JEREMÍAS 32 - Dios Rimashcata Quillcashcami

Hanameelpac allpataca Jeremías randishcamanta

¹ Nabucodonosor Babilonia llactata chunga huatata mandacucpi, jatun mandac Sedequías Judá llactata chunga pusac huatata mandacucpimi, Mandac Diosca Jeremiasman huillarca.

² Chai punzhacunapica Babilonia llactata jatun mandacpac soldadocunami Jerusalentaca muyunacushpa chapacurca. Chai punzhapica Dios ima nishcata huillac Jeremiasca Judá llactata jatun mandacpac huasi canzhapimi prezu carca.

³ Judá llactata jatun mandac Sedequías Jeremiastaca: «¿Ima nishpatac canca: “Mandac Diosca: Ñucami cai llactataca Babilonia llactata jatun mandacpac maquipi churani. Paimi cai llactataca japinga.

⁴ Judá llactata jatun mandac Sedequiasca caldeocunapac maquimantaca manatac ati pudingachu. Paica Babilonia llactata jatun mandacpac maquipi churashcatacmi canga. Chai mandac-huanca ñahui ñahui chimbapurashpami shayaringa.

⁵ Sedequiastaca Babilonia llactamanmi apachun mandanga. Ñuca cutin ricugringacamanmi chaipi causanga. Caldeocunahuan macanacushpapish mana ati pudingachu” ninmi nishpa huillangui?» nishpami prezurca.

⁶ Jeremiasca: «Mandac Diosca:

⁷ “Cambac tio Salumpac churi Hanameel cambacman shamushpaca: ‘Anatotpi cac ñuca allpata randi. Chai allpataca canmi randi pudingui’ ninga” nirca.

⁸ Mandac Dios huillashca shinallatacmi ñuca tiopac churi Hanameel cárcel punguman shamushpaca: “Benjamín llactapi tiyac Anatotpi cac ñuca allpata randi. Chai allpaca cambacmi cana can. Chaimanta canmi randina cangui” nirca. Shina nicpimi, chaita randichunca, Mandac Dios mandashcata yachac chayarcani.

⁹ Chaimantami Anatotpi cac, ñuca tiopac churi Hanameelpac allpataca patsac pusac chunga canchis gramos cullquita pezashpa cushpa randircani.

¹⁰ Chai quipaca testigocunapac ñaupapimi randishca documentota ruhuashpa, cullquita balanzapi pezashpa curcani.

¹¹ Chai quipaca sellashca escrituratapish, chai documento copiatapish japircanimi.

¹² Chai documentotaca ñuca tiopac churi Hanameelpac, shutita churac testigocunapac, cárcel ladopi shayacuc Judá llacta tucui runacunapac ñaupapimi Neriaspac churi, Maasiaspac nieto Barucman curcani.

¹³ Chai quipaca tucui paicunapac ñaupapi Baructa mandashpaca:

¹⁴ “Israelcunapac tucuita Mandac Diosca: ‘Chai sellashca escritutapish, chai documentopac copiatapish achca punzhacunata huacaichishca cachun, barro mangapi churai.

¹⁵ Cai llactapica huasicunatapish, allpacunatapish, uvas chagracunatapish randinaracmi cangui’ ninmi” nircani.

Jeremías Diosta mañashcamanta

¹⁶ Chai quipaca chai documentota Neriaspac churi Barucman cushpa, Mandac Diosta mañashpaca:

¹⁷ “¡Jatun Mandac Dioslla, jahua pachatapish, cai pachatapish cambac rigrata chutashpami, cambac jatun poderhuan ruhuashcangui! Can Diospacca ima ruhuanapish mana sinchichu.

¹⁸ Canca huaranga huaranga gentecunata llaquicmi cangui. Cutin ñaupa taitacuna mana allita ruhuashcamantaca quipa huahuacunatami llaquichingui. Jatun poderyuc Dioslla, cambac shutica tucuita Mandac Diosmi.

¹⁹ Can ruhuashcacunaca yalli jatunmi, shinallatac sumaimanami. Cada shuc aichayuc runacunaman paicuna imata ruhuashca shinallatac cungapacmi, tucui paicuna ima shina causacucta ricucungui.

²⁰ Canmi Egiptopica pi mana ruhuaipaccunata, mancharinacunata ruhuarcangui. Cunancamanmi Israel llactapipish, tucui runacunapurapipish chaicunataca ruhuacunguirac. Cunan punzhapi ricushca shinallatacmi, tucuipac alli nishca cangui.

²¹ Can acllashca israelcunataca cambac poderyuc maquihuan pi mana ruhuaipaccunata, mancharinacunata ruhuashpa, Egipto runacunata yallita manchachishpami llucchimurcangui.

²² Paicunapac ñaupa taitacunaman cungapac ari nishca llactata curcangui. Chai llactapica lechepish, mishquipish yacu shina callpacunmi.

²³ Paicunaca chai llactaman yaicumushpa, chai allpata japishpapish can rimashcataca mana uyashun nircachu. Can mandashcacunatapish mana pactachircachu. Shinallatac imata ruhuachun nishcatapish mana ruhuarcachu. Chaimantami cai tucui llaquicunahuan paicunata llaquichishcangui.

²⁴ Riquichic, caldeocunaca cai llactata japingapacmi ariete nishcacunahuan shamushca. Cai llactaca yarcaihuan, ungüihuan llaquipi cashcamantami paicunahuan macanacuc shamuc caldeocunapac maquipi yaicugrin. Cai huillashcacunaca ñami pactacun. Chaitaca can Diosllatacmi ricucungui.

²⁵ Mandac Dioslla, cai llacta caldeocunapac maquipi urmagricucpipish canca: Allpataca cullquihuan randi, chai randishcata ricuchunca testigocunata tandachi” nircanguimi» nircani.

²⁶ Mandac Dios Jeremiasta rimashpaca:

²⁷ «Ñucaca tucui cai pachapi causaccunata Mandac Diosmi cani. Ñucamanca imapish mana ruhuaipacca mana tiyanchu.

²⁸ Chaimantami ñucaca: Cai llactataca caldeocunapac maquipi, shinallatac Babilonia llactata jatun mandac Nabuconodosorpac maquipimi churagrini. Shina churacpimi, paica japinga.

²⁹ Cai llactata llaquichic caldeocuna shamushpami, ninata japichishpa, tucui huasicunata rupachinga. Shinallatac ñucata piñachishpa, chai huasi jahuapi Baal diosman inciensota rupachina pushtutapish, shuctac dioscunaman vinota cushpa tallina pushtutapish tucui rupachinga.

³⁰ Israelcunapish, Judá gentecunapish huambramanta pachami ñucapac ñaupapica allita ruhuana randica, millaita ruhuashpa causarca. Israelcunaca paicunapac maquihuan mana allita ruhuashpami, ñucata piñachishpa causarca.

³¹ Cai llactaca callarishca punzhamanta cunan punzhacamanmi ñucata llaquichishpa, piñachishpa causacun. Chaimantami ñucapac ñaupamanta anchuchigrini.

³² Chashnami israelcunapish, Judá gentecunapish, paicunata jatun mandaccunapish, caishuc mandaccunapish, curacunapish, huillaccunapish mana allita ruhuashpa, ñucata piñachishpa causarca. Chaimantami anchuchigrini. Tucui Judá gentecunapish, Jerusalenpi causaccunapish ñucataca piñachircami.

³³ Paicunaca ñahuita ricuchinapac randica, huashatami ricuchirca. Ñuca paicunata utcamanta pacha allita yachachicucpipish, allita causachun cunacucpipish, mana uyarcachu.

³⁴ Chaipac randica, ñucata mañana huasipimi paicuna ruhuashca millana dioscunata churashpa mapayachirca.

³⁵ Paicunapac churicunata, ushicunata Moloc diosman cushpa rupachingapacmi Henonpac pambapi Baal diosman altarcunata ruhuashpa, Judá gentecunataca juchata ruhuachirca. Chaicunata ruhuachichunca mana mandarcanichu, chaita mandana yuyaillapish mana tiyarcachu nini» nirca.

³⁶ Mandac Diosca Israelcunata: «Cancuna: “Jatun macanacuipi yarcaihuan, ungüicunahuan llaquichichunmi Babilonia llactata jatun mandacpac maquipi churagrin” nina llactataca

³⁷ ñucami nina japiric shina yallita piñarishpa, mana ricusha nishpa, llucchishpa cacharcani. Cunanca paicunataca tucui llactacunamantami cutinllatac tandachimusha. Shina tandachishpami, cai llactapica imatapish mana manchashpa causachun churasha.

³⁸ Paicunaca ñuca acllashcacunami canga. Ñucaca paicunapac Diosmi casha.

³⁹ Shinallatac huiñaita ñucata manchashpa causachunmi, paicunamanca shuc yuyaita, shuctac causaita cusha. Paicunapish, paicunapac quipa huahua huahuacunapish alli causaita charichunmi chashna ruhuasha.

⁴⁰ Paicunaman allita ruhuangapacmi paicunahuanca huiñai causaicaman ari ninacusha. Ñucamanta ama anchurichunmi, ñucata manchana yuyaita paicunapac shungupi churasha.

⁴¹ Ñucaca paicunaman allita ruhuashpami cushicusha. Cai llactataca tucui shunguhuan, tucui almahuanmi tarpuc shina churashpa, maita mana cuyuchipacta ruhuasha.

⁴² Mandac Dios ñucaca: Cai llactapi causaccunata llaquichishca shinallatacmi tucui paicunamanca allicunata ruhuasha.

⁴³ Shinallatac cancuna: “Cai llactapica gentecunapish, animalcunapish mana tiyanchu. Shitashca pambami. Cunanca caldeocunapac maquipimi” nicucpipish, cai llactallapitac allpata randingacunami.

⁴⁴ Ashtahuanpish caimanta prezu aparishcacunataca ñucami cutichimusha. Paicunaca allpata randingacunami. Escriturata ruhuashpami sellanga. Chashnami Benjaminpac llactapi, Jerusalén muyundi llactacunapi, Judá llactallapitac tiyac caishuc llactacunapi, urcucunapi tiyac llactacunapi, Sifela pambapi tiyac llactacunapi, Neguev pamba llactacunapimi allpata randinga» ninmi.