JEREMÍAS 33 - Dios Rimashcata Quillcashcami

Jerusalenta cutin allichinamanta

¹ Cárcel canzha pambapi Jeremías prezu cacpimi, cutinllatac Mandac Diosca:

² «Cai pachata maita mana cuyuchipacta ruhuac Mandac Dios ñucaca:

³ Ñucata caparishpa mañailla, ñucaca uyashallami. Can mana yachashca, pacalla tiyacuc jatun yachaicunatami yachachisha.

⁴ Israelcunata Mandac Dios ñucaca cai llacta huasicunamantapish, Judá llactata jatun mandaccunapac espadahuan, ariete nishcacunahuan tucuchina, huasicunamantapish rimashpaca:

⁵ “Caldeocunami cai llactapi causaccunata tucui huañuchishpa tucuchingapac shamurca. Paicunallatac mana alli ruhuashpa causacushcamantami yallita piñarishpa, cai llactapi causaccunataca ñuca ñahuita pacashpa mana ricurcani.

⁶ Shina cashpapish ñucami cai llactapi causaccunaman jambita apamushpa alliyachisha. Chashna jambishpa sinchiyashpami, tucui llaquimanta cuidashpa, cushi causaita cusha.

⁷ Judá llactamanta, Israel llactamanta prezu apashca gentecunaca cutin cutichimushpami, utcapi cashca shinallatac sinchiyachisha.

⁸ Ñucata llaquichishpa, millaita ruhuashpa juchallishcatapish tucuimi pichasha. Ñucata mana cazushpa, juchacunata ruhuashcatapish, jatun tucushcatapish perdonashami.

⁹ Jerusalenpi ñuca allicunata ruhuashcata tucui llactacunapi uyashpami, ñucataca alli nishpa, sumaimanami cangui ningacuna. Chaimantami Jerusalenpi causaccunahuan yallita cushicusha nini” ninmi» nirca.

¹⁰ Mandac Diosca: «Cancuna: “Cai llactapica ima gentecunapish, ima animalcunapish mana tiyanchu. Judá llacta llactacunapi, Jerusalén ñancunapica runacunapish, animalcunapish illanmi, shitashcami siricun” nina llactapica,

¹¹ yallita cushicushpa asishcapish, novia, novio cantashcapish, shinallatac Mandac Dios ñucapac huasiman ofrendata apamushpa: “¡Tucuita mandac Diosta alabaichic, paica allimari! Paica huiñaita cuyacunllami” nishpa, cantashcapish uyaringami. Ñucaca prezumanta cutichimushpaca, utcapi shinallatac causachunmi allichisha. Chaitaca Mandac Dios ñucami nini.

¹² Cutinllatac tucuita Mandac Diosca: “Runacunapish, animalcunapish mana tiyac, cai shitashca llactapica cutinllatacmi michinapish, chucllacunapish tucui llactacunapi tiyanga.

¹³ Cutinllatacmi urcupi tiyac llactacunapi, Sefela llactacunapi, Neguev pueblocunapi, Benjamín llactacunapi, Jerusalén muyundi pambapi, shinallatac Judá llactacunapi michiccunaca paicunapac corral ovejacunata yupangacuna” ninmi.

Davidhuan ari nishca pactashcamanta

¹⁴ Mandac Diosca: Riquichic, israelcunaman, Judá llactapi causaccunaman, ñuca imata ruhuasha nishcata pactachina punzhacunami chayamugrin.

¹⁵ Chai punzhacunapimi, Davidpac huahuapuramanta cashcata ruhuacta llucchisha. Paimi cai llactapica imatapish allita ruhuashpa, cashcata ruhuanga.

¹⁶ Chai punzhacunapimi, Judá llactapi causaccunapish, Jerusalenpi causaccunapish imata mana manchashpa, sumacta causanga. Paicunaca: “Mandac Diosca ñucanchicman cashcata ruhuacmi” ningacuna.

¹⁷ Chaimanta Mandac Diosca: Davidpac huahuapuramanta israelcunata mandashpa tiyarinapica jaicapi mana illangachu.

¹⁸ Shinallatac animalcunata, ofrendacunata, animalcunata punzhanta ñucaman cushpa huañuchingapacca curacunapish, levitacunapish jaicapi mana illangachu» ninmi.

¹⁹ Mandac Dios Jeremiasta rimashpaca:

²⁰ «Ñucaca: Punzhataca punzha cachun, tutataca tuta cachun mandashpa churashcata cancuna yangapi churashpa, punzhataca tuta cachun, tutataca punzha cachun churacpica,

²¹ ñucata servic Davidhuan ari nishcapish yangami canga. Pai mandashpa tiyarinapi mandashpa tiyarichunca huahuata mana cushachu. Shinallatac curacunahuan, levitacunahuan ñucata servichun ari nishcapish yangami canga.

²² Ñucata servic Davidpac huahuacunatapish, levitacunapac huahuacunatapish, jahua pachapi tiyac lucerocunata shina, mama cucha tiyu shinami, mana yupaipacta mirachisha nini» ninmi.

²³ Mandac Dios Jeremiasta rimashpaca:

²⁴ «Gentecuna: “Mandac Diosca ishcai aillucunata acllashpapish, shitashcami” nishpa rimaricuctaca, ¿manachu uyangui? Chashna nishpaca mana ñuca acllashcacuna cashcatami yuyan.

²⁵ Ashtahuanpish Mandac Dios ñucaca: Punzhahuanpish, tutahuanpish mana ari nishca cashpa, jahua pachapipish, cai pachapipish mandashca mana churashca cashpaca,

²⁶ ñucapish Jacobopac huahuacunataca shitaimanmi. Ñucata servic Davidpac huahuacunatapish cungarimanmi. Shuc punzha Abrahampac, Isaacpac, Jacobopac huahuacunata mandachunca, Davidpac huahuacunataca ña mana mandachun churaimanchu. Ashtahuanpish ñucallatacmi caimanta prezu apashcacunataca llaquishpa cutichimusha» nirca.