mana allillatami munan» nirca.

⁵ Shina nicpimi, jatun mandac Sedequiasca: —Jatun mandac cashpapish, mana jarcai pudinichu. Cancuna munashcata ruhuaichiclla— nirca.

⁶ Shina nicpimi, Jeremiasta japishpa, Hamelecpac churi Malquiaspac yacuta jundachina jutcupi huascacunahuan urai cacharca. Chaica cárcel pungupimi carca. Ashtahuanpish chai jutcupica yacuca mana tiyarcachu. Turullami tiyarca. Jeremiasca chai turupimi pambarirca.

⁷ Chaitaca Etiopía llactamanta servic eunuco nishca Ebedmelecmi yachac chayarca. Paimi yacuta tandachina jatun jutcupi Jeremiasta shitashcataca yachac chayarca. Chai pachaca jatun mandacca Benjamín nishca pungupimi mandaccunahuan tandanacushpa tiyacurca.

⁸ Chaipi tiyacucpi, Ebedmelecca mandana huasimanta jatun mandacpacman rishpaca:

⁹ —Jatun mandaclla, chai runacuna Dios ima nishcata huillac Jeremiasta yacu jundachina jutcupi shitashpaca, mana allitami ruhuashca. Chai jutcupica yarcaihuan huañungami. Cai llactapica tandallapish mana tiyanchu— nirca.

¹⁰ Shina nicpimi, jatun mandacca Etiopía llactamanta Ebedmelectaca: —Caimanta quimsa chunga runacunata pushashpa, Dios ima nishcata huillac Jeremiasta manarac huañucpi, chai jutcumanta llucchimugri— nirca.

¹¹ Shina nicpimi, Ebedmelecca chai runacunata pushashpa, jatun mandacpac huasipi ima valishcacunata huacaichina ucumanta mauca churanacunata, mauca trapocunata apashpa, Jeremías llucshichun huascata chai jutcuman shitarca.

¹² Chashna shitashpami, Etiopía llactamanta Ebedmelecca Jeremiastaca: —Chai huasca ama nanachichun, chai mauca churanacunatapish, lliqui trapocunatapish cambac ishcai rigra ucupi churai— nirca. Jeremiasca pai nishca shinami ruhuarca.

¹³ Shinami Jeremiastaca chai yacuta jundachina jutcumanta huascahuan llucchirca. Chai quipaca Jeremiastaca cárcel pungupimi saquirca.

Jatun mandac Sedequías Jeremiasman pacalla tapushcamanta

¹⁴ Jutcumanta llucchishca quipami jatun mandac Sedequiasca Dios ima nishcata huillac Jeremiasta paipac ñaupaman pushamuchun cacharca. Paica Mandac Diospac huasiman yaicuna ishcaipac cati pungu ladopimi tiyacurca. Chaipimi jatun mandacca Jeremiastaca: —Caitami tapusha nini. Ama imata pacashpa tucui huillangui— nirca.

¹⁵ Shina nicpimi, Jeremiasca Sedequiastaca: —Can tapushcata tucui huillacpica, ñucata huañuchinguimi. Alli yuyaita cucpipish, mana uyanguichu— nirca.

¹⁶ Shina nicpimi, jatun mandac Sedequiasca Jeremiasta pacalla rimashpaca: —Cantaca manatac huañuchishachu. Shinallatac canta huañuchinata munaccunapac maquipipish mana churashachu. Cusaita cuc Mandac Diospac shutipimi nini— nirca.

¹⁷ Shina nicpimi, Jeremiasca Sedequiastaca: —Israelcunapac tucuita Mandac Diosca: “Babilonia llactata jatun mandac cachashca mandaccunapac maquipi yaicungapac canllatac llucshishpaca causanguimi. Shinallatac cai llactatapish, mana rupachingachu. Canpish, cambac huasi ucupuracunapish causanguichicmi.

¹⁸ Ashtahuanpish Babilonia llactata jatun mandac cachashca mandaccunapac maquipi yaicungapac canllatac mana llucshicpica, cai llactaca caldeocunapac maquipimi churashca canga. Paicunami ninata tucuchinga. Canpish paicunapac maquimanta mana quishpiringuichu” ninmi— nirca.

¹⁹ Shina nicpimi, jatun mandac Sedequiasca Jeremiastaca: —Caldeocuna parte tucushca Judá llacta runacunatami manchani. Paicunapac maquipi churacpica, ñucataca burlashpa llaquichingami— nirca.

²⁰ Shina nicpimi Jeremiasca: —Mana paicunapac maquipi churangachu. Cunanca Mandac Dios rimashcata ñuca huillashcata alli uyai. Chaita uyashpaca, mana llaqui tucunguichu, allimi causangui.

²¹ Ashtahuanpish canllatac paicunapac maquipi mana yaicusha nicpica, tucuita Mandac Dios huillashpaca:

²² Judá llactata jatun mandacpac huasipi saquirishca tucui huarmicunatami Babilonia llactata jatun mandac churashca mandaccunapacman apanga. Chai huarmicunallatacmi: “Canhuan alli apanacuccunallatacmi cantaca umashpa mishashca. Paicunaca cambac chaquita turupi pambachishpaca shitashpa rircallami” ninga.

²³ Cambac huarmicunata, huahuacunatami caldeocunaca caimanta apanga. Canca paicunapac maquimantaca manatac quishpiringuichu. Ashtahuanpish Babilonia llactata jatun mandacpac maquipimi, prezu japi tucungui. Cai llactapish tucui rupachishcami canga— nirca.

²⁴ Shina nicpimi, Sedequiasca Jeremiastaca: —Caita yachashpaca huañungami. Chaimanta cai rimaicunataca pipish ama yachachun.

²⁵ Ñuca canhuan parlanacushcata mandaccuna yachac chayashpa, cambacman shamushpa: “Jatun mandac ima nishcata, paihuan imata parlashcata mana pacashpa tucui huillai. Chaita huillacpica, mana huañuchishunchu” nicpica,

²⁶ canca jatun mandactaca: “Ama Jonatanpac huasiman apaichu. Chaipi huañunataca mana munanichu” nishpa mañangui— nirca.

²⁷ Chashnami tucui mandaccuna shamushpa, Jeremías imata parlanacushcata tapurca. Paicuna tapucpica, Jeremiasca jatun mandac nishca shinami huillarca. Chaimantaca Jeremiasta saquishpa rircallami. Jatun mandac-huan Jeremías imata parlanacushcataca pipish mana yacharcachu.

²⁸ Shinami Jeremiasca Jerusalén llactata caldeocuna japingacaman cárcel pungupi tiyacurca.