JEREMÍAS 31 - Dios Rimashcata Quillcashcami

¹ Mandac Diosca: «Chai huatacunapica ñucaca tucui Israel aillucunapac Diosmi casha. Paicunaca ñuca acllashcacunami canga» ninmi.

² Mandac Diosca: «Jatun macanacuipi mana huañushca israelcuna samanata mashcashpa, shitashca pambata ricucpimi, ñuca cuyaita ricuchircani.

³ Ñuca utca huatacunapi ricurishpaca: “Cantaca jaicapi mana tucuri cuyaihuanmi cuyani. Chaimantami ashtahuan llaquini.

⁴ Carihuan manarac chayarishca soltera shina Israel llactalla, cambac llactata cutin shayachishami. Cutin allichirishpami panderohuan cushicushpa, danzashpa llucshingui.

⁵ Cutinllatacmi Samaria urcupica uvasta tarpungui. Uvasta tarpushpaca, pucuchishpa cushicunguimi.

⁶ Cuidaccuna Efraín urcupi: ‘¡Mandac Diospacman jacuchic! ¡Sión urcuman huichai rishunchic!’ nishpa, caparina punzhacuna chayamungami” nircani» ninmi.

⁷ Mandac Diosca: «Jacobomanta cushicushpa caparichicyari. Llactacunapac uma shina llactata alli nichicyari. Sinchita caparishpa: “¡Mandac Dioslla, can acllashcapuramanta saquirishca israelcunata quishpichiyari!” nichicyari.

⁸ Ñucaca jahua lado llactamanta, shinallatac tucui cai pacha tucuri llactamantami tandachisha. Chashna tandachicpimi, ñahui mana ricuccunapish, suchucunapish, huicsayuc huarmicunapish, llullu huahuayuc huarmicunapish caiman cutin tandanacumunga.

⁹ Paicunaca huacashpami cutimunga. Ñucaca sumac yacu pugru pambata, maita mana mitcaripac sumac ñantami cushichishpa pushamusha. Ñucami israelcunapac taita cani. Efrainca ñuca punta churimi.

¹⁰ ¡Llactapi causaccunalla, Mandac Dios ñuca rimashcata uyashpa, mama cucha patapi tiyac caru llactacunapi huillaichic! Chashna huillashpaca: “Israelcunata llucchishpa, caita chaita cachac Diosca cutinmi tandachishpa, ovejacunata michic shina cuidanga” nichicyari.

¹¹ Mandac Dios ñucami Jacobopac huahuacunataca quishpichircani. Sinchi runapac maquimantami cacharichircani.

¹² Paicunaca Sión urcuman rishpami, yallita cushicushpa cantanga. Ñuca bendiciashca micunata, vinota, aceiteta, ovejacunata japingapacmi callpamunga. Paicunaca parcurishca huerta shinami cushilla causanga. Jaicapi ima llaqui mana tucungachu.

¹³ Carihuan mana chayarishca solteraca mosocunahuan, yuyaccunahuanmi danzashpa cushicungami. Huacanapac randica cushicungami. Nanaihuan canapac randica samaringami.

¹⁴ Curacunatapish, ñuca acllashcacunatapish alli micunata cushpami cushichisha» ninmi.

¹⁵ Mandac Diosca: «Ramá llactapi llaquihuan caparishpa huacashcami uyarirca. Chaipica Raquelmi paipac huahuacuna huañushcamanta yallita huacacurca. Pipish mana cushichi pudircachu» ninmi.

¹⁶ Mandac Diosca: «Ama ashtahuan huacaichu, cambac ñahuimanta huiquita pichaiyari. Can llaquita apashcamantaca allitami cusha, piñaccunapac llactamantaca cutimungacunami.

¹⁷ Cambac huahuacunamanca alli causai tiyangami. Quiquin llactamanmi cutimunga.

¹⁸ Efraín llactataca: “Canmi ñucata macashpa llaquichircangui. Piña huagrata shinami llaquichichun cacharcangui. Cambacman ñucaca cutisha ninimi. Canmi ñuca Mandac Dios cangui.

¹⁹ Canmanta caruyashca quipaca yallitami llaquirini. Ñucaca mana allita ruhuashcata yuyarishpami shungupi huactarircani. Huambrarac cashpa juchata ruhuashcamantami yallita pingaihuan cani. Chaitaca manatac cungarishachu” nishpa, huacactami uyarcani.

²⁰ ¿Manachu Efrainca ñuca cuyashca huahua? ¿Manachu ñuca cushicuna huahua? Punzhantami paita yuyaricunilla. Ñuca paita yuyarishpaca shungumantami llaquirini. Paitaca llaquishatacmi» nini. Chaitaca Mandac Dios ñucami nini.

²¹ Mandac Diosca: «Can rishca ñanta unanchishpa saquingui. Rishca ñanta yuyaringui. Carihuan manarac chayarishca soltera shina Israel-lla, can maita rishca ñanllatatac cai llactaman cutimui.

²² Mana cazuc soltera shina Israel-lla, ¿ima horascamantac caita chaita puricunguilla? Mandac Dios ñucami cai llactapica mushucta ruhuasha. Huarmica cusapac ladomanmi shamunga» ninmi.

²³ Israelcunapac tucuita Mandac Diosca: «Gentecunata prezumanta ñuca llucchimucpica, Judá llactapish, chai llactapi tiyac llactacunapish: “¡Cashcata ruhuashpa, causana llactalla, Diospac urculla, Mandac Dios bendiciachun!” ningami.

²⁴ Chaipimi Judá llactapish, tucui llactacunapish, tarpuccunapish, michiccunapish causanga.

²⁵ Shaicushcapac shungutaca sinchiyachishami. Llaquilla causaccunapac almatapish cushichishami» ninmi.

²⁶ Riccharishpaca ñuca muscushca sumac cashcatami ricurcani.

Israelcunahuan mushuc ari ninacuita ruhuashcamanta

²⁷ Mandac Diosca: «Israel llactapipish, Judá llactapipish, gentecunata, animalcunata achcata mirachina punzhacunami shamugrin.

²⁸ Ima shinami paicunata sapimanta pilac shina anchuchinata, urmachinata, llaquichinata, tucui chingachinata munarcani. Chashnallatacmi allichishpa shayachinata, tarpuc shina cutin callarichinata munani.

²⁹ Chai punzhacunapica: “Taitacuna jayac uvasta micushcamantami, huahuacunaca quiruta nanachin” ña mana ashtahuan ningachu.

³⁰ Ashtahuanpish maijan jayac uvasta micushpaca, paillatacmi quiruta nanachinga. Shinaca maijanpish quiquin juchamantami huañunga» ninmi.

³¹ Mandac Diosca: «Israel llactapi, Judá llactapi causaccunahuan ari nina punzhacunami shamugrin.

³² Cai ari nishcaca mana paicunapac taitacunata Egiptomanta maquimanta aisashpa, llucchicui punzhapi shinachu canga. Chai ari nishcataca ñuca paicunapac cusa cacpipish, yangapi churashpami mana cazurca.

³³ Shamuc punzhacunapica israelcunahuan ari nishcaca cashnami canga: Ñuca mandashcataca paicunapac shungupi churashpami, paicunapac yuyaipi quillcasha. Ñucaca paicunapac Diosmi casha, paicunaca ñuca acllashcacunami canga.

³⁴ Paicunapurapish, huauquicunapurapish: “Mandac Diosta ricsichic” nishpaca, ña mana yachachingachu. Ñucataca uchillamanta callarishpa, yuyaccunacamanmi ricsinga. Paicunapac mana allita ruhuashcataca perdonashami. Paicunapac juchataca mana ashtahuan yuyarishachu» ninmi.

³⁵ Punzhanta achicyachic intita tutanta achicyachic quillata, lucerocunata churac, mama cuchata cuyuchic tucuita Mandac Diosca:

³⁶ «Ñuca mandashcacuna ñuca ñaupapi chingaricpica, israelcunapac huahua huahuacunapish cai llactapi huiñaita chingaringami.

³⁷ Maijanpish jahua pachata, cai pachata maicaman cashcata medicpica, ñucapish israelcunataca tucui paicuna mana allita ruhuashcamanta mana chasquimanchu. Chaitaca Mandac Dios ñucami nini.

³⁸ Jerusalentaca ñucapaclla cachun, Hananeel torremanta, esquinapi tiyac pungucaman allichina punzhacunami shamugrin.

³⁹ Chai pungumantaca Gareb lomacaman, chaimantaca muyushpami Goa pambacaman cordelhuan medinga.

⁴⁰ Huañushcacunata shitana pambapish, uchupata shitana pambapish, Cedrón yacu pata pambacaman, inti llucshina ladopi tiyac esquinapi cac caballocuna yaicuna pungucamanmi, Mandac Dios ñucapaclla chicanyachishca canga. Paicunataca jaicapi mana llucchishpa cachangachu. Mana tucuchingachu» ninmi.