JEREMÍAS 36 - Dios Rimashcata Quillcashcami

Jeremiaspac quillcata Baruc rezashcamanta

¹ Josiaspac churi jatun mandac Joacim Judá llactata chuscu huatata mandacucpi, Mandac Dios Jeremiasta rimashpaca:

² «Quillcana carata japishpa, chaipi Josías causacui punzhacunamanta cunan punzhacaman israelcunata, Judá llactapi causaccunata, shuctac llactapi causaccunata ima shina llaquichinata tucui quillcai.

³ Judá llactapi causaccuna ñuca yallita paicunata llaquichigricushcata uyashpa, mana allita ruhuashpa causacushcata yuyarishpa llaquiringapishchari. Paicuna mana allita ruhuashcata, paicunapac juchacunata ñuca perdonachun llaquiringapishchari» nirca.

⁴ Shina nicpimi, Jeremiasca Neriaspac churi Baructa cayashpa, Mandac Dios tucui paiman rimashcata quillcachun mandarca. Chaimantami Barucca quillcana carapi quillcarca.

⁵ Chai quipami Jeremiasca Baructaca: «Ñucaca Mandac Diospac huasiman mana yaicui pudinichu.

⁶ Chaimanta ayunana punzhapi, Mandac Diosta mañana huasiman yaicushpa, ñuca carapi quillcashca Mandac Dios rimashcata gentecunaman rezashpa uyachingui. Tucui Judá llactacunamanta shamushcacunamanpish rezashpa uyachingui.

⁷ Paicuna mañashcata Mandac Dios uyaringapishchari. Shinallatac mana alli ruhuanata saquishpa, Mandac Diospac cuchuman chayaringapishchari. Mandac Diosca cai gentecunahuan yallita piñarishcami» nirca.

⁸ Shina nicpica, Neriaspac churi Barucca Dios ima nishcata huillac Jeremías mandashca shinallatacmi Mandac Diospac rimashcata quillcashcataca Diosta mañana huasipi rezashpa uyachirca.

⁹ Josiaspac churi jatun mandac Joacim Judá llactata pichca huata iscun quillata mandacucpimi, tucui Jerusalenpi causaccunatapish, Judá llactacunamanta Jerusalenman shamuccunatapish, Mandac Diospac huasipi ayunachun mandarca.

¹⁰ Barucca Jeremías quillcachishcataca tucui gentecuna uyachunmi Mandac Diospac huasipi rezarca. Chai ucuca Safanpac churi quillcac Gemariaspacmi carca. Cai ucuca Mandac Diospac huasiman yaicuna mushuc pungumanta jahua lado pambapimi carca.

¹¹ Gemariaspac churi Safanpac nieto Miqueasca Mandac Dios rimashcata rezashcataca tucuimi uyarca.

¹² Chaimantami jatun mandacpac huasiman rishpa, quillcac runapac ucuman yaicurca. Chaipimi quillcac Elisamapish, Semaiaspac churi Delaiaspish, Acborpac churi Elnatanpish, Safanpac churi Gemariaspish, Ananiaspac churi Sedequiaspish tiyacurca.

¹³ Paicunamanmi Miqueasca Baruc quillcashcata gentecunaman rezashpa uyachishcata tucui huillarca.

¹⁴ Chaimantami chai mandaccunaca Netaniaspac churi Selemiaspac nieto Cusipac bisnieto Jehudí Barucpacman cachashpaca: «Tandanacuipi rezashca quillcata apamui» nichun cacharca. Shina nicpimi, Barucca chai quillcashcata apashpa, chai tandanacushcapacman rirca.

¹⁵ Chashna ricpimi Baructaca: «Cunanca tiyarishpa, ñucanchicmanpish rezashpa uyachi» nirca. Shina nicpimi, Barucca rezashpa uyachirca.

¹⁶ Chai tucui rezashcacunata uyashpaca, tucuimi mancharishpa, caishuc, chaishuc ñahuipura chapanacurca. Chai quipami, Baructaca: «¡Cai rezashcataca mana cungarishpa, jatun mandacman huillashun!» nirca.

¹⁷ Chai quipaca Baructaca: —Ima shina Jeremías rimashcacunata quillcashcata huillaiyari— nirca.

¹⁸ Shina nicpimi Barucca: —Jeremiasmi cai rimashcacunataca quillcachirca. Chaitami ñucaca cai carapica tintahuan quillcashpa caticurcani— nirca.

¹⁹ Shina nicpimi, mandaccunaca Baructaca: —Cancuna maipi cashcata pi ama yachachun, canpish, Jeremiaspish miticugrichic— nirca.

²⁰ Shina nishpami, Baruc charicushca quillcata Elisamapac ucupi saquishpa, jatun mandacpac ucuman yaicurca. Chaipimi tucui uyashcata jatun mandacman huillarca.

²¹ Shina huillacpimi, jatun mandacca Jehudica quillcashcata apachun cacharca. Paimi quillcac Elisamapac ucumanta apamushpa, jatun mandacmanpish, paihuan tiyacuc tucui mandaccunamanpish rezashpa uyachirca.

²² Chai huata callarishca iscun quillapimi jatun mandacca tamya punzhacuna causana huasipi paipac ñaupapi ninata japichishpa tiyacurca.

²³ Jehudí ña quimsa mana cashpaca chuscu huachuta rezacucpimi, jatun mandacca chai quillcashcata quichushpa, quillcana plumata pitinahuan lliquishpa, jagan nicuc nina jahuapi shitarca. Chashna shitashpami tucui rupachirca.

²⁴ Chai tucui rezashcata uyashpaca jatun mandacpish, paita servic mandaccunapish mana mancharcachu. Paicunapac churanacunallatapish mana lliquircachu.

²⁵ Elnatán, Delaía, Gemarías ama rupachichu nicpipish, jatun mandacca mana uyarcachu.

²⁶ Ashtahuanpish jatun mandacca Hamelecpac churi Jerameelta, Azrielpac churi Seraiasta, Abdeelpac churi Selemiastami quillcac Baructa, Dios ima nishcata huillac Jeremiasta prezuchun cacharca. Shina prezungapac ricpipish, Mandac Diosmi paicunataca pacarca.

²⁷ Jeremías Baructa quillcachishca carata jatun mandac rupachishca quipa, Mandac Diosca Jeremiastaca:

²⁸ «Cutin shuctac carata japi. Chaipica Judá llactata jatun mandac Joacim rupachishca carapi quillcashcallatatac quillcai.

²⁹ Chai quipaca Judá llactata jatun mandac Joacimtaca: “Mandac Diosca: Punta quillcata can rupachishpaca: ‘Cai carapica, ¿imamantatac Babilonia llactata jatun mandac shamushpa, cai llactatapish, gentecunatapish, animalcunatapish tucui tucuchinga’ nircangui?

³⁰ Chaimantami Mandac Dios Judá llactata jatun mandac Joacimmanta rimashpaca: Paica, David mandashpa tiyanapi tiyarishpa mandachunca, shuc churillatapish mana charingachu. Pai huañucpica, punzhaca rupaipi, tutaca chiri rasupimi shitanga.

³¹ Mana allita ruhuashpa causashcamantaca paitapish, paipac huahua huahuacunatapish, paita serviccunatapish llaquichishami. Chashna ñuca huillacpipish, paicunaca mana cazurcachu. Chashnami paicunatapish, Jerusalenpi causaccunatapish, Judá llacta runacunatapish llaquichigrini” ninmi ningui» nirca.

³² Shina nicpimi, Jeremiasca carata japishpa, Neriaspac churi quillcac Barucman curca. Chai carapimi Barucca Judá llactata jatun mandac Joacim rupachishca carapi tucui quillcashcacunallatatac Jeremías cutin quillcachicpi quillcarca. Chai carapica shuctac rimaicunatapish ashtahuan quillcarcami.